Aerenakaa 13:1-52
13 Nahan uprofeti kua mbatesen mbagenev lu ken tiônnongo* u ken Antiôki la, ve yô, lu Banaba man Shimeon, u i yilan un ér Il-or* la, man Lushôôsu, or u ken Shirene, man Menian, u yange za makeranta vea Herode, ityoor u Galilia imôngo la, kua Saulu.
2 Zum u ve lu civir Yehova* shi hôron kwaghyan yô, icighan jijingi kaa ér: “Verem nen Banaba man Saulu ve er tom u m tsough ve mer ve er yô.”
3 Nahan mba hôron kwaghyan shi mba eren msen mba been kera yô, ve penda ve ave iyol, maa ve na ve gbenda.
4 Tsô nomsombaiorov mba icighan jijingi tindi ve ne sen shin Selushia, ve za mough her ve nyôr tso ve yem ken Shiperu.
5 Mba za nyer ken Salami yô, ve gba yôôn loho u Aôndo ken ushinagoge mba Mbayuda. Yohane kpa lu vea ve.*
6 Ve zende sha ajiir a ken icile la cii, zan zan ve ar hen Pafo kpaa, tsô ve zua a Oryuda ugen, i yilan un ér Bar-Yesu, lu orahir shi lu profeti u aiegh.
7 Lu vea gomna Serjiu Paulu, u lu orfankwagh la, imôngo. Serjiu Paulu yila Banaba man Saulu ve va hen a na, sha ci u sar un tsung u ungwan loho u Aôndo.
8 Kpa or shon u i yilan un ér Elima (inja na yô ér orahir) la, gba hendan a ve, nôngon ér gomna a de ne jighjigh ga.
9 Tsô er Saulu, u i yer un ér Paulu la iv a icighan jijingi yô, a bon ashe sha a na
10 a kaa ér: “Kpash! We or u u iv a hanma inja i anyighe man hanma inja ifer ne; we wan u Diabolo, we orhyom u hanma kwagh u perapera ne, ú de u nzughul a igbenda i Yehova* i i lu jighilii la ga ka nyi?
11 Yô nenge! Yehova* una tsaha u, u pir ashe, u kera nenge a iwanger i iyange ga shighe a kar.” Her ave ave je, er un ken ashe cing, maa ime wa un, a gba peven keren or u nana kôr un sha uwe nana yem a na yô.
12 Er gomna nenge kwagh u er ne yô, a na jighjigh, sha ci u kpiligh un iyol a ityesen i Yehova.*
13 Tsô Paulu kua mba ve lu vea na la nyôr tso hen Pafo, ve va hen Perga, ken Pamfilia. Kpa Yohane undu ve her, hide ken Yerusalem.
14 Nahan kpa, ve mough hen Perga ve va ken Antiôki, ken Pisidia. Ve za nyôr ken shinagoge sha Iyange i Memen, ve tema inya.
15 Mba er ken Atindi kua Uprofeti* kera yô, mbahemenev mba shinagoge la tindi ér i kaa ve ér: “Anmgbianev, nea lu a ma kwagh u ne ôr sha u taver ior asema yô, ôr nen.”
16 Nahan Paulu mough tile sha, kure ve uwegh, maa kaa ér:
“Ne ior i Iserael kua ne mbagenev mba ne cie Aôndo yô, kegh nen ato.
17 Aôndo u Mbaiserael mban yange tsua uter asev mba tsev, shi kende a ior mban sha shighe u ve lu ushirmbaiorov ken tar u Igipiti la, shi va due a ve ken u kera sha uwegh ku ageegh.
18 Nahan a wa ishima a ve ken taaikyôngo zan zan kuma er anyom 40 nahan.
19 Timin akuraior ataankarahar ken tar u Kanaan kera yô, a gema tar ve a na uter asev mba tsev dyako.
20 Kwagh ne cii er ken atô u anyom a kuman er 450 nahan.
“Ka been kera yô, a na ve mbaajiriv zan zan va ar sha Samuel, u lu profeti la.
21 Kpa hii shighe la je, ve sôn tor, nahan Aôndo na ve Saulu, wan u Kishi, or u ken ipyaven i Benyamin, tema tor sha a ve anyom 40.
22 Va dughun un tor kera yô, a tsua Davidi ér a lu Tor ve; a er shiada sha kwagh na, a kaa ér: ‘M nenge Davidi wan u Yese ka or u sha ishima yam; una er akaa a a sarem la cii.’
23 Aôndo va tsua oryiman, Yesu, ken ônov mba* or ne, na Iserael, er vande tôndon zwa nahan.
24 Cii man un shon la a̱ va yô, Yohane vande pasen ior i Iserael cii ér gba u vea er batisema sha u tesen ikyav ér ve gema asema.
25 Kpa er va zurum u Yohane una kure tom na la, lu ôron ér: ‘Ne nenge ner m ngu ana? Ka mo un ne ga. Kpa nenge! Orgen ngu van mo ken ijime. M kuma u saghen un ikyor i akôvough* shin angahar ga.’
26 “Anmgbianev, ne ônov mba Aberaham kua mbagenev ken a ven mba ve cie Aôndo la, i tindi a loho u myom ne hen a vese.
27 Gadia ior mba ken Yerusalem kua mbahemenev vev fa un shon ne ga, kpa zum u ve lu ôron un ijir la, ve kure akaaôron a Uprofeti, a ka i ôron genger genger sha hanma Iyange i Memen la.
