2 Peteru 2:1-22
2 Nahan kpa, yange uprofeti mbaaiev va hingir u lun ken nongoior la, er ne kpa mbatesen mbaaiev vea va lu ken a ven nahan. Ve mban ne vea nyôr myer a iniongo kposo kposo i vihin jighjigh u nan wen, shi un u a yam ve ve hingir kwagh na la je kpa vea tuna ér ve fa un ga, nahan vea va a mtim sha ayol a ve a ngôôr ga.
2 Heela tseegh ga, ior kpishi vea dondo ieren ve i ndôhôrshima* la, shi vea na yô, ior vea lam dang sha kwagh u gbenda u mimi ne.
3 Shi er ve we hua yô, vea ya mtsera sha a ven sha u tsughun ne sha akaaôron a mimi ga. Kpa i kure ijir ve ica i gba, ngi van zooloo ga, shi mtim ve kpa gba mnyam ga.*
4 Aôndo yange de tsahan mbatyomov mba ve er isholibo la ga, kpa a kende ve ken Tartaru,* a haa ve mshirim ken ime i wan* mgbigh mgbigh, i ver ve mba keghen ijirôron.
5 Shi yange de ga tsaha tar u tsuaa la, kpa kura Noa, u lu or u pasen kwagh u perapera la, kua mbagenev, shighe u va a mngerem ma deemee sha tar u mba ve venda u civir Aôndo la.
6 Shi Aôndo yange venda gar u Sodom man gar u Gomora, ka nahan ve yange nande agar ne hia gba mtwem ye; kwagh ne hingir ikyav i kwagh u una va er a mbavendan Aôndo yô.
7 Yange gema war orperapera Loti, u lu yan ican tsung sha ci u ieren i ndôhôrshima i* mbaperenatindi la—
8 gadia orperapera la yange lu yan ican ken ishima* na ayange ayange sha aferakaa aa lu nengen shi ungwan shighe u lu hen atô ve la.
9 Sha nahan yô, Yehova* fa u yiman mbacivir un ken ican ve, kpa geman veren mbaaferev sha u va timin ve* sha iyange i ijirigh,
10 hemban je yô mba ve keren u hôngor mlu u sha iyol u mbagenev la, kua mba ka ve lahan mbautahav la.
Ve cihi kwagh shi mba hidi ijime sha kwagh ga, mba cie u lamen dang sha mbacivirigh ga,
11 man yô mbatyomov mba ve hembe ve agee man tahav la je kpa mba lamen sha a ve dang zum u ve lu gban ijir sha kwagh ve ga, sha ci u nan Yehova* icivir.*
12 Kpa ior mban yô, mba er ka annyamev mba ve henen kwagh ga, mba ka ve eren kwagh er i gbe ve ér ve eren, ka i mar ve sha u a va kôr a wua la nahan; mba gbe lamen dang dang sha akaa a ve fe ga tsô. Aeren a ve a bo la aa va ve a mtim,
13 injar ve yô, a lu ican i yan sha ci u aeren a ve a vihin la.
Ka i saan ve iyol u yan tar, ka a̱ lu tetan je kpaa. Mba er acan man il nahan hen atô wen, ka i maa ve iyol u tsughun ne sha atesen a aiegh,* zum u ka vea eren iniongo a ven imôngo la.
14 Ashe a ve iv a idya, shi mba fetyô u den isholibo ga, ka ve meen mba ve lu a taver ga la. Mba a ishima i̱ i tsaase i̱ sha u eren hua yô. Ka ônov mba lun a ifyan iyol.
15 Ve undu gbenda u jighilii la, nahan i tsume a ve. Ve dondo gbenda u Balam wan u Bior, u yange soo u ngohol injar i sha iferkwagh,
16 kpa i kôôm un sha ci u tindi na u peren la. Zendenya u tôôn ikyav* u a lamen ga ne, ôr kwagh sha ikyenge i orumace, nahan a yange profeti ne kera er kwagh u ibume la ga.
17 Mba er ka azôr a lun a mngerem ga, man iikpii i* ijeverahumbe i lu purugh a mi kera nahan, i ver angôghime u hemban cii sha ci ve.
18 Ka ve ôron uzegembaakaav mba gbiliniv. Ka ve meen mba ve sember osough sha ikyev i mba ve eren akaabo la sha asaren a ve a iyolough man sha u eren akaa a ndôhôrshima.*
19 Ka ve kaan a ve ér vea kera lu uikyangen ga, man yô ve ayol a ve gema mba ikpan i aeren a hôngorough; gadia aluer or hemba orgen yô, or shon nana hingir kpan u nan.*
20 Nahan aluer mfe u vough u sha kwagh u Ter man Oryiman Yesu Kristu la wase ve ve war hôngor u tar ne, kpa ve hide ve nyôr u eren akaa ne shi a ya tor ken a ve yô, mlu ve u masetyô una hemba vihin a u hiihii la.
21 Guda yange ma ve fa gbenda u vough u perapera la ga, a u ve fan kpa geman ijime a icighan tindi u yange i wa ve la.
22 Kwagh u injakwagh i mimi i kaa la kure sha a ve, ér: “Iwa sua shi hide ngi yan, ngô-igyo ôô iyol shi hide ngu viligh iyol shin angbiôr.”
Ngeren mba shin kpe
^ Shin “aeren a ve a dang.” Ka ishember i ken zwa Grika i i yer ér aselgeia (asejia) la, ngi ôron kwagh u ieren i môm tseegh ga. Nenge Ngeren u Pasen Asember.
^ Shin “una bunde ga.”
^ Nenge Ngeren u Pasen Asember.
^ Shin a fatyô u kaan ér, “haa ve shin ahungwa a wan ime.”
^ Shin “dang u.” Ka ishember i ken zwa Grika i i yer ér aselgeia (asejia) la. Nenge Ngeren u Pasen Asember.
^ Shin “uma.” Nenge Ngeren u Pasen Asember.
^ Nenge Ngeren u Pasen Asember.
^ Shin “been a ve kera.”
^ Nenge Ngeren u Pasen Asember.
^ Shin “sha u tesen icivir sha ishigh ki Yehova.”
^ Shin “sha atesen a aiegh je i gande.”
^ Ka, “jaki” je la.
^ Shin “abeen a.”
^ Shin “aeren a dang.” Ka ishember i ken zwa Grika i i yer ér aselgeia (asejia) la, ngi ôron kwagh u ieren i môm tseegh ga. Nenge Ngeren u Pasen Asember.
^ Shin “aluer kwagh hemba or tahav yô, nana hingir kpan u kwagh shon.”
