Aerenakaa 12:1-25
12 Shighe la, Tor Herode hii u nzughul a mbagenev ken tiônnongo.*
2 Yange wua Yakobu, anmgbian u Yohane sha sanker.
3 Nengen ér kwagh la doo Mbayuda yô, shi a kôr Peteru. (Kwagh ne er ken atô u ayange a i lu yan Beredi u I We Kwa sha Mi Ga la.)
4 Yange kôr un wuhe ken purusu, wa un sha ikyev i ikwe i mbakuran inyiin ér ve kura un; ikwe ne lu ushoja unyiin unyiin, kwe môm u kura un, ua kurun yô, ugen shi u yar. Lu wan ishima ér Paseka una karen kera yô, una va a na sha ishigh ki ior.*
5 Nahan Peteru lu ken purusu, kpa tiônnongo gema lu eren msen hen Aôndo sha ci na kpoghuloo.
6 Hen tugh mbu lu u sev a av ve Herode una va a Peteru sha ishigh ki ior la, Peteru lu yaven hen atô u ushoja uhar, i ta un mshirim mhar, keen man keen, shi mbakuran mbagenev lu hen hunda, lu kuran purusu.
7 Kpa ortyom u Yehova* gema tile her, nahan iwanger ta ken purusu hen ape Peteru lu la. Ortyom la maa kpoghor Peteru hen imbusu, nder un, kaa ér: “Mough sha fele!” Maa mshirim mara sagh un sha ave haa inya.
8 Ortyom la kaa a na ér: “Hua ikyondo* shi wa akôv a ou.”* A er nahan. Maa a kaa a na ér: “Haa akondo a ou iyol, dondo sha a mo.”
9 Nahan a due a dondo sha a na, kpa gema lu un er kwagh u lu eren sha ikyev i ortyom la lu eren kpôô kpôô ga nahan. Jighilii yô, lu un er ka mpase u sha mnenge un lu nengen a mi nahan.
10 Ve za kar mbakuran mba hiihii man mba sha uhar, mba za aren sha hunda u iyôô, u masen duen her gban ken won la yô, hunda shon bugh iyol i u sha u ve due. Mba dugh yô, ve sen sha godobi ugen. Ica i gbe ga yô, ortyom la undu un yem.
11 Peteru kaven kwagh u lu zan hemen ne yô, a kaa ér: “Hegen yô m fa dedoo, Yehova tindi ortyom na va yimam sha ikyev i Herode man hanma kwagh u Mbayuda ve ver ashe ér una za hemen la cii.”
12 Kaven nahan yô, a kar a yem hen ya u Maria, ngô u Yohane u i yilan ér Marku la, mbagenev kpishi kohol her lu eren msen.
13 Manden uwegh sha hundaya yô, wankwase u shiren tom hen ya la, i yilan un ér Roda, za sha u una fa or u nan lu sha hunda la.
14 Kaven ikyenge i Peteru yô, saan un iyol je yô, a kera bugh hundaya ga, kpa a yevese a hide a za nyôr ken iyou a ôr er Peteru a til sha hunda yô.
15 Ve kaa a na ér: “U ngu hunden.” Kpa a zer kaan ér ka un. Tsô ve gba kaan ér: “Ka ortyom na.”
16 Kpa Peteru lu manden uwegh her. Mba va bughun hunda yô, ve nenge a na, nahan kpiligh ve iyol tsung.
17 Kpa a kure ve uwegh ér ve huan ving. Pasen ve vighe vighe er Yehova* a due a na ken purusu kera yô, a kaa ér: “Ôr nen Yakobu man anmgbianev akaa ne.” Maa a due a yem hen ijiir igen.
18 Sev mbu aven yô, nzughul ushoja mbara kpishi, ve lu fan kwagh u Peteru ga.
19 Herode ker un kpoghuloo, zough a na ga yô, a tôv mbakuran mbara shi a na zwa ér i yem a ve i za tsaha; maa a mough hen Yudia a yem shin Sesaria, a za lu her shighe wa karen.
20 Shighe ugen la, ishima vihi un a ior i Tiru man Shidon. Nahan ve va hen a na a awashima môm, ve va lam a Belasetu, or u nengen sha ya u tor la, mba been kera yô, ve ker u himen iyongo a tor, sha ci u tar ve zuan a kwaghyan ken tar u tor.
21 Nahan sha iyange i i ver la, Herode wuha iyol i tor tema sha ikyônough ki ijirigh gba lamen a ve.
22 Nahan ior mba ve kohol her la gba ôron genger genger ér: “Ka imo i aôndo jim, ka i or ga!”
23 Her ave ave je ortyom u Yehova* tsaha un, sha ci u a na Aôndo icivir la ga, nahan azôô ya un, a kpe.
24 Kpa loho u Yehova* za hemen u samber shi iyenge i mbananjighjigh lu seer a seer.
25 Banaba man Saulu di yange mba eren tom u nan ior iwasen ken Yerusalem mba been yô, ve hide ve yem, ve kua a Yohane u i yilan ér Marku la, ve yem a na.
Ngeren mba shin kpe
^ Nenge Ngeren u Pasen Asember.
^ Shin “una due a na una ôr un ijir.”
^ Nenge Ngeren u Pasen Asember.
^ Shin “wa iyol; kange iyol.”
^ Shin “wa sanda wou.”
^ Nenge Ngeren u Pasen Asember.
^ Nenge Ngeren u Pasen Asember.
^ Nenge Ngeren u Pasen Asember.
