Aerenakaa 10:1-48
10 Orgen lu ken Sesaria, i yilan un ér Korneliu. Lu orshoja u vesen* ken kweshojaa u Italia.*
2 Lu or u civir Aôndo sha gbashima shi cian Aôndo a ya na cii. Naan ior uiyua kpishi shi gbaan uwer u eren msen zamber Aôndo ga.
3 Ka va kom er ahwa atar atetan* nahan yô, i tese un wang ken mpase u sha mnenge, a nenge ortyom u Aôndo va nyôr hen a na, yila ér: “Korneliu!”
4 Korneliu lu kenger un, cier un iyol, a pine ér: “Ka nyi, Tere?” A kaa a na ér: “Mbamsen ou kôndo nyôr hen Aôndo, shi a nenge er u lu wasen mbaatsanev yô, nahan ngu umbur we.
5 Nahan yô, tindi ior ken Yopa ve za va a orgen, iti na ér Shimon, un u i yer ér Peteru la.
6 Or ne ka orvannya u Shimon, or u a eren tom u akôvanyam, ya na a lu shin kpe zegemnger la.”
7 Ortyom u ôr kwagh a na la yemen a yem nahan maa, Korneliu yila mbatomov nav uhar, kua orshoja ugen u civir Aôndo sha gbashima, ken mba ve luun vea na hanma shighe la,
8 a ôr ve hanma kwagh, maa a tindi ve ken Yopa.
9 Mba ker ken sev mbugen yô, ve za hemen a zende ve, mba va zurum a gar yô, Peteru di gema unde sha ityough ki iyoughough er ahwa 12 atetan* nahan, lu eren msen.
10 Kpa ijen va kôr un kpishi, nahan soo u yan kwagh. Mba ngur eren kwaghyan yô, va er un sha ishi cing,
11 maa a nenge i bugh sha, kwagh lu senen er ka zege bamberkyondo nahan, i kôr un sha azongo a na anyiin, i lu senen a mi shin tar.
12 Ishôso atô kposo kposo lu shimi; i lun angahar anyiin man i kpelan a kpela inya, kua inyon i purugh.
13 Tsô a ungwa i kaa a na ér: “Mough sha Peteru, sôngo ya!”
14 Kpa Peteru gema kaa ér: “Nahan ga, Tere, gadia i gbe je kpa m ngu a ya ma kwagh u hôngorough man u a lu wang ga ze.”
15 Tsô shi a ungwa i ôr a na sha kwa har ér: “De u yilan kwagh u Aôndo a wanger un la wer kwagh u hôngorough.”
16 Kwagh ne eren nahan sha kwa tar yô, maa fese je i hide i yem a mi sha.
17 Ka gbe taver Peteru u kaven inja i kwagh u nenge a mi ken mpase u sha mnenge ne yô, ior mba Korneliu tindi ve la pine i tese ve ya u Shimon ve va tile sha hundaya.
18 Ve yila ve pine sha u vea fa a lu her Shimon, u i yilan un ér Peteru la a lu tsan yô.
19 Er Peteru lu henen sha kwagh u mpase u sha mnenge shon her la je, jijingi kaa a na ér: “Nenge! Iorov utar mba pinen we.
20 Yô, mough sha, hungwa yem vea ve, de te akperan ga, sha ci u ka mo m tindi ve ye.”
21 Tsô Peteru hungwa va kohol ior mbara, kaa a ve ér: “M ngun, mo u ne lu keren ne. Ka nyi ne ve heene?”
22 Ve kaa ér: “Korneliu, orshoja u vesen, ka orperapera u cian Aôndo, u i eren shiada u dedoo sha a na ken tar u Mbayuda cii yô. Aôndo yange tindi icighan ortyom hen a na, va ôr un ér a tindi i kaa u we u za hen ya na, nahan a̱ ungwa kwagh u i gbe u u ôr un la.”
23 Tsô a ngohol ve, ve tsa her vea na.
Sev mbu aven yô, a mough a yem vea ve, anmgbianev mbagenev ken Yopa za a na imôngo.
24 Kpernan maa za nyôr ken Sesaria. Korneliu lu veren ashe a ve, shi yila anmgbianev nav man azende a na a sôngo sôngo cii va kohol imôngo.
25 Peteru va nyer yô, Korneliu mough za kegh un gbenda, gba hen angahar a na, civir un.
26 Kpa Peteru kôr un, kaa ér: “Mough sha; mo kpa m ngu di or tsô, er we nahan.”
27 Ngur lamen vea na yô, a za nyôr a nenge ior kpishi har gbir gbir.
28 A kaa a ve ér: “Ne fa dedoo er tindi a yange Oryuda u lun vea or u ken ikyurior igen, shin van hen a nan yô. Nahan kpa, Aôndo tesem ér m de yer ma or mer ka or u hôngorough shin or u wang ga ze.