28 Er ve zua a ityôkyaa i wuan un ga nahan kpa, ve sendegh ér Pilatu a wua un.
29 Yange mba eren akaa a i nger sha kwagh na la cica cii yô, ve hungwa a na sha kon kera, ve za ii un ken uwar.
30 Kpa Aôndo nder un shin ku,
31 nahan a ande hen mba ve mough ken Galilia vea na ve yem sha Yerusalem la, ken atô u ayange imôngo. Mban mba eren un shiada hen ior hegen.
32 “Nahan se mba yôôn loho u dedoo u sha kwagh u ityendezwa i yange i er a uter mba tsev la hen a ven.
33 Aôndo er hanma kwagh u yange tôndo zwa la a vese, se ônov vev, sha u nderen Yesu shin ku, vough er i nger ken pasalami u sha uhar la nahan, ér: ‘U ngu wan wam; nyian ne, m hingir teru.’
34 Shi er mimi je A nder un shin ku, i lu u mayange una kera hide a lu a iyol i hôôn ga la kpa, A ôr kwagh la nahan, ér: ‘Me na ne averen a yange m tôndo zwa a Davidi sha erdoo wam la, ityendezwa ne ka i mimi.’*
35 Shi i ôr ken pasalami ugen kpaa ér: ‘Ú de wer u a civir we sha mimi a̱ hôô ga.’
36 Nahan kpa, Davidi yange er ishima i Aôndo sha ayange a a lu uma la cii, va kpe, i ii un a uter nav mba tsev imôngo, shi hôô.
37 Kpa un u Aôndo nder un shin ku la yô, yange hôô ga.
38 “Sha nahan yô, anmgbianev, fa nen ner ka un shon ne je i lu yôôn hen a ven ér mba den ior asorabo ken iti na ye.
39 Shi akaa a i fetyô u nan ne ishô sha mi ken Atindi a Mose ga la cii, hanma or u nan ne un shon ne jighjigh yô, ka i na nan ishô.
40 Yô, wa nen ikyo sha er kwagh u i ôr ken Uprofeti la una er ne ga yô, ér:
41 ‘Gema nenge nen, ne mbanahantar, i kpiligh ne iyol, shi tim nen, gadia m ngu eren tom sha ayange a en, ka tom u mayange je ne na jighjigh a u ga yô, shin aluer ma or pase ne u vighe vighe je kpaa.’”
42 Tsô mba ngur duen yô, ve zamber a ve ér ve va lam sha akaa ne sha Iyange i Memen i sha.
43 Mba dugh mkombo ken shinagoge kera yô, Mbayuda kpishi kua mba ve nyôr ve a nyôr, ve lu civir Aôndo la, dondo Paulu kua Banaba ijime. Mban di, Paulu man Banaba lu lamen a ve, taver ve ishima ér ve za hemen u eren akaa a Aôndo una tese ve erdoo na u sha mhôôn la yô.
44 Shi ka va nyer sha Iyange i Memen yô, ior mba ken gar la zua, hanma or nôngo u van, sha u va ungwan kwaghôron u Yehova.*
45 Mbayuda mba nengen a ikpelaior la yô, ve mough a iyuhwe ken ishima poo, ve gba nyiman shi lahan akaa a Paulu lu ôron la.
46 Tsô Paulu man Banaba ôr a ve gbar gbar ér: “Yange gba u a vande pasen loho u Aôndo hen a ven keng. Kpa er ne lu vendan u shi ne ayol a en ne lu tesen ner ne kuma u zuan a uma u tsôron ga yô, nenge! ka u se yem hen akuraior agen je ne.
47 Gadia Yehova* ôr a vese ken mkaanem man nahan ér: ‘M tsua ne mer lu nen iwanger i akuraior agen, sha er ne za a myom ken akighir a tar yô.’”
48 Ior mba ken akuraior agen la mba ongo kwagh ne yô, ve gba ember shi wuese kwaghôron u Yehova,* shi mba ve lu a ishima i mimi i zuan a uma u tsôron la cii na jighjigh.
49 Heela tseegh ga, i lu samber a loho u Yehova* sha ajiir a ken tar la cii.
50 Kpa Mbayuda tor kasev mba duen ati mba ve cian Aôndo la asema, kua mbavesen mba ken gar la, nahan mban gema na i mough u tôvon Paulu man Banaba a ican, i zenda ve ve due hen haregh ve kera.
51 Nahan ve kure ihyundu i shin angahar a ve, sha u i lu shiada hen a ve, maa ve yem ken Ikonium.
52 Kpa mbahenen mbara iv a icighan jijingi man iember her.
Ngeren mba shin kpe
^ Nenge Ngeren u Pasen Asember.
^ Zwa Grika, “Naija.”
^ Nenge Ngeren u Pasen Asember.
^ Shin “lu wasen ve.”
^ Nenge Ngeren u Pasen Asember.
^ Nenge Ngeren u Pasen Asember.
^ Nenge Ngeren u Pasen Asember.
^ “Atindi kua Uprofeti” ka Ruamabera u ken Zwa Heberu la jimin cii.
^ Zwa Grika, “vor u.”
^ Shin “sanda.”
^ Shin “ia kure keng a bunde ga.”
^ Nenge Ngeren u Pasen Asember.
^ Nenge Ngeren u Pasen Asember.
^ Nenge Ngeren u Pasen Asember.
^ Nenge Ngeren u Pasen Asember.
