2 Mbakorinte 4:1-18
4 Nahan, er se lu mbaeren tom ne sha mhôônom ma i zungu se la yô, se mba gbe uwer ga.
2 Kpa se venda akaa a kunya a i yer a la, se mba eren kwagh sha ayom ga, shi se mba goom a mkaanem ma Aôndo kpaa ga; kpa se mba pasen mimi u ma, nahan tesen ser se mba eren kwagh u vough sha ishigh ki Aôndo, sha er hanma or nana fa kwagh ne sha iwasen i imoshima i nan yô.
3 Aluer mimi je loho u dedoo u se pasen ne ngu myer* yô, ngu myer ka hen mba ve lu timin la,
4 ka mbanan jighjigh ga mba aôndo u tar* ne a pir ve ashe a ishima, sha u iwanger i iengem i loho u dedoo u sha kwagh u Kristu, un u a lu ibyeen i Aôndo la, i̱ de te ken asema a ve ga la.
5 Gadia se mba pasen ka kwagh wase ga, kpa ka kwagh u Yesu Kristu ser ngu Ter, se di se mba ikpan yen sha ci u Yesu.
6 Gadia ka Aôndo je a kaa ér: “Iwanger i̱ ta ken ime” ye, man ka ishigh ki Kristu a te iwanger ne a mi ken asema a ase, sha u a̱ mondo iengem i mfe u Aôndo la ye.
7 Nahan kpa, se mba a kwagh u injaa ne ken mkam* ma inyaav, sha er se zua a agee a a gande a orumace, a a dugh hen Aôndo, i lu hen a vese ga la yô.
8 Mba kighir se sha hanma gbenda cii, kpa i imbishi se gande u zenden ga; se kera fa kwagh u se er ga, kpa kwagh hemba se vindi vindi ga;*
9 mba tôvon se a ican, kpa i kende se ga; i ta se inya, kpa se kpe ga.
10 Ka i shi eren se ican je er a wua se nahan, imba ican i Yesu kpa ya la, kpa ka se wa ishima, sha er a nenge a ieren i Yesu la ken a vese kpaa yô.
11 Gadia se mba se lu uma ne ka se shi tagher ishigh a ku hanma shighe sha ci u Yesu, sha er a nenge a ieren i Yesu la ken iyol yase i i kpen ne kpaa yô.
12 Nahan ku ngu eren tom ken a vese, kpa ken a ven yô, ka uma.
13 Se mba a imba ishima i nan jighjigh i i nger kwagh sha mi la, ér: “Yange m na jighjigh, nahan m ôr kwagh.” Se kpa se na jighjigh, ka nahan se lu ôron kwagh ye,
14 sha ci u se fa ser Un u yange nder Yesu shin ku la una nder se kpaa se lu vea Yesu, shi una va a vese sha ishigh nagh a ven imôngo.
15 Akaa ne cii ka sha ci wen, sha er erdoo u sha mhôôn u Aôndo la una seer ngeen kpishi yô, gadia ior mba̱ nan ishughun sha ci u icivir i Aôndo mba seer a seer.
16 Sha nahan yô, se mba gbe uwer ga; or u se lu sha iyol la ka una saan ishe je kpa, hanma iyange ka i sôr or u se lu kimi la a hingir hegh.
17 Gadia er ican i se lu yan* ne i lu hen anshighe kpuaa shi i̱ peese nahan kpa, ngi wasen se u va zuan a icivir i hemban cii,* i i lu i tsôron la;
18 nahan se mba veren ashe a ase ka sha akaa a i nengen a mi la ga, kpa ka sha akaa a i nengen a mi ga la. Gadia akaa a i nengen a mi la ka a lun gbem ga, kpa akaa a i nengen a mi ga la yô, ka a lun gbem sha won.
Ngeren mba shin kpe
^ Shin “i yisa u.”
^ Shin “kov.” Nenge Ngeren u Pasen Asember.
^ Shin “mtem.”
^ Shin a fatyô u kaan ér, “kpa se mba a ishimaverenkeghen.”
^ Shin “imeen i se lu tagher a mi.”
^ Zwa Grika, “hemban yuhwan.”
