2 Mbakorinte 3:1-18
3 Nahan saa shi se pase ayol a ase hen a venee? Se kpa kwagh gba se a uwashika mba i wuese se ker, er mbagenev nahanaa? Ka se u ma ne nger se uwashika mbara nahanaa?
2 Ne ayol a en ne mba washika wase, u i nger ken asema a ase, shi uumace cii ve fe un shi ve ôron yô.
3 Gadia ikyav tese wang ér ne mba washika u Kristu u se mbatomov mba Aôndo se nger yô, se nger ka sha inki ga, kpa ka sha jijingi u Aôndo u uma, shi ka sha ikpande i awen ga, kpa ka sha ikpande i iyol i inyam man awambe, ken asema.
4 Aôndo na se mba a vangertiôr ne ken Kristu.
5 U ngu wer ka sha tahav asev ka se kuma u eren tom ne ga, kpa ka Aôndo ka a na ve se kuma u eren u ye.
6 Ka un jighilii a ne ve se kom u lun mbatomov mba ikyuryan i he, i i har sha Atindi* ga, kpa i lu sha jijingi la ye; gadia Atindi nga ne ibo i kuugh, kpa jijingi yô, ne uma.
7 Nahan aluer Atindi a ka a na ibo i kuugh, a yange i nger sha asangaabaacaa sha ikpande i awen la, va a iengem je ônov mba Iserael kanshio u kenger sha ishigh ki Mose sha ci u iengem i ishigh nagh, man lu iengem i a va kar a mi kera la yô,
8 tom u jijingi a eren la je yô, ua hemba lun a iengem cii gaa?
9 Gadia aluer Atindi a ka a na ibo la yange lu a iengem yô, kwagh u ka a na ve i kaa ér or ngu orperapera la hemba ngun a iengem cii!
10 Jighilii yô, kwagh u ngise lu a iengem la je kpa i kar a iengem na la kera sha ci u iengem igen i i hembe un yô.
11 Gadia aluer kwagh u lu u a va kar a mi kera la je kpa yange i na un a iengem yô, kwagh u a lu her ne hemba ngun a iengem cii!
12 Er se lu a ishimaverenkeghen ne yô, ka se lam a ishima i gbar gbar,
13 shi se mba eren kwagh u Mose er la ga; yange a cir ikyondo sha ishi sha er ônov mba Iserael vea nenge mkur u kwagh u lu u a va kar a mi kera la ga yô.
14 Kpa yange i cighir ve asema. Gadia zan zan sha ayange ne kpa, ka a ôron ikyuryan i tse la yô, ikyondo shon la i lu her, sha ci u ka sha Kristu tseegh i karen a i kera ye.
15 Jighilii yô, zan zan nyian kpa, ka a ôron Atindi a Mose yô, ikyondo i cir asema a ve.
16 Kpa or ka nana gema hen Yehova* yô, i kar a ikyondo la kera.
17 Yehova* ka Jijingi, man pe jijingi u Yehova* a lu yô, or lun uikyangen her ga.
18 Nahan er i bugh se ikyondo sha ishi kera, se lu mondon iengem i Yehova* er ka jingi nahan yô, se cii mba geman se sha ibyeen na la, iengem yase ngi seer a seer, vough er Yehova* u a lu Jijingi la* a soo la.
Ngeren mba shin kpe
^ Ka, “Atindi a Mose” je la.
^ Nenge Ngeren u Pasen Asember.
^ Nenge Ngeren u Pasen Asember.
^ Nenge Ngeren u Pasen Asember.
^ Nenge Ngeren u Pasen Asember.
^ Nenge Ngeren u Pasen Asember.
^ Shin a fatyô u kaan ér, “vough er jijingi u Yehova.”
