Aerenakaa 20:1-38
20 Ayôôso la nga hidi ijime yô, Paulu tindi ér mbahenen ve va. Mba ve yô, a taver ve ishima, maa a lôhô ve ayem. Tsô a mough a gba yemen ken Masedonia,
2 a za kar ken uharegh mba ker mbara, a ôr akaa kpishi a taver mba sha ajiir la asema. Been cii yô, a za mase nyôron ken Grika.
3 A tsa ker iwer itiar, kpa er Mbayuda zua zwa ér vea wua un shighe u lu nôngon una nyôr tso a yem ken Shiria la yô, a hide a kar ken Masedonia a yem.
4 Sopata, wan u Piru, or u ken Berea, lu vea na, kua Aristareku man Sekundu, mban lu Mbatesalonika; man Gayu, or u ken Derebe, man Timoteu; mba hen tiôntar u Ashia yô, lu Tikiku man Terofimu.
5 Nomsombaiorov mban yem lu za keghen se ken Teroa;
6 kpa ayange a Beredi u I We Kwa sha Mi Ga la nga been yô, se nyôr tso hen Filipi, se va zan zan sha iyange i sha utaan la maa se va kohol ve hen Teroa, se tsa her ayange ataankarahar.
7 Ka va lun sha iyange i hiihii ken kasua* yô, se kohol imôngo sha u se ya kwaghyan, maa Paulu gba lamen a ve, sha ci u lu u kper una mough; tsô a lam zan zan atôutu.
8 Nahan i tsar amenger kpishi ken ruumyou u sha, pe se kohol imôngo la.
9 Er Paulu lu ôron kwagh la, gumor ugen, i yilan un ér Yutiku, gema tema sha windou maa gba mnyam. Er mnyam tôô un uwegh yô, a osough sha kpoyou u sha uhar a va gba shin inya, i va tôô un kpenegh.
10 Kpa Paulu hungwa sha kpoyou la va samber sha a na, kuve un, maa kaa ér: “De nen u eren ayôôso, gadia ngu uma.”
11 Tsô a hide a unde sha kpoyou la, a za coon beredi a ya. A za hemen a kwaghôron shighe gôgônan; a lam zan zan sev puaa, maa a mough.
12 Ve tôô wannomso la uma ve yem a na, nahan ve zua a msurshima je zua ga.
13 Tsô se hemen a Paulu se za nyôr tso se gba yemen ken Aso, se lu veren ishima ser se za tôô un her, er vande ôron se nahan, gadia un wa ishima u yemen her angahar.
14 Nahan va kohol se hen Aso yô, se tôô un shin tso se yem ken Mitilene.
15 Kpernan se nyôr tso her se va kar ikyua a icile i Kiô, mba ker ken sev mbugen yô, se va tile hen Samo, kpa se ngôôr her ga, kpernan maa se va nyôr hen Milete.
16 Paulu nyôr tso, kpa va kera kar ken Efese ga, sha er una vihi shighe hen tiôntar u Ashia ga yô, gadia lu torough yemen ér aluer una̱ fatyô yô, una za nyôr ken Yerusalem sha iyange i Iniongo i Pentikôsti.
17 Nahan kpa, er va nyôr hen Milete la, a tindi loho ken Efese ér i kaa mbatamen mba ken tiônnongo* la ve va.
18 Mba va nyer hen a na yô, a kaa a ve ér: “Sha iyange i m hii tan nguhar hen tiôntar u Ashia la je, ne fa gbenda u m lu eren kwagh hen atô wen la dedoo.
19 M lu eren Ter tom a iyol hiden a mi ijime tsung man a mliam ashe, shi m lu yan atsan sha ci u mbamhen mba Mbayuda lu eren ér vea wuam la.
20 Shi ne fa er yange m gba uwer u ôron ne ma kwagh ken akaa a lun ne a inja la ga yô, shi iyol kpem u tesen ne ken igbar man sha uya uya kpaa ga.
21 Kpa m er shiada vighe vighe hen Mbayuda man Mbagrika cii, sha kwagh u geman ishima hiden hen Aôndo shi nan Ter Yesu jighjigh.
22 Man hegen yô, nenge! jijingi ngu tuur mo, nahan m ngu yemen ken Yerusalem, shin er m fe kwagh u una za erem ker ga nahan kpaa,
23 saa di kwagh u icighan jijingi a lu pasen mo var var sha agar agar, kaan ér purusu u nyôron kua atsan nga keghen mo la di tsô.
24 Nahan kpa, uma wam ngum ma kwagh ga,* aluer ka u me fatyô u kuren zende wam u uma ne kua tom u Ter Yesu a nem ér m pase loho u dedoo u erdoo u Aôndo a tese sha mhôôn la vighe vighe yô.
25 “Hegen yô, m fa, ma or ken a ven u yange m pase nan kwagh u Tartor cii, nana kera zua ishigh a mo mayange ga.
26 Nahan m yila ne sha u fa nen nyian ner, m ngu a ishô sha awambe a ior cii,
27 gadia m gba uwer u ôron ne ma kwagh u Aôndo a we ishima u eren ga.
28 Ver nen ishima sha ayol a en man sha ikyumile cii i icighan jijingi a ver ne ne lu mbakuran i, sha u ne̱ kura tiônnongo u Aôndo, u a yam sha awambe a Wan na la.
29 M fa, me yemen yô, ugbaseela mba vihin tu vea nyôr ken a ven vea er a ikyumile kundu kundu ga cii,
30 shi ior vea mough ken a ven je vea ôr akaa nzughul nzughul sha u vea urugh mbahenen ve dondo ve.
31 “Sha nahan yô, lu nen per, shi umbur nen ner tugh man atetan cii, mayange m mem u wan hanma wen kwagh a mliam ashe ga, zan zan anyom atar.
32 Hegen yô, m ngu wan ne sha ikyev i Aôndo man sha ikyev i loho u erdoo na u a tese sha mhôôn la, ka loho u ua taver jighjigh wen u nan shi ua na ne zua a dyako vea uicighanmbaiorov imôngo yô.
33 M tôm azurfa shin zanaria shin ikyondo i or ga.
34 Ne ayol a en ne fa er lu sha ave a am ne m eren tom m nengen sha mbamgbe av kua mbamgbe mba ior mba ve lu a mo imôngo la yô.
35 M tese ne ken akaa cii er i lu sha u eren tom kpoghuloo nahan la ne wase mba ve keren iwasen la yô. Shi umbur nen mkaanem ma Ter Yesu iyol na lu ôr ne, ér: ‘Or u nan ne kwagh la ka i hemba saan nan iyol a or u nan ngohol la.’”
36 Ôron akaa ne yô, a gure inya vea ve cii, a er msen.
37 Tsô ve cii ve vaa kpishi; ve kuve Paulu shi ve suse un zwa,
38 man kwagh u hemba vihin ve je yô, lu kwagh u Paulu kaa ér vea kera zua ishigh a na mayange ga la. Tsô ve ver un gbenda a za nyôr tso.
Ngeren mba shin kpe
^ Ka iyange i se yer hegen ser Lahadi la. Hen Mbayuda yô, lu iyange i hiihii ken kasua je la.
^ Nenge Ngeren u Pasen Asember.
^ Shin “uma wam gbam kwagh cuku ga.”
