1 Timoteu 2:1-15
2 Nahan, hiihii yô, m ngu kaan mer, i eren mbamsen mba zamber man mbamsen mba sônon kwagh, man mbamsen mba pinen iwasen sha ci u mbagenev kua mbamsen mba sughun Aôndo sha kwagh u hanma injaor cii,
2 man sha kwagh u utor kua mbahemenev* cii, sha er se za hemen u teman girgir shi lun ken bem, shi civir Aôndo kpoghuloo man a ishima i môm yô.
3 Kwagh ne ka kwagh u dedoo man u vough sha ishigh ki Aôndo, Oryiman wase,
4 u ishima na yô, i lu u i̱ yima ior cii shi ve̱ zua a mfe u mimi u vough la.
5 Gadia Aôndo ngu môm, shi or u himen ior a Aôndo kpa ngu môm, ka Kristu Yesu. Ka or
6 u yange na iyol na hingir ipaan i kuman vough sha ci u ior* cii la—kwagh ne ka kwagh u i gbe u a er shiada sha mi sha shighe na vough yô.
7 Ka sha ci u shiada ne je yange i tsuam ér m lu orpasenkwagh man apostoli ye—m ngu ôron ka mimi, m ngu eren aie ga—mo ortesen u akuraior sha kwagh u jighjigh u nan man mimi.
8 Nahan sarem u hanma ijiir yô, nomso mba eren kwagh a ior sha mimi* ma ve eren msen hanma shighe cii, a ishimanyoon shio man a anyiman shio.
9 Kasev di sarem u ma ve wuhan iyol sha inja,* akuma akuma man sha kwaghfan,* i̱ de lu sha u eren ityough ki hemban ga, shi i̱ de lu sha zanaria man utagbede shin sha akondo a taver ishe tsung ga,
10 kpa i̱ lu sha gbenda u i doo u kasev mba ve kaan ér mba civir Aôndo vea eren la; inja na yô, i̱ lu sha u eren ityom i dedoo.
11 Kasev ve̱ teman ving ve̱ henen kwagh, a iyol hiden a mi ijime tsung.
12 M na kwase ian mer nana̱ tese ga, shin nana̱ hemen nomsoor ga, kpa gba u nana luun ving.*
13 Gadia yange i gba Adam hiihii, cii man Ifa ye.
14 Shi lu Adam i tsugh ga, kpa lu kwase i tsugh nan, nan hingir u peren tindi ye.
15 Nahan kpa, a za hemen u kuran nan sha kwagh u mar, aluer nan* za hemen u nan jighjigh shi tesen dooshima shi lun wang shi eren kwagh sha kwaghfan* yô.
Ngeren mba shin kpe
^ Shin “mba ve lu sha aan a hemen ior.”
^ Shin “hanma injaor.”
^ Shin “ior mba ka ve kende ave sha a ishima i mimi yô.”
^ Shin “sha icivir.”
^ Shin “a mkav ken ishima.”
^ Shin “nana huan ving.”
^ Zwa Grika, “ve.”
^ Shin “a mkav ken ishima.”
