Aerenakaa 15:1-41
15 Tsô ior mbagenev mough ken Yudia sen gba va tesen anmgbianev kaan ér: “Saa a tsôngo ne er Mose yange tese nahan, gayô a fatyô u yiman ne ga.”
2 Kpa Paulu man Banaba mba hendan a ve shi mba nyiman kwagh a ve kpoghuloo kera yô, i er mhen ér Paulu man Banaba kua mbagenev ve za a ikyaa* ne hen mbaapostoli man mbatamen mba sha Yerusalem.
3 Tiônnongo* la ver ve gbenda daalaa, maa ve za hemen a zende ve, ve kar ken Finishia man Samaria, ve lu ôron vighe vighe er ior mba ken akuraior agen ve gem asema yô, nahan kwagh la va anmgbianev cii a msaanyol kpishi.
4 Mba za nyer ken Yerusalem yô, tiônnongo la man mbaapostoli kua mbatamen ngohol ve sar sar, shi ve ôr akaa kpishi a Aôndo a er sha ikyev ve la.
5 Kpa mbagenev ken annongo u Mbafarishi mba ve na jighjigh la mough tile sha kaa ér: “Gba u a tsôngo ve keng, shi a ôr ve er i gbe u vea kura Atindi a Mose yô.”
6 Tsô mbaapostoli man mbatamen tema sha u nengen sha ikyaa ne.
7 Mba lamen* sha kwagh shon kpoghuloo yô, Peteru mough sha kaa a ve ér: “Anmgbianev, ne fa dedoo er sha hiihii la je Aôndo tsuam ken a ven ér ior mba ken akuraior ve ungwa loho u dedoo sha zwa wam, ve na jighjigh yô.
8 Nahan, Aôndo u a fe ishima i or la, er shiada sha u nan ve icighan jijingi, vough er se kpa a ne se nahan.
9 Shi cuku tsô kpa a nenge se kposo a ve ga, kpa a wanger asema a ve sha jighjigh u ve ne la.
10 Nahan er nan hegen ne karen Aôndo sha u kighir mbahenen ner ve tôô igbur i uter asev mba tsev shin se kpaa, yange se fatyô u tôôn ga laa?
11 Kpa se mba a jighjigh u nan ser i yima se sha erdoo u sha mhôôn u Ter Yesu la, vough er ve nahan.”
12 Ôron nahan yô, mba ve kohol imôngo la cii huan ving, maa ve kegh ato, Banaba man Paulu ôr ve uivande kpishi kua akaa a kpilighyol a Aôndo er sha ikyev ve ken akuraior agen la.
13 Mba kur kwaghôron yô, Yakobu gema kaa ér: “Anmgbianev, kegh nen ato a mo.
14 Shimeon pase vighe vighe er hegen Aôndo a lumun akuraior agen, sha u una kohol ior ken a ve mba vea yilan sha iti na yô.
15 Shi akaaôron a Uprofeti lumun a kwagh ne, vough er i nger nahan, ér:
16 ‘Ken masejime yô, me hide me va maa iyou* i Davidi i i yôhôr la; me hide me maa ajiir a a hembe la, me sôr i,
17 sha er ior mba vea shi her la vea ker Yehova* sha mimi, ve kua ior mba ken akuraior cii, mba i yer ve sha iti yam yô, kape Yehova* a kaa la, un shon u a lu eren akaa ne,
18 a ngise je tsua u eren la.’
19 Sha nahan yô, m nenge mer se za nen ior mba ken akuraior mba ve lu geman asema hen Aôndo la iyol ga,
20 kpa se nger nen ve washika se kaa nen ve ve̱ nyagh akaa a i hôngor a mi sha akombo* yô, kua idya,* man kwagh u i senge a sôngo ga* yô, kua awambe.
21 Gadia hii sha ashighe a tsuaa la je, Mose lu a mbaôron kwagh na ken hanma gar, sha ci u mba er ruamabera na ken ushinagoge sha hanma iyange i memen.”
22 Tsô mbaapostoli man mbatamen vea tiônnongo jimin cii lumun ér vea tindi mbagen ken a ve mba i tsough ve la ken Antiôki, vea Paulu man Banaba imôngo; nahan ve tindi Yuda u i yilan ér Barseba la, kua Shila, mba ve lu mbahemenev ken anmgbianev yô.
