Aerenakaa 5:1-42
5 Nahan kpa, orgen lu, i yilan un ér Anania, un vea kwase na Safira ve tee inya.
2 Kpa a pande inyaregh ki a tee inya la a yer, kwase na kpa fa kwagh sha mi, maa a va a ki ki mase shin la, a va na sha ikyev i mbaapostoli.
3 Kpa Peteru kaa ér: “Anania, er nan u de Satan a ne u er icighan jijingi aie, u pande inyaregh ki u tee inya la u yere?
4 Shighe u ú lu a tee inya shon ga la, lu i you gaa? Man zum u u tee i la, kera lu inyaregh you gaa? Er nan u hen imba kwagh la nahan ken ishima youwe? Yô ka ior u er ve aie ga, kpa ka Aôndo.”
5 Anania ongo kwagh ne yô, a gba her, a kpe. Nahan mba ve ungwa kwagh ne cii, mciem gba ve iyol tsung.
6 Tsô agumaior agen mough kange un ken akondo, tôô un due a mi za ii.
7 Ahwa nga kar er atar nahan yô, kwase na va nyôr, lu a fa kwagh u za hemen ne ga.
8 Peteru kaa a na ér: “Ôrom ase yôô, ka sha iyenge inyar nahan ne tee inya la yee?” A kaa ér: “Een, ka iyenge inyar shon je la.”
9 Peteru maa kaa a na ér: “Er nan ne uhar ne zough zwa sha u ne tsugh jijingi u Yehova* nahana? Nenge! Angahar a mba ve za ii nomou la zurum sha hunda. We kpa vea tôô u a due a mi.”
10 Her ave ave je, a gba hen angahar a Peteru, a kpe. Agumaior la nga va nyer yô, ve kav un kpenegh, maa ve tôô un ve due a mi, ve za ii un dondo vea nom na.
11 Tsô mciem gba tiônnongo* cii iyol tsung, kua mba ve ungwa akaa ne la cii.
12 Shi mbaapostoli za hemen u eren uivande man akaa a kpilighyol kpishi hen atô u ior mbara; ve cii ve lu kohol imôngo ken Varenda u Solomon.
13 Orgen môm cihi nyôr nongo a ve ga, kpa ior gema lu wuese ve kpishi.
14 Heela tseegh ga, ingyegh ki mba nan Ter jighjigh lu seer a seer, nomso man kasev lu kpishi.
15 Ve lu duen a mbauangev je kpaa, va veren sha ugodobi mba vesen, ve gbir ve sha ugambe vev mba kiriki man ubutu, sha u Peteru una̱ va karen yô, a̱ hemba kpa mure* na a̱ gba sha mbagenev ken a ve.
16 Shi ikpelaior lu duen ken agar a a kase Yerusalem la van, ve lu tôôn mbauangev kua mbagenev mba azôv lu nzughul a ve la van a mi, nahan i bee ve cii uzayol mban.
17 Kpa pristi u vesen mough, un kua mba ken annongo u Mbasadushi mba ve lu vea na la cii, ve iv a iyuhwe ken ishima.
18 Nahan ve kôr mbaapostoli ve wuhe ken purusu.
19 Kpa tugh mbu il yô, ortyom u Yehova* bugh ihinda i purusu la, due a ve ken won, kaa ér:
20 “Yem za tile nen ken tempel, ôron nen ior akaôron a sha kwagh u uma ne cii her.”
21 Mba ongo kwagh ne cii yô, ve za nyôr ken tempel tugh tugh, ve gba tesen.
Nahan pristi u vesen kua mba ve lu a na imôngo la mba va nyer yô, ve yila Sanhederin* kua mkohol u mbatamen mba ônov mba Iserael cii, ve tindi ér i za ken purusu i za va a mbaapostoli mbara sha ishigh vev.
22 Kpa mbakuran tempel mbara mba ze yô, ve nenge a ve ken purusu ga. Nahan ve hide ve va na ripoti,
23 ve kaa ér: “Se za yô, se nenge i senda purusu gbang gbang, shi mbakuran kpaa, tile sha ihinda, kpa se mba bughun yô, se nenge a or môm ker ga.”
