3 Yohane 1:1-14
1 Mo tamenor,* m ngu ngeren hen Gayu, or u doon mo ishima, a doom ishima sha mimi.
2 Orwam u doon mo ishima, m ngu eren msen mer ma u ze ikyura sha akaa cii shi ma i kpe u iyol, vough er u lu zan ikyura* hegen nahan.
3 Gadia yange m ember kpishi shighe u anmgbianev va er shiada ér u ngu dondon mimi shi u ngu zenden ken mimi her la.
4 Ka kwagh u ka a hemba nan mo iember* je ne: ka mea ungwa mer mbayev av mba zenden ken mimi her yô.
5 Orwam u doon mo ishima, u ngu tesen jighjigh u nan wou sha kwagh u u lu eren sha ci u anmgbianev la, shin er u vande fan ve ga nahan kpaa.
6 Ve er shiada sha ishigh ki tiônnongo sha kwagh u dooshima wou. Wea lumun yô, na ve gbenda er Aôndo a soo la.
7 Gadia ka sha ci u iti na ve dugh ye, shi ve ver ishima u ngohol ma kwagh hen ior mba ken akuraior agen ga.
8 Nahan gba keng u se ngohol ambaaior la sar sar, sha er se hingir mba eren tom ken mimi a ve imôngo yô.
9 Yange m nger tiônnongo wen washika, kpa Diotrefu u i hange un u lun orhemen hen atô wen la tese icivir sha kwagh môm u se ôr la ga.
10 Ka nahan ve, zum u me va yô, me pase ityom i a lu eren sha u samber a angereke sha kwagh wase* la ye. Kwagh ne kuma un ga, shi ka a venda u ngohol anmgbianev sha icivir; shi mba ve soo u ngohol ve la kpa, ka a nôngon ér una yange ve shi una zenda ve ken tiônnongo kera.
11 Orwam u doon mo ishima, de dondon ikyav i ifer ga, kpa dondo ikyav i dedoo. Or u nan eren kwagh u dedoo yô, nan ngu kwagh u Aôndo. Or u nan eren kwagh u ifer yô, nan nenge a Aôndo ga.
12 Ior cii er shiada u dedoo, kua mimi iyol na, sha kwagh u Demeteriu. Jighilii yô, se kpa se mba eren shiada sha kwagh na, man u fa er shiada u i er la a lu u mimi yô.
13 M ngu a akaa kpishi a ngeren we, kpa m soo mer me za hemen u ngeren we a sha pen man sha inki ga.
14 Nahan kpa, m ngu veren ishima mer ica a gba ga tsô me va nenge a we, se lam ishigh a ishigh.
Aôndo a̱ na u bem.
Azende a a lu heen ne nga sughun we. Sugh azende a a lu hen a we la sha ati ati, nam.
Ngeren mba shin kpe
^ Shin “ortamen.”
^ Shin “u lu zan ikyura ken uma wou.”
^ Shin a fatyô u kaan ér, “ka kwagh u ka m hemba sughun Aôndo sha mi.”
^ Zwa Grika, “lamen sha a vese côu côu.”
