Luka 1:1-80
1 Ior kpishi nôngo tôv sha akaa a yange er la cii, ve nger a kpaa, man ka akaa a se kpa se ne jighjigh a mi vangertiôr yô.
2 Shi mbagenev mba yange ve nenge akaa ne sha ashe a ve, shi ve lu mba yôôn loho u Aôndo la kpa ôr se akaa ne.
3 Nahan, orcivirigh Tiofilu, mo kpa m tôv sha akaa ne cii tsembelee, hii sha mhii u a je, shi m kange ishima mer me nger u a sha adondo adondo,
4 sha er u fa dedoo er akaa a i vande tesen we* la yange er mimi yô.
5 Sha ayange a Herode, tor u Yudia la, pristi ugen lu, i yilan un ér Sekaria. Lu môm ken nongo u upristi, ú i yilan u sha iti i Abiya la. Kwase na due ken tsombor u Aron,* i yilan un ér Elisabetu.
6 Ve cii ve lu mbaperapera sha ishigh ki Aôndo, ve lu a acôghor iyol ga, sha ci u ve kuran atindi a Yehova* shi ve dondon akaawan a na cii.
7 Kpa ve lu a wan ga, sha ci u Elisabetu lu ikyômkwase, shi ve cii ve za gighir.*
8 Zum u Sekaria lu eren tom u pristi sha ishigh ki Aôndo sha shighe u va gba sha kwa u nongo u upristi u a lu ker,
9 er upristi vanden eren keke* la yô, va gba u un kpa una za nande insensi, nahan a nyôr ken icighanjiir u Yehova.*
10 Ikpela i nongo la cii gema lu eren msen ken won hen shighe u* i lu nanden insensi la.
11 Tsô ortyom u Yehova* va ande hen a na, tile ken iyan u atse a nanden insensi la.
12 Kpa Sekaria nengen a na yô, ishima ta un kwe, shi mciem gba un iyol.
13 Kpa ortyom la kaa a na ér: “De cie ga, Sekaria, sha ci u i ungwa zamber wou. Nahan kwase wou Elisabetu una mar u wan u nomso, u ii un iti wer Yohane.
14 A va mar un yô, u zua a iember shi a saan we iyol tsung, shi ior kpishi kpa a saan ve iyol.
15 Una gba kwagh sha ishigh ki Yehova.* Kpa a gba u mayange una ma wain shin msôrom ga, shi a iv un a icighan jijingi ken uya je.*
16 Shi una gema ônov mba Iserael kpishi asema vea hide hen Yehova,* Aôndo ve.
17 Shi una lu zan un sha hemen a jijingi man tahav mbu Eliya lu a mi la, sha u geman asema a uter hingir er a mbayev nahan, shi geman mbahembanato hingir mba eren kwagh sha kwaghfan er mbaperapera nahan, sha er una wa ior ago iyol u civir Yehova* yô.”
18 Tsô Sekaria kaa a ortyom la ér: “A er nan ve me fa mer kwagh ne una er nahan mimi? Gadia m bee iyol, shi kwase wam kpa za gighir.”
19 Ortyom la gema kaa a na ér: “Ka mo Geberiel, m tilen sha ishigh ki Aôndo hanma shighe cii. Í tindim ér m va lam a we, m ôr u loho u dedoo ne.
20 Kpa nenge! U lu ving, u kera fatyô u lamen ga zan zan iyange i akaa ne aa er la, sha ci u u na mkaanem am ma ma a va kure sha mi sha shighe u i ver la jighjigh ga.”
21 Hen shighe ne ior gema lu keghen Sekaria, kpiligh ve iyol er a timbir ken icighanjiir yum nahan yô.
22 Va dugh ken won yô, a kera fatyô u lamen a ve ga, maa ve kav er a nenge a kwagh u kpiligh iyol ken icighanjiir yô. Nahan lu lamen a ve sha ave, gadia ikyer na kondo.
23 Ayange a na a eren icighantom la nga been yô, a yem ken ya na.
24 Shighe karen yô, kwase na Elisabetu wa iyav, maa kera due ken won ga kuma iwer itian, lu kaan ér:
25 “Kape Yehova* a er a mo ken ayange ne je ne. A umbur mo hegen, sha u m de kera heen hen ior ga.”
26 Iyav nav mbun mbu nyer iwer ataratar yô, Aôndo tindi ortyom Geberiel, hen gar ugen ken Galilia, i yilan ér Nasareti,
27 hen iniunkwase igen i i tôndo zwa u vôson orgen ken tsombor u Davidi yô, i yilan or shon ér Yosev. Iti i iniunkwase la ér Maria.