29 Nahan zum u i tindi ér m va yô, m venda ga, m va. Yô, kaam nen ase ityôkyaa i ne tindi ner m va la.”
30 Nahan Korneliu kaa ér: “Yange m lu eren msen hen ya wam er ahwa atar atetan nahan,* hii shighe la va nyôr hen ihwa ne, ka ayange anyiin je ne. Nahan ica gbe ga yô, orgen va tile sha ishigh yagh, hua akondo a mondon iyol;
31 a kaa a mo ér: ‘Korneliu, i ungwa msen wou, shi Aôndo ngu umbur uiyua ou mba u ne mbaatsanev la.
32 Nahan yô, tindi ken Yopa i za kaa Shimon u i yilan un ér Peteru la, a va. Ka orvannya hen ya u Shimon, or u a eren tom u akôvanyam, ya na a lu shin kpe zegemnger la.’
33 Maa fese je m tindi mer i za kaa u va, nahan u er doo kpishi er u ve heen yô. Hegen ne, se cii se mba sha ishigh ki Aôndo sha u se ungwa akaa a Yehova* a kaa u ér u ôr la cica cii.”
34 Peteru ongo kwagh ne yô, a gba ôron kwagh, a kaa ér: “Hegen yô m fa, mimi je Aôndo sangen a sange ga,
35 kpa ken hanma ikyurior cii, or u nan cie un shi nan eren kwagh u vough yô, una lumun nan.
36 A tindi loho hen ônov mba Iserael sha u ôron ve loho u dedoo sha kwagh u bem u una va sha ikyev i Yesu Kristu la—ér un shon ne ka Ter u ior cii.
37 Ne fa kwagh u i ôr kwagh a mi ken Yudia cii, hii ken Galilia je, zum u Yohane pase kwagh u batisema kar kera la:
38 ka kwagh u Yesu, or u due ken Nasareti, u Aôndo tsegha un sha icighan jijingi shi na un tahav la. Yange zende ken tar la cii, lu eren akaa a dedoo, been mba Diabolo lu nzughul a ve la cii iangev, sha ci u Aôndo lu a na.
39 Se mba mbashiada sha akaa a yange er ken Tar u Mbayuda kua ken Yerusalem la cii; kpa ve wua un sha u manden un sha kon.
40 Aôndo yange nder un shon ne shin ku sha iyange i sha utar la ér ior ve nenge a na,
41 i de lu ior cii ga, kpa i lu mbashiada mba Aôndo vande tsuan veren yô, ka se je la, se mba yange se ya kwagh shi se ma kwagh vea na imôngo zum u nder shin ku kera la.
42 Shi yange tindi se ér se pase ior kwagh shi se er shiada vighe vighe, er i lu un Aôndo yange tsua ér a lu orjir u mbaumav man mbakpenev yô.
43 Uprofeti cii er shiada sha kwagh na, ér hanma or u nan ne un jighjigh cii yô, a de nan asorabo a nan ken iti na.”
44 Er Peteru lu lamen sha akaa ne zan a mi ave la je, icighan jijingi sen sha mba ve lu ungwan kwaghôron na la cii.
45 Nahan mbananjighjigh mba i tsôngo ve,* mba ve va vea Peteru imôngo la cii kpiligh ve iyol, er ior mba ken akuraior agen kpa i ne ve iyua i icighan jijingi yô.
46 Gadia ve ungwa ve lu lamen ijô igen* shi wuese Aôndo. Nahan Peteru kaa ér:
47 “Mban ngohol icighan jijingi er se nahan, yô ka an je nana kaa ér a fatyô u eren ve batisema sha mnger ga?”
48 Maa a na zwa ér i er ve batisema ken iti i Yesu Kristu. Nahan ve kaa a na ér a tsa vea ve anyangem kpuaa.
Ngeren mba shin kpe
^ Shin “orshoja u hemen ushoja 100.”
^ Shin “kweshojaa u Mbaroma u lun a ushoja 600.”
^ Zwa Grika, “er ihwa i sha utaankarunyiin nahan.” Yange i hii u ôron ahwa ne pepe shighe u iyange ka i hii u duen la.
^ Zwa Grika, “er ihwa i sha ataratar nahan.”
^ Zwa Grika, “er ihwa i sha utaankarunyiin nahan.”
^ Nenge Ngeren u Pasen Asember.
^ Shin “mbajighjigh.”
^ Zwa Grika, “ve lu lamen ijô.”
