Aerenakaa 18:1-28
18 Tsô a mough hen Atene a va ken Korinte,
2 a va zua a Oryuda ugen u i mar un ken Ponti yô, i yilan un ér Akwila. Or ne sember moughon ken Italia vea kwase na Prisila, sha ci u Kalodio na Mbayuda cii wada ér ve due ken Roma kera. Nahan a yem a za kohol ve,
3 shi er yange eren inja tom i ve kpa ve eren la yô, lu hen ya ve, lu eren tom a ve imôngo, gadia ve eren tenti.
4 Nahan hanma iyange i memen yô, a za tese* ken shinagoge shi a lam a Mbayuda kua Mbagrika var var sha u ve na jighjigh.
5 Tsô er Shila man Timoteu za mough sha Masedonia sen va kohol Paulu yô, a wa ityough tesen mkaanem ma Aôndo kpoghuloo, lu pasen Mbayuda kwagh, tesen er Yesu a lu Kristu yô.
6 Kpa er ve zer hendan a na shi lamen dang dang yô, a ndughul akondo a na, a kaa a ve ér: “Awambe a en a lu sha ityough yenegh. M ngu a ishô. Hegen yô, ka u me yem hen akuraior agen je ne.”
7 Tsô a mough her, a gba za tesen ken ya u Titiu Yusetu, orgen u civir Aôndo, u ya na zua vea shinagoge la yô.
8 Kpa Krisepu, orhemen u shinagoge la va na Ter jighjigh a mba hen ya na cii. Shi Mbakorinte kpishi mba ve ungwa loho la kpaa, na jighjigh, nahan i er ve batisema.
9 Heela tseegh ga, Ter ôr kwagh a Paulu ken mpase u sha mnenge tugh, kaa ér: “De cie ga, ôron kwagh her, de lu ving ga,
10 sha ci u m ngu a we, nahan ma or a ta num sha a we shin nana bula u ga; gadia m ngu a ior hen gar ne kpishi.”
11 Nahan a tsa her inyom i môm man iwer ataratar, lu tesen mkaanem ma Aôndo her.
12 Sha shighe u Galio lu gomna u Akaya la, Mbayuda mough ayôôso a Paulu kpoghuloo, nahan ve yem a na pe gomna tema sha ikyônough ki ijirigh la,
13 ve lu kaan ér: “Or ne ngu tuur ior ér ve civir Aôndo sha gbenda u tindi a tese ga yô.”
14 Kpa Paulu kenden ér una ôr kwagh yô, Galio kaa a Mbayuda ér: “Ne Mbayuda, luun er mimi je kwagh ne ka ma kwaghbo shin ifer i vesen yô, ma i doo u me wa ishima me kegh ato a ven.
15 Kpa aluer ka sha ikyaa i kwaghôron man ati kua tindi wen ne gbe anyiman yô, kure nen kwagh la ayol a en. M ker u lun orjir sha akaa la ga.”
16 Maa a zenda ve hen ikyônough ki ijirigh nagh kera.
17 Tsô ve cii ve tsehe ve kôr Sôsetine orhemen u shinagoge, ve gba gbidyen un hen ishigh ki ikyônough ki ijirigh kira. Kpa mayange Galio wa uwegh sha akaa a ve lu eren ne ga.
18 Nahan kpa, Paulu hidi tse her ayange nga kar imôngo yô, a lôhô anmgbianev mbara ayem, maa a nyôr tso a yem ken Shiria, Prisila man Akwila yem vea na imôngo. A va tôndo ice na hen Senkeria, sha ci u iceghzwa i er a Aôndo yô.
19 Tsô ve va nyôr hen Efese, maa a undu ve her, a kar a za nyôr ken shinagoge, a wase Mbayuda u kaven akaa a lu ôron ve la.
20 Shin er ve zer kaan a na ér a̱ lu vea ve gbem nahan kpa, a lumun ga,
21 a lôhô ve ayem, maa a kaa a ve ér: “Me hide me va hen a ven, aluer Yehova* lumun yô.” Tsô a nyôr tso hen Efese
22 a sen shin Sesaria. Shi a kôndo* a za sugh tiônnongo,* maa a sen a va shin Antiôki.
23 A za lu her shighe wa karen, maa a mough a gba zenden sha ajiir kposo kposo hen haregh u Galatia man Ferijia, taver mbahenen cii asema.
24 Tsô Oryuda ugen u i mar un hen gar u Alekezanderia yô, va nyôr hen Efese, i yilan un ér Apolo. Lu or u fan iliam shi fa Ruamabera tsema tsema.
25 I vande tesen* or ne gbenda u Yehova,* shi er jijingi wase un lu a ishima i tseen kpishi yô, lu ôron shi tesen kwagh u Yesu vough vough, kpa gema fa kwagh u batisema u Yohane la tseegh.
26 Tsô a gba tesen ken shinagoge gbar gbar, nahan Prisila man Akwila mba ongo kwaghôron na yô, ve kua a na ve za pase un a seer fan gbenda u Aôndo tsembelee.
27 Shi er soo u peren yemen ken Akaya yô, anmgbianev mbara nger washika hen mbahenen mbara, kaa a ve ér ve ngohol un sar sar. Nahan za nyer ker yô, a wase mba Aôndo tese ve erdoo na u sha mhôôn ve hingir mbananjighjigh la kpoghuloo;
28 sha ci u lu pasen sha gbashima man ken igbar kpaa, tesen vighe vighe er Mbayuda ve tsum yô. Lu tesen ve ken Ruamabera ér Yesu ka Kristu.
Ngeren mba shin kpe
^ Shin “a za wase ior u kaven akaa a lu tesen la.”
^ Nenge Ngeren u Pasen Asember.
^ Ikyav tese ér yange kôndo sha Yerusalem.
^ Nenge Ngeren u Pasen Asember.
^ Shin “I vande ôron.”
^ Nenge Ngeren u Pasen Asember.