23 Ve nger kwagh ne ve tindi a mi sha ikyev ve, ér:
“Mbaapostoli man mbatamen, anmgbianev enev, hen anmgbianev mba ken Antiôki, man Shiria kua Shilishia, mba ve lu ken akuraior la: Se mba sughun ne!
24 Se ungwa ser ior mbagenev ken a vese mough za ôr ne akaa a a ve ne a zayol yô, mba nôngon ér vea dan ne asema, kpa lu se se kaa ser ve er nahan ga.
25 Nahan se gba zwa môm ser se tsua ior se tindi hen a ven, ve za vea Banaba man Paulu, anmgbianev mba doon se ishima
26 mba ve ne uma ve sha ci u iti i Ter wase Yesu Kristu ne.
27 Sha nahan yô, se mba tindin Yuda man Shila, sha er ve kpa vea ôr ne akaa ne sha zwa yô.
28 Gadia icighan jijingi kua se ayol a ase se nenge doo u se kera seer ne ikyav ga, saa akaa a i gbe u ne er keng ne tseegh:
29 Za nen hemen u nyaghen akaa a i senge sha ci u akombo yô, kua awambe man akaa a i senge a sôngo ga* yô, man idya.* Aluer ne ver ishima ne kura ayol a en sha akaa ne yô, ne za ikyura. Lu nen dedoo!”*
30 Nahan mba ne ior mban gbenda kera yô, ve sen shin Antiôki, ve za kohol nongo la cii imôngo, ve na ve washika la.
31 Mba ôron washika la yô, ve ember er i taver ve ishima yô.
32 Er Yuda man Shila kpa lu uprofeti yô, ve ôr anmgbianev mbara akaa kpishi a taver ve ishima shi ve wase ve u seer lun a jighjigh u nan.
33 Mba tse her ayange nga kar yô, anmgbianev mbara na ve gbenda bem bem, ér ve yem hen mba ve tindi ve la.
34 *——
35 Kpa Paulu vea Banaba lu ken Antiôki, ve lu tesen shi pasen loho u dedoo u mkaanem ma Yehova* vea mbagenev kpishi.
36 Ayange nga kar yô, Paulu kaa a Banaba ér: “Hegen* se hide se za sôr anmgbianev hen hanma gar ken agar a yange se yôô loho u Yehova* her la cii, se nenge er ve lu yô.”
37 Banaba kange ishima ér una za vea Yohane, u i yilan ér Marku la imôngo.
38 Kpa Paulu gema soo ér a̱ za a ve imôngo ga, sha ci u yange za undu ve ken Pamfilia, kera za tom a ve imôngo ga.
39 Kwagh ne na yô, asema vihi ve, ve zôhô zwa, maa ve pav zende; Banaba mough vea Marku ve nyôr tso, ve yem ken Shiperu.
40 Paulu di tsua Shila, anmgbianev mba eren msen ér Yehova* a tese Paulu erdoo na u sha mhôôn la, mba been kera yô, a mough vea na ve yem.
41 A kar ken Shiria man Shilishia, lu taver atôônanongo asema.
Ngeren mba shin kpe
^ Shin “zayol.”
^ Nenge Ngeren u Pasen Asember.
^ Shin “mba gbe anyiman.”
^ Shin “tenti; ityumbe.”
^ Nenge Ngeren u Pasen Asember.
^ Nenge Ngeren u Pasen Asember.
^ Shin “kwagh u i sôngo awambe a dugh kera ga.”
^ Zwa Grika, porneia (ponia). Nenge Ngeren u Pasen Asember.
^ Shin “ieev.”
^ Shin “kwagh u i sôngo awambe a dugh kera ga.”
^ Zwa Grika, porneia (ponia). Nenge Ngeren u Pasen Asember.
^ Shin “I̱ kpe ne iyol.”
^ Ivur ne ngi ken uruamabera mba tsuaa mbagenev mba yange i hii ngeren sha ave la ga, nahan kwagh ne tese ér ka mkaanem ma ken Ruamabera u Aôndo yange na i nger la ga.
^ Nenge Ngeren u Pasen Asember.
^ Shin a fatyô u kaan ér, “Se nôngo sha afatyô wase cii.”
^ Nenge Ngeren u Pasen Asember.
^ Nenge Ngeren u Pasen Asember.