24 Orvesen u mbakuran tempel kua upristi mba tamen mba ongo kwagh ne yô, kpiligh ve iyol, taver ve u fan kwagh u una va due ker yô.
25 Kpa orgen va kaa a ve ér: “Nenge! Ior mba ne wuhu ken purusu la mba ken tempel, ve tile mba tesen ior.”
26 Tsô orvesen u mbakuran tempel la za a mbakuran nav ve za va a ve, kpa lu sha ayôôso ga, sha ci u ve lu cian ér ior a va ta ve awen.
27 Nahan ve va a ve sha ishigh ki Sanhederin. Tsô pristi u vesen pine ve kwagh
28 kaa ér: “Se ta ne icin gbang gbang ser, de nen u tesen ken iti ne gaa? Man nenge! Ne iv Yerusalem a ityesen yen, ne soo ner se ya ibo i awambe a or ne keng.”
29 Peteru man mbaapostoli mbagenev mbara gema kaa ér: “Gba keng u se ungwa imo i Aôndo u a lu orhemen la, a lu i ior ga.
30 Aôndo u uter asev nder Yesu u yange ne wua un sha u manden un sha kon la.
31 Aôndo ver un sha ian i icivirigh i lun Orvesen u Tamen man Oryiman, ken uwegh nagh ku yanegh, sha u a̱ wase Mbaiserael ve gema asema, nahan i̱ de ve asorabo.
32 Shi se mba mbashiada sha akaa ne, se kua icighan jijingi u Aôndo a ne mba ve ungwan imo na ér ngu orhemen la.”
33 Mba ongo kwagh ne yô, ishima vihi ve pev, nahan ve soo u been a ve sha.
34 Kpa Orfarishi ugen, i yilan un ér Gamaliel, mough tile hen atô u Sanhederin; un lu or u tesen Atindi, u ior cii naan un icivir yô. A na zwa ér i hila due a ve ken won.
35 Maa a kaa a ve ér: “Ne ior i Iserael, wa nen ikyo sha kwagh u ne we ishima u eren a ior mban la.
36 U tesen ikyav yô, cii man shighe ne yô, Teuda yange due, lu kaan ér un ngu ma kwagh, nahan ior kpishi nyôr nongo a na, ve kuma er 400 nahan. Kpa i va bee a na sha, shi mba ve dondo un la cii i sambe ve bee.
37 Tsô shi orgen due, lu Yuda, Orgalilia u yange mough sha ayange a i ngeren ior ati la, a urugh mbagenev ve dondo un. Or la kpa va kpe, mba ve lu dondon un la kpa i sambe ve kera.
38 Nahan sha kwagh u a lu zan hemen hegen ne yô, m ngu kaan a ven mer, de we nen ave sha kwagh u ior mban ga, de nen ve. Gadia aluer mhen ne, shin tom ne ka u ior yô, a va kar a u kera;
39 kpa aluer ka u Aôndo yô, ne fatyô u karen a ve kera ga. Nahan ne de ga yô, alaghga ne lu nôngon ityav a Aôndo iyol na je kpaa.”
40 Ôron nahan yô, ve lumun kwaghwan na, nahan ve yila mbaapostoli mbara, ve gbidye ve shi ve ta ve icin ér ve de u ôron kwagh ken iti i Yesu, maa ve de ve ve yem.
41 Tsô ve due sha ashe a Sanhederin cii, ve lu ember sha ci u i nenge ve ér ve kuma u a hee ve sha ci u iti na yô.
42 Nahan ve gba uwer ga, ve za hemen u tesen ayange ayange ken tempel man sha uya uya, ve lu yôôn loho u dedoo sha kwagh u Yesu, u a lu Kristu la.
Ngeren mba shin kpe
^ Nenge Ngeren u Pasen Asember.
^ Nenge Ngeren u Pasen Asember.
^ Shin “jijingi.”
^ Nenge Ngeren u Pasen Asember.
^ Shin “Mkohol u Mbaajiriv.”
