Aerenakaa 11:1-30
11 Hen shighe ne, mbaapostoli kua anmgbianev mba ken Yudia ungwa ér ior mba ken akuraior kpa ngohol loho u Aôndo.
2 Nahan Peteru ve ken Yerusalem yô, mba ve lu dondon tindi u icôngo her la gba zôhôn a na*
3 kaan ér: “U yem hen ya u ior mba i tsôngo ve ga la u za ya kwagh a ve imôngo.”
4 Tsô Peteru gba pasen ve kwagh shon vighe vighe, kaan ér:
5 “Yange m lu hen gar u Yopa m lu eren msen, nahan va erem sha ishi cing, maa m nenge kwagh lu senen er ka zege bamberkyondo nahan, ken mpase u sha mnenge, i kôr un sha azongo na anyiin i lu senen a mi shin tar, i sen a mi zan zan va ar ape m lu la jigh jigh.
6 M kenger shimi tsembelee yô, m nenge ishôso i shin tar i lun angahar anyiin lu shimi, inyamkyume man ishôso i kpelan a kpela inya, kua inyon i purugh kpaa.
7 Shi m ungwa i ôr kwagh a mo ér: ‘Mough sha Peteru, sôngo ya!’
8 Kpa m kaa mer: ‘Nahan ga, Tere, gadia i gbe je kpa m ngu a wa ma kwagh u hôngorough man u a lu wang ga ken zwa wam ga.’
9 Tsô shi m ungwa imo due sha ôr a mo sha kwa har ér: ‘De u yilan kwagh u Aôndo a wanger un la wer kwagh u hôngorough.’
10 Kwagh ne eren nahan sha kwa tar yô, maa fese je i urugh i hide i yem a mi sha.
11 Shi hen shighe shon la je, nomsombaiorov mbagenev utar va tile hen ya u m lu tsan her la, lu ken Sesaria je i tindi ve hen a mo ye.
12 Nahan jijingi kaa a mo ér m yem vea ve, m de te akperan cuku kpaa ga. Anmgbianev mba ataratar mban kpa yem vea mo, se za nyôr hen ya u or la.
13 “A pase se ér yange un nenge ortyom tile hen ya na kaa a na ér: ‘Tindi ior ken Yopa ve za kaa Shimon u i yilan un ér Peteru la, a va.
14 Una pase u gbenda u a yima u kua ya wou cii yô.’
15 Kpa m hiin u lamen a ve yô, icighan jijingi sen sha a ve, vough er se kpa yange sen sha a vese sha hiihii la nahan.
16 Maa m umbur kwagh u Ter yange a ôron la, ér: ‘Yohane er ior batisema sha mnger, kpa ne yô, a er ne batisema sha icighan jijingi.’
17 Nahan, aluer Aôndo na ve iyua shon i a ne se mba se ne Ter Yesu Kristu jighjigh ne yô, mo m ngu di nyi je ve yange ma m fatyô u vendan a Aôndo?”
18 Mba ongo akaa ne yô, ve de u hendan a na,* ve wuese Aôndo, ve kaa ér: “Inja na yô, ior mba ken akuraior agen kpa Aôndo wase ve sha u ve̱ gema asema, ve̱ zua a uma.”
19 Tsô mba yange ve sambe shighe u i mough u tôvon ve a ican, zum u i wua Sefanu kera la, yem ajiir a icaa za ar ken Finishia man Shiperu kua Antiôki, kpa ve pase loho u Aôndo hen Mbayuda tseegh.
20 Nahan kpa, ior mbagenev ken a ve mough ken Shiperu man Shirene va hen Antiôki, gba va pasen mba lamen zwa Grika kwagh, yôôn loho u dedoo u Ter Yesu.
21 Heela tseegh ga, uwegh ku Yehova* lu a ve, nahan ior kpishi na jighjigh, hide hen Ter.
22 Ibaver i sha kwagh ve va gba tiônnongo* u ken Yerusalem la ken ato, nahan ve tindi Banaba ken Antiôki.
23 Za nyer yô, a nenge a erdoo u Aôndo a tese ve sha mhôôn la, nahan saan un iyol, a gba taver ve cii asema ér ve za hemen u dondon Ter a ishima i môm;
24 gadia lu or u fan kwagh, shi iv a icighan jijingi shi lu a jighjigh u nan taveraa. Tsô ingyegh ki mba ve na Ter jighjigh la seer kpishi.
25 Nahan a yem ken Tarsu a za ker Saulu sha gbashima.
26 Za zough a na yô, a va a na hen Antiôki, ve va lu her zan zan inyom jimin, ve lu kohol a ve imôngo ken tiônnongo, tesen ikpelaior i vesen la, shi lu hen Antiôki Aôndo na i hii u yilan mbahenen ér Mbakristu ye.
27 Sha ayange la, uprofeti mough ken Yerusalem va ken Antiôki.
28 Ugen ken a ve i yilan un ér Agabu. Yange mough tile sha tsenga ôron kwagh sha iwasen i jijingi, ér ica a kera gba ga tsô zegejen ia gba sha tar cii, shi kwagh ne va er nahan mimi, sha shighe u Kalodio la.
29 Nahan hanma orhenen kange ishima ér nana nôngo er nan fetyô la cii, nana tindi a iwasen hen* anmgbianev mba ve lu ken Yudia la;
30 shi yange ve er kwagh ne, ve lu tindin a mi hen mbatamen sha ikyev i Banaba man Saulu.
Ngeren mba shin kpe
^ Shin “puun un.”
^ Zwa Grika, “ve de ving.”
^ Nenge Ngeren u Pasen Asember.
^ Nenge Ngeren u Pasen Asember.
^ Shin “nana er kwagh u wasen.”
