Aerenakaa 25:1-27
25 Nahan Fesetu va nyôr hen tiôntar* la hii tom, ayange nga kar atar yô, a mough hen Sesaria a za sha Yerusalem.
2 Tsô upristi mba tamen kua Mbayuda mbagenev mba duen ati yila Paulu ijir hen Fesetu, ve gba zamber a na ér
3 a̱ er ve kwagh u doon; a̱ tindi i̱ va a Paulu hen Yerusalem. Kpa ve wa ken ishima ér vea yer sha gbenda, vea wua Paulu.
4 Nahan kpa, Fesetu kaa ér gba u Paulu una lu ken purusu ken Sesaria, shi un kpa un sôôn hiden yemen ken Sesaria.
5 A kaa ér: “Nahan mba ve lu mbahemenev ken a ven la ve sen vea mo ve va yila un ijir, aluer mimi je or la er kwaghbo yô.”
6 Tsô a tsa hen a ve er ayange anigheni shin pue nahan, maa a sen shin Sesaria. Mba ker ken sev mbugen yô, a tema sha ikyônough ki ijirigh, a na wada ér i nyôr a Paulu.
7 Nyer yô, Mbayuda mba ve mough ken Yerusalem ve va la, tile kase un gba ôron akaa kpishi a vihin tsung a nan un ibo, a ve fatyô u tesen mimi u a ga yô.
8 Kpa Paulu palegh iyol, kaa ér: “Sha Atindi a Mbayuda kpa m er isholibo ga, shin sha kwagh u tempel kpaa ga, shi Shisar kpa m er un ma kwaghbo ga.”
9 Kpa er Fesetu lu keren u doon ityough a Mbayuda yô, a pine Paulu ér: “U soo wer u yem sha Yerusalem i za ôr u ijir sha akaa ne sha ishigh yagh shinii?”
10 Kpa Paulu kaa ér: “M tile ka sha ishigh ki ikyônough ki ijirigh ki Shisar, ka hen pe i gbe u a ôrom ijir je ne. M er Mbayuda kwaghbo môm ga, er we kpa u lu nengen wang nahan.
11 Aluer mimi je m ngu iferor man m er ma kwagh u tesen ér m kuma ku yô, me zamber mer i de me lu uma ga; kpa aluer mimi ngu ken akaa a ior mban ve yerem ijir sha mi ne ga yô, or môm nan ngu a ian i nan mo sha ikyev ve sha u doon ityough a ve ga. Me za a ijir ne hen Shisar!”
12 Tsô Fesetu er idyu vea ior nav mba wan un kwagh, been yô, a kaa a na ér: “U kaa wer u za a ijir ne hen Shisar; yô ka hen Shisar je u za ye.”
13 Ayange nga kar yô, Tor Agripa va hen Sesaria vea Benisi, u va sughun Fesetu.
14 Er ve lu tsan ayange kpishi yô, Fesetu ôr tor kwagh u ijir i Paulu la, a kaa ér:
“Orgen ngu, u Feliku yange undu un ken purusu yô,
15 nahan shighe u m za sha Yerusalem la, upristi mba tamen kua mbatamen mba Mbayuda va ôrom kwagh na, ve kaa ér ma i ôr un ijir ma i tsaha un.
16 Kpa m kaa a ve mer Mbaroma mba gbe nan or sha ikyev i ior sha u doon ityough a ve tsô ga, saa or u i yer nan ijir la nana vande zuan ishigh a mba ve yer nan ijir la, a na nan ian nana palegh iyol sha kwagh u i yer nan ijir sha mi la.
17 Nahan mba va nyer heen yô, m kera ngôôr ga, mba ker ken sev mbugen je maa m tema sha ikyônough ki ijirigh, m kaa mer i nyôr a or shon.
18 Tsô mbayilan ijir mbara mough tile sha gba ôron akaa kpishi a nan un ibo, kpa ve ter kwagh môm ken akaabo a m lu henen mer a er la ga.
19 Lu di anyimanakaa agen a ve gba vea na sha kwagh u kwaghaôndo ve man sha kwagh u or u i yer ér Yesu, u yange kpe, kpa Paulu a zer ôron ér ngu uma yô.
20 Er m fa kwagh u me er sha ikyaa ne ga yô, m pine un aluer una soo ér una za sha Yerusalem i za ôr un ijir sha akaa ne yô.
21 Kpa er Paulu kaa ér i de una lu ken purusu una kegh Agusutu* iyol na a ôr un ijir yô, m kaa mer i de un a lu ken purusu zan zan me kar tindin i yem a na hen Shisar.”
22 Nahan Agripa kaa a Fesetu ér: “M soo mer or la a ôr kwagh shon me ungwa.” A gema a kaa ér: “Kper una ôr u ungwa.”
23 Mba ker ken sev mbugen yô, Agripa maa za va vea Benisi sha ihyagh ve va nyôr ken atejir a ukurutya mba ikweshojaa kua ior mba duen ati mba ken gar. Tsô Fesetu na wada i nyôr a Paulu.
24 Fesetu maa kaa ér: “Tor Agripa man ne mba ne lu heen a vese cii, nenge nen, ka or u ikpela i Mbayuda cii yange ve yila un ijir hen a mo ken Yerusalem man hen ijiir ne, ve lu ngoron kaan ér a kuma ku je ne.
25 Kpa m nenge yô, a er kwagh u tesen ér a kuma ku ga. Nahan er or ne iyol na kaa ér una yem a ijir ne hen Agusutu yô, m kaa mer me tindi i za a na.
26 Kpa m zua a kwagh jighilii u me nger hen Orvesen wam sha kwagh na ga. Nahan m va a na sha ishigh yenegh cii, hemban je yô, we Tor Agripa, sha u i tôv sha ijir na ne, a been yô, alaghga me zua a kwagh me nger.
27 Gadia m nenge mer aluer m gba tindin tsô mer i̱ za a or u ken purusu hen a na, kpa m ter akaa a i yer nan ijir sha mi la ga yô, a doo ga.”
Ngeren mba shin kpe
^ Ka, “tiôntar u Yudia” je la.
^ Ngun ka ititom i tor u tartor u Roma, ka iti i or ga.
