Aerenakaa 6:1-15
6 Tsô sha ayange la, mbahenen lu ngeen seer a seer, nahan Mbayuda mba lamen zwa Grika hii u gban Mbayuda mba lamen zwa Heberu ahon sha ci u i lu nan kasev mba côgholov vev kwaghyan ayange ayange ga.
2 Nahan Mbapuekaruhar mbara yila ikpela i mbahenen cii kohol imôngo, ve kaa ér: “Doo u se undu tom u pasen mkaanem ma Aôndo se hide se karen kwaghyan sha utebul ga.
3 Sha nahan yô, anmgbianev, tsua nen nomso ken a ven utaankaruhar mba ve lu a inja i dedoo* shi ve iv a jijingi man kwaghfan yô, sha er se ver ve sha tom u hange hange ne,
4 kpa se gema se hemba nan ishima sha msen u eren man tom u tesen mkaanem ma Aôndo yô.”
5 Kwagh u ve ôr ne doo ikpelaior la cii, nahan ve tsua Sefanu, u iv a jighjigh u nan kua icighan jijingi la, shi ve tsua Filibu man Porokoru man Nikano man Timon man Pamena kua Nikolau, or u ken Antiôki, u nyôr a nyôr Mbayuda yô.
6 Ve va a ve hen mbaapostoli, nahan mba eren msen mba been yô, ve penda ve ave iyol.
7 Nahan kwaghôron u Aôndo za hemen u samber, shi mbahenen lu ngeen kpishi seer a seer ken Yerusalem; shi ikpela i upristi kpishi na jighjigh.
8 Tsô Sefanu u iv a erdoo* kua tahav mbu Aôndo la lu eren akaa a kpilighyol tsung man uivande hen atô u ior.
9 Kpa ior mbagenev ken shinagoge u i yilan ér Shinagoge u Mba i Dugh Ve ken Kpan Kera la, za va, kua Mbashirene man Mbaalekezanderia, kua mba ken Shilishia man Ashia, ér vea hendan kwagh a Sefanu.
10 Kpa ve fatyô u hemban un ga, sha ci u lu ôron kwagh sha kwaghfan kpishi shi jijingi lu wasen un.
11 Tsô ve wa ior kwagh myer ér ve kaa ér: “Se ungwa un ngu lahan Mose man Aôndo.”
12 Maa ve tor ior asema, kua mbatamen man mbangerenatindi, nahan ve za tsehe ve va hen a na, ve va kôr un sha igyosor, ve za a na hen Sanhederin.*
13 Shi ve va a mbashiada mbaaiev, ve va kaa ér: “Or ne ngu den u lamen dang sha icighanjiir ne man sha Atindi ga.
14 Ikyav i tesen yô, se ungwa a kaa ér Yesu Ornasareti una yôhôr ijiir ne a haa inya, shi una gema aeren a Mose yange tese se la.”
15 Tsô er mba ve tema ken Sanhederin la cii haa ashe sha a na yô, ve nenge ishigh nagh lu er ka ishigh ki ortyom nahan.
Ngeren mba shin kpe
^ Shin “mba ve lu a iti i dedoo.”
^ Shin “erdoo u Aôndo a tesen sha mhôôn la.”
^ Shin “Mkohol u Mbaajiriv.”
