2 Peteru 1:1-21
1 Mo Shimon Peteru, kpan man apostoli u Yesu Kristu, m ngu ngeren hen ne mba jighjigh u nan wen a gbe kwagh tsung, er u wase nahan, u se cii se zough a mi sha perapera u Aôndo wase man u Oryiman Yesu Kristu la:
2 I̱ seer tesen ne erdoo u sha mhôôn, shi i̱ seer nan ne bem sha u nan ne mfe u vough u sha kwagh u Aôndo man u Yesu Ter wase.
3 Gadia tahav mbu Aôndo na se akaa cii,* a i gbe u se lu a mi ve se za hemen u lun uma shi se civir un sha mfe u vough, u sha kwagh u Un u a yer se sha iengem na man sha ieren na i vough la.
4 Ka sha akaa ne* a er uityendezwa a vese* mba doon tsung man mba vesen ye, sha er uityendezwa mba shon vea na ne kpa ne hingir u zuan a iengem i Aôndo yô, er hegen se dugh ken isharen i bo,* i i ne tar u vihi la sha yô.
5 Sha ityôkyaa ne yô, nôngo nen kpoghuloo sha afatyô wen cii lu nen a jighjigh u nan shi lu nen a ieren i vough, ne luun a ieren i vough yô, shi lu nen a mfe,
6 ne luun a mfe yô, shi lu nen a iyolkôrontsaha, ne luun a iyolkôrontsaha yô, shi lu nen a ishimataver, ne luun a ishimataver yô, shi lu nen mbacivir Aôndo,
7 ne luun mbacivir Aôndo yô, shi doo nen ayol a en er ka anmgbianev mba hen tsombor nahan, ne doon ayol a en er ka anmgbianev mba hen tsombor nahan yô, shi ior cica cii ve doo ne ishima.
8 Aluer ne mba a aeren ne cii shi a dumbur ken a ven yô, aa na iyol ia kera kpe ne ga, shin aa na ne de u umen atam sha kwagh u mfe u vough u sha kwagh u Ter Yesu Kristu la ga.
9 Gadia hanma or u nan ban a aeren ne yô, nan pir ashe, nan kusu ashe a nan ér nana nenge iwanger ga,* nan hungur er i kire asorabo a nan a ngise la yô.
10 Sha nahan yô, anmgbianev, lu nen a gbashima i hemba ave a tse, sha er kwagh u i yer ne shi i tsough ne sha u ne̱ lu la, una kar ne ga yô. Gadia aluer ne za hemen u eren akaa ne yô, mayange ne gba ga.
11 Jighilii yô, ka nahan man a na ne zua a ian i icivirigh tsung,* i nyôron ken Tartor u tsôron u Ter man Oryiman wase Yesu Kristu ye.
12 Ka sha ityôkyaa ne ka i lum pe umbur ne akaa ne hanma shighe ye, shin er ne fe a shi ne var a ityesen i mimi i ne hen la tsembelee nahan kpaa.
13 Kpa, er m lu ken tabernakel* ne her yô, m nenge mer doo u me nder ne sha u umbur ne akaa ne,
14 gadia m fa je mer ica a kera gba ga tsô a va kar a tabernakel wam ne kera, vough er Ter wase Yesu Kristu yange pasem wang nahan.
15 Me za hemen u eren kwagh u m fetyô la cii, sha er me va yem kpa, ne fatyô u umbur* akaa ne ayol a en yô.
16 Zum u se lu pasen ne kwagh u tahav man shighe u Yesu Kristu una lu vea vese imôngo la, lu akaaôron a aiegh a ior ve dugh la se lu ôron ne ga, kpa yange se nenge a iengem na sha ashe a ase.
17 Gadia yange zua a icivir man iengem hen Aôndo Ter, zum u Un u a lu iengem i hemban la ôr mkaanem man a na la, ér: “Ngun ka Wan wam u ishima ishima. Doom a na.”
18 Man se ungwa i ôr mkaanem man sha, zum u se lu vea na imôngo sha icighan uwo yô.
19 Nahan se hemba mban a vangertiôr ser akaaôron a profeti aa kure sha mi. Ne mba eren kwagh u vough, er ne lu keghen ato a akaaôron shon, a a lu er imenger i i lu mondon iwanger ken ime, ka asema a en je la, (sha u i lu zan zan sev mbu hii u wanger shi ishan i sha use i kar duen) la.
20 Gadia ne hii fan er i lu sha mhen u or i pasen kwaghôron u profeti u Ruamabera ga yô.
21 Gadia ma shighe môm kpa orumace gba karen a ishima i nan tsô ôron kwaghôron u profeti ga, kpa ka icighan jijingi yange a mgbegha* ior ve ôr loho u Aôndo ye.
Ngeren mba shin kpe
^ Shin “na se akaa cii gbilin.”
^ Ka, “iengem na man ieren na i vough” je la.
^ Shin “a er ityendezwa u nan se uiyua.”
^ Shin “isharen i yaven a or i ka i taver ken or la.”
^ Shin a fatyô u kaan ér, “nan pir ashe, nan nengen ka ze ica ga.”
^ Shin “a na ne iveren ngôgh.”
^ Shin “tenti,” ka, iyol na i shin tar je la.
^ Shin “ôron kwagh teren.”
^ Zwa Grika, “a tuur.”