28 Ortyom la ve yô, a kaa a iniunkwase shon ér: “M sugh u, we u i doo Aôndo a we tsung ne. Yehova* ngu a we.”
29 Kpa ishima ta un kwe kpishi sha mkaanem nam mara, a gba nôngon ér una kav kwagh u imba ishughun la i̱ tese yô.
30 Nahan ortyom la kaa a na ér: “De cie ga, Maria, gadia doo Aôndo a we.
31 Nenge! U wa iyav,* u mar wan u nomso, u ii un iti wer Yesu.
32 Wan shon una lu orcivirigh, a yilan un ér Wan u U Hemban Cii, shi Yehova* Aôndo una na un ikyônough ki torough ki ter na Davidi,
33 una tema Tor sha ya u Yakob gbem sha won, shi Tartor na kpaa ua kar kera mayange ga.”
34 Kpa Maria pine ortyom la ér: “A er nan man kwagh ne una er, er m lu a yav a or ga* nee?”
35 Ortyom la gema kaa a na ér: “Icighan jijingi una er tom ken a we, shi tahav mbu U Hemban Cii la mbua kase u. Ka nahan ve a yilan wan u u mar la ér icighan Wan u Aôndo ye.
36 Shi nenge! Anmgbian wou Elisabetu kpa ngu iyav ka iwer ataratar je ne, shin er a bee iyol shi yange i yilan un ér ikyômkwase nahan kpaa.
37 Gadia kwagh môm u Aôndo una ôr ve a hemba un u eren kpa ngu ga.”
38 Tsô Maria kaa ér: “Nenge! M ngu kpankwase u Yehova!* Kwagh u u kaa la a erem nahan vough.” Ortyom la maa yem.
39 Shighe kar kpuaa yô, Maria mough gba torough yemen ken gar ugen ken Yuda, ken tar u iwoogh,
40 a za nyôr hen ya u Sekaria, a sugh Elisabetu.
41 Elisabetu ongo ishughun i Maria yô, wan tsue un ken uya, maa i iv Elisabetu a icighan jijingi,
42 nahan a ôr genger genger ér: “U hemba ngun a iveren ken ukase cii, shi wan u a lu u ken uya la kpa ngu a iveren!
43 Mo di nahan kpa ngô u Terem ngu van hen a moo? M kuma u zuan a imba civir ne je kpa?
44 Gadia nenge! U sughum, m ongo ikyenge you je maa, wan tsuem ken uya sha iember.
45 Shi i saan kwase u a ne jighjigh la iyol, sha ci u akaa a Yehova* a tindi i va kaa un la cii aa kure sha mi cica cii.”
46 Tsô Maria kaa ér: “Uma wam ngu* wuese mhembe u Yehova,*
47 ishima yam kpaa ia* mem u ember tsung sha ci u Aôndo Oryiman wam ga,
48 gadia shin er kpankwase na a gbe kwagh ga nahan kpa, a umbur un. Man nenge! Hii hegen zan zan yem ken hemen hanma kov cii ua kaa ér saan mo iyol,
49 sha ci u Un u a hembe tahav la erem akaa a kpilighyol, shi iti na kpaa ka icighanti je.
50 Shi zungu mba ve cie un la mhôônom sha ikyov ikyov.
51 Ka a er ityom i ageegh sha uwegh nagh; a sambe mba ve lu a mhen u gengese iyol ken asema a ve la.
52 Ka a hungwa a mbautahav sha mkônom vem ma torom, a gema a kende a ior mba ve hiden a iyol ijime la sha.
53 Ka a na mbaibanave akaa a doon mgbeghaa, a gema a na mbanyarev gbenda ve yem ave gbilin.
54 Ka a yima wanye na Iserael; una umbur mhôônom nam ma zungwen,
55 vough er lu kaa a uter asev mba tsev, Aberaham man ônov nav* nahan, gbem sha won.”
56 Maria tsa vea na kuma er iwer itiar nahan, maa hide hen ya na.
57 Tsô shighe va kuma u Elisabetu una mar, nahan a mar wan u nomso.
58 Ior mba wan ndor a na kua anmgbianev nav mba ongo er Yehova* a zungu un mhôônom kpishi nahan yô, ve ember a na imôngo.
59 Ka va nyer sha iyange i sha anigheni yô, ve va u va tsôngon wanikyundan la, shi ve lu nôngon u iin un iti i ter na la, ér Sekaria.
