1 Timoteu 4:1-16
4 Kpa jijingi u Aôndo ngu pasen wang ér, ken hemen yô, mbagenev vea undu atesen a se ne a jighjigh ne, vea hingir u keghen ato sha akaaôron a* tsumen a ior, a i senge ér a due hen Aôndo yô, man atesen a azôv,
2 sha ikyev i mbawanatseregh mba ve ôron akaa a aiegh, mba imoshima ve i we akpema er kwavyolough u i kpile iyôgh ki tseen vong sha mi nahan la.
3 Ka ve vendan a ior ér ve̱ de eren ivaa ga, shi ve kaan a ior ér ve̱ nyagh akaayan a Aôndo a gbe ér mbanan un jighjigh mba ve lu a mfe u mimi u vough la ve̱ yaan a ishughun la.
4 Gadia hanma kwagh u Aôndo a gbe cii ka u dedoo, nahan gba u a venda kwagh môm ga, aluer i ngohol un a ishughun yô,
5 gadia ka i tsegha un sha kwaghôron u Aôndo man msen u ka i er sha mi la.
6 Aluer u ngu wan anmgbianev kwagh sha kwagh ne yô, u lu ortom u Kristu Yesu u dedoo, u i koso nan sha mkaanem ma se ne jighjigh a mi kua sha ityesen i dedoo i u dondo i lianaa la.
7 Kpa venda akaaôron a aiegh a a hendan a Aôndo, amba a ungômbakasev ka ve ôron la. Gema tsaase iyol you, a awashima u civir Aôndo.
8 Gadia u̱ tsaase iyol sha anumbe a eren* la ka a inja kpuaa di tsô, kpa u civir Aôndo yô, ka a inja sha akaa cii, sha ci u kwagh la ka a wase or u zuan a averen a i tende zwa u nan se ken uma u hegen man uma u ken hemen la.
9 Kwaghôron la ka u mimi, shi a kuma u a lumun un a ishima i môm.
10 Ka nahan ve se lu eren tom kpoghuloo, nôngon sha afatyô wase cii ye, sha ci u se har ishimaverenkeghen yase cii sha Aôndo u uma, un ka Oryiman u hanma injaor cii, hemban cii je yô, mbananjighjigh.
11 Za hemen u wan ior kwagh sha akaa ne, shi tesen a.
12 Mayange or a̱ de lahan we sha ci u ú ngu wanye yum ga. Kpa gema lu mbananjighjigh ikyav sha iliam you, man sha ieren you, man sha dooshima, man sha jighjigh u nan kua sha mlu u wang.
13 Za hemen u veren ishima ôron ior takeda shi wan ior kwagh* shi tesen ve kpoghuloo, zan zan me kar van.
14 De te iyua i yange i na u sha kwaghôron u profeti, zum u mzough u mbatamen penda ave sha a we la kera ga.
15 Henen* sha akaa ne zulee, na ishima you cii sha a, sha er ior cii vea nenge a mzehemen wou wang yô.
16 Veren ishima sha iyol you man sha ityesen you hanma shighe cii. De gbe uwer sha akaa ne ga, aluer u ngu eren nahan yô, u yima iyol you kua mba ve keghen ato a we la.
Ngeren mba shin kpe
^ Zwa Grika, “keghen ato a ujijingi mba.”
^ Shin “u eren akaa a taver we iyol ker.”
^ Shin “taver ior ishima.”
^ Shin “gbidyen kwar.”
