Aerenakaa 22:1-30
22 “Ne anmgbianev man uter kpaa, kegh nen ato m ôr ne ishô yam.”
2 Mba ongo gbe lamen a ve ken zwa Heberu yô, ve hemba huan ving cii, maa a kaa ér:
3 “M ngu Oryuda, i marem hen Tarsu, ken Shilishia. Kpa m hen makeranta hen gar ne, man lu Gamaliel iyol na je tesem ye. I tesem u dondon Atindi a uter mba tsev la vough vough, shi m lu a ishima i tseen sha kwagh u Aôndo, vough er ne cii ne lu a mi nyian nahan.
4 M tôv mba zan sha Gbenda u Ter ne a ican je m na i wua mbagenev, m lu kangen ve za nan mer i wuhe ken purusu, nomso kua kasev cii.
5 Upristi mba vesen kua mkohol u mbatamen cii vea fatyô u eren shiada sha kwagh ne. Shi yange m ngohol uwashika hen a ve m lu zan a mi hen anmgbianev mba ken Damaseku; m lu zan u za kangen mba ve lu ker la sha u me va a ve ken Yerusalem i va tsaha ve.
6 “Kpa m yem zan zan m za zurum a Damaseku, er iyange sha tembe nahan, maa ica i gbe ga yô, iwanger i vesen due sha aôndo wanger kasem,
7 m gba inya, maa m ungwa i ôr a mo ér: ‘Saulu, Saulu, er nan u tôvon mo a icana?’
8 M gema m pine mer: ‘Ka we ana, Terem?’ A kaa a mo ér: ‘Ka mo Yesu, Ornasareti, u u lu tôvon mo a ican ne.’
9 Ior mba ve lu zan a mo imôngo la nenge a iwanger la, kpa ve ungwa ikyenge i un u lu ôron kwagh a mo la ga.
10 Tsô m pine mer: ‘Tere, m̱ er nena?’ Ter kaa a mo ér: ‘Mough sha, yem ken Damaseku, ka ker a ôr u hanma kwagh u i soo ér we u er la ye.’
11 Kpa er iwanger la na m kera lu fan ityô u nengen kera ga yô, ior mba ve lu zan a mo imôngo la kôrom sha uwe, m za mase nyôron ken Damaseku.
12 “Tsô orgen, i yilan un ér Anania, lu or u cian Aôndo shi kuran Atindi, u Mbayuda mba hen ijiir la cii wuese un yô.
13 Or ne za va va tile pe m lu la, kaa a mo ér: ‘Saulu, anmgbian, hide hii u nengen kera!’ Her ave ave je, m kende ashe sha maa m nenge a na.
14 A kaa ér: ‘Aôndo u uter asev mba tsev tsua u ér u va hingir u fan awashima na shi u nenge a un u a lu u perapera la, shi u ungwa kwaghôron u a dugh sha zwa na yô,
15 sha ci u gba u u er un shiada hen ior cii, sha akaa a u nenge shi u ongo la.
16 Yô shi ka nyi u timbiri? Mough sha i er u batisema, shi ôô asorabo a ou kera sha u yilan sha iti na.’
17 “Kpa m va hidi ken Yerusalem yô, m lu eren msen ken tempel, nahan va erem sha ishi cing,
18 maa m nenge a na, lu kaan a mo ér: ‘Due ken Yerusalem sha fese, er fefa, gadia ior vea lumun a shiada u u lu eren mo ne ga.’
19 Tsô m kaa mer: ‘Tere, ve ayol a ve ve fa dedoo er yange m zenden sha ushinagoge m kôron mba nan we jighjigh m wuhen ken purusu shi m gbidyen ve yô.
20 Man shighe u i lu haan awambe a Sefanu, orshiada wou inya la kpa, m tile her, mo kpa doom, shi mba ve lu wuan un la verem a akondo a ve a haan iyol, m lu nengen sha mi.’
21 Kpa a kaa a mo ér: ‘Za, gadia m ngu tindin we ken akuraior agen ica.’”
22 Ve kegh ato a na zan zan, va ôron ishember ne yô, ve gba ngoron taver taver, kaan ér: “I kar a or ne sha tar kera, gadia a kuma u lun uma ga!”
23 Er ve lu ngoron shi eren akondo a ve a haan iyol keren kera, shi tsendan inya sha yô,
24 kurutya u kweshojaa la na wada ér i nyôr a Paulu ken iyaagh ki shoja, shi kaa ér i gbidye un a pase kwagh u a er la, sha er una fa ityôkyaa jighilii i ve lu ngoron a Paulu nahan yô.
25 Kpa mba nalegh Paulu ér vea gbidye yô, a kaa a orshoja u vesen u tile her la ér: “Aluer ne gbidye Orroma* u i lu a zua nan a ibo ga* nahan, a lu shamii?”
26 Orshoja u vesen la ongo kwagh ne yô, a za hen kurutya u kweshojaa la a za ôr un, a kaa ér: “Ka nyi u we ishima u erene? Or ne ka Orroma.”
27 Nahan kurutya u kweshojaa la kporom va pine Paulu ér: “Ôrom ase, u ngu Orromaa?” A kaa ér: “Een.”
28 Kurutya u kweshojaa la gema kaa ér: “Yange m kimbi zegeinyar ve m hingir Orroma ye.” Paulu kaa ér: “Kpa mo yô, i marem m ngu Orroma.”
29 Fese je maa, mba ve lu nôngon vea tôv un sha ugbidi la kar hen a na sha. Kurutya u kweshojaa la fe er a lu Orroma, shi nengen er un kange un mshirim kpaa yô, mciem gba un iyol.
30 Kurutya u kweshojaa la soo u fan ityôkyaa i Mbayuda ve yer Paulu ijir la jighilii, nahan mba ker ken sev mbugen yô, a sagh un, shi a yila upristi mba tamen man Sanhederin cii va kohol. Maa a sen a Paulu a va a na hen atô ve.