60 Kpa ngô na gema kaa a ve ér: “Ei! A yilan un ér Yohane.”
61 Tsô ve kaa a na ér: “Or môm hen tsombor wou kpa nan ya iti nahan ga.”
62 Tsô ve lam a ter na sha ave, ve pine un iti i a soo ér i yilan wan ne a mi yô.
63 Maa a kaa i va na un kpande u ngeren kwagh, maa a nger sha mi ér: “Iti na ér Yohane.” Mba nengen nahan yô, ve cii kpiligh ve iyol.
64 Her ave ave je maa ikyer na bugh shi nombor na peese, a gba lamen, wuese Aôndo.
65 Tsô mciem gba ior mba hen ikyasen ve la cii iyol, nahan i gba lamen sha akaa ne cii hen tar u iwoogh u Yudia la cii.
66 Nahan mba ve ungwa la cii lu henen sha mi, pinen ér: “Man wanikyundan ne yô, una va lu nyi or jimi?” Sha ci u mimi je, uwegh ku Yehova* lu sha a na.
67 Tsô i iv ter na Sekaria a icighan jijingi, nahan a ôr kwaghôron u profeti, a kaa ér:
68 “I̱ wuese Yehova,* Aôndo u Iserael, sha ci u a umbur ior nav, a va ve a myom.
69 Shi a kende a korough ku myom* sha ci u ya u Davidi, wanye na,
70 vough er yange ôr sha ijô i uicighan mba uprofeti nav mba tsuaa la nahan;
71 a ôr kwagh u yiman se, se̱ de kera lu sha ikyev i mbahyomov asev ga, shi se̱ de lu sha ikyev i mba ve soo kwagh wase ga la kpaa ga.
72 Una zungwe se mhôônom, er yange vande tôndon zwa a uter asev mba tsev mbara nahan, shi una umbur icighan ikyuryan na kpaa,
73 ka iceghzwa na i yange bum a ter wase u tamen Aberaham
74 ér zum u una yima se, se kera lu sha ikyev i mbahyomov asev ga la, una na se ian i icivirigh i eren un icighantom a mciem shio
75 man sha mimi man sha perapera, sha ishigh nagh sha ayange a uma wase cii la.
76 Kpa we wanikyundan ne yô, a yila u ér profeti u U Hemban Cii, sha ci u u va zaan Yehova* sha hemen sha u sôron un igbenda,
77 shi pasen ior nav sha u ve̱ fa er i lu u una yima ve sha u den ve asorabo a ve,
78 sha ci u mhôônom ma zungwen ma Aôndo wase a lu a mi la yô. Sha mhôônom nam ma zungwen man, iwanger ia due sha ia ta sha a vese er sev ka mbu av nahan;
79 sha u mba ve tem ken ime man ken mure u kuugh la ve̱ zua a iwanger, man sha u hemen se zan a vese sha gbenda u bem.”
80 Tsô wan la vese sha iyol man ken jijingi kpaa, maa a yem a za lu ken desereti zan zan va ar sha iyange i tese iyol na hen Iserael ken igbar la.
Ngeren mba shin kpe
^ Shin “i tese u sha u ôron we a ôr.”
^ Zwa Grika, “due ken ônov mba Aron mba kasev.”
^ Nenge.
^ Shin “ve bee iyol.”
^ Shin “sha ieren i upristi.”
^ Nenge Ngeren u Pasen Asember.
^ Zwa Grika, “ihwa i.”
^ Nenge Ngeren u Pasen Asember.
^ Nenge Ngeren u Pasen Asember.
^ Shin “cii ve a mar un ye.”
^ Nenge Ngeren u Pasen Asember.
^ Nenge Ngeren u Pasen Asember.
^ Nenge Ngeren u Pasen Asember.
^ Nenge Ngeren u Pasen Asember.
^ Shin “u jile iyol.”
^ Nenge Ngeren u Pasen Asember.
^ Zwa Grika, “er m lu a fa nom ga.”
^ Nenge Ngeren u Pasen Asember.
^ Nenge Ngeren u Pasen Asember.
^ Shin “m ngu.”
^ Nenge Ngeren u Pasen Asember.
^ Shin “jijingi wam kpaa una.”
^ Shin “vor na.”
^ Nenge Ngeren u Pasen Asember.
^ Nenge Ngeren u Pasen Asember.
^ Nenge Ngeren u Pasen Asember.
^ Shin “oryiman u ageegh.” Nenge Ngeren u Pasen Asember, “Korough.”
^ Nenge Ngeren u Pasen Asember.