1 Peteru 4:1-19
4 Er Kristu yange ya ican ken iyol yô, ne kpa lu nen a imba ishima la,* sha ci u or ka nana̱ ya ican ken iyol yô, nan de u eren asorabo,
2 sha er nana kera lu uma ken iyol sha ci u eren asaren a ior ga, kpa a lu sha ci u eren ishima i Aôndo yô.
3 Gadia shighe u a kar ne kuma u yange ma ne er ishima i akuraior agen, zum u ne lu eren akaa a ndôhôrshima,* ne lu a asaren a bo a ior ve kôron iyol tsaha sha mi ga, ne lu man msôrom karen ikyaa inya, ne lu eren uiniongo mba i eren dang her la, ne lu gban ugesa sha msôrom ma man, shi ne lu civir ieev sha ihyembeato la.
4 Kpiligh ve iyol er ne due ken dang ve u a lu vihin gban a gba kera la sha yô, nahan ka ve lamen sha a ven dang.
5 Kpa ambaaior ne aa va ôr kwagh ve sha ishigh ki un u a we iyol a lu keghen u va ôron mbaumav man mbakpenev ijir la.
6 Jighilii yô, ka sha ityôkyaa ne mbakpenev kpa yange i ôr ve loho u dedoo ye, sha u, er i lu ôron ve ijir sha iyol sha inja i uumace nahan kpa, vea lu uma ken jijingi sha mnenge u Aôndo yô.
7 Kpa mkur u akaa cii zurum. Sha nahan yô, eren nen kwagh sha kwaghfan,* shi lu nen per* sha mbamsen mba eren.
8 Kwagh u hemban cii yô, doo nen ayol a en tsung je, sha ci u dooshima cirin asorabo kpishi.
9 Ngohol nen hanma wen sar sar, a ahon a gban shio.
10 Hanma or nana̱ eren tom u wasen hanma wen a iyua i i ne nan yô, er iyua shon i lu la cii, sha ci u ne mba mba̱ nengen sha ya mba̱ fan kwagh. Gadia i tese ne erdoo u sha mhôôn u Aôndo sha igbenda kposo kposo.
11 Aluer or ngu ôron kwagh yô, nana̱ ôron sha inja i nan ngu ôron ka akaaôron a Aôndo; aluer or ngu eren tom u wasen mbagenev yô, nana̱ eren u sha inja i nan ngu suur sha tahav mbu Aôndo ka a na la; sha er a na Aôndo icivir sha akaa cii ken Yesu Kristu yô. Icivir man tahav cii ka akaa a na, shi aa lu a na zan zan gbem sha won. Amen.
12 Ne mba doon mo ishima, shighe u ne tagher a atsan a vihin tsung yô, kwagh la a̱ de kpiligh ne iyol inja er ka kwagh ugen kposo a lu eren ne ga.
13 Kpa za nen hemen u ember sha atsan a Kristu, a ne kpa ne lu yan la, er a lu la cii, sha er a saan ne iyol shi ne ember tsung sha shighe u ne va nenge a iengem na la kpaa yô.
14 Zum u i lu lahan ne sha ci u iti i Kristu yô, i̱ saan ne iyol, gadia jijingi u iengem, ka jijingi u Aôndo je la, ngu sha a ven.
15 Nahan kpa, or wen môm nana̱ de ye ican er nan ngu orwuanor shin ormbaiv shin iferor shin or u wan ave sha akaa a ior nahan ga.
16 Kpa aluer ma or ngu yan ican sha ci u nan ngu Orkristu yô, nana̱ de nengen ér nan hee ga, kpa nana̱ za hemen u wuese Aôndo, sha u eren kwagh u a kom sha iti ne yô.
17 Gadia shighe kuma u a hii u ôron ya* u Aôndo ijir. Nahan, aluer ijirôron hii sha a vese yô, mba ve we loho u dedoo u Aôndo ikyo ga la, kwagh ve una za nena?
18 “Man aluer ka u a yima orperapera sha ican yô, ka nyi ia er or u nan civir Aôndo ga la kua orsholibo?”
19 Sha nahan yô, mba Aôndo a de ve lu yan ican la ve̱ za hemen u wan ayol a ve* sha ikyev i un u a lu u jighjigh, U A Gbe Akaa Cii la, shi ve eren kwagh u dedoo her.
Ngeren mba shin kpe
^ Shin “ne kpa kange nen ishima u yan ican nahan.”
^ Shin “aeren a dang.” Ka ishember i ken zwa Grika i i yer ér aselgeia (asejia) la, ngi ôron kwagh u ieren i môm tseegh ga. Nenge Ngeren u Pasen Asember.
^ Shin “a mkav ken ishima.”
^ Shin “lu nen tsevaa.”
^ Shin “ior mba ken ya.”
^ Shin “uuma vev.”
