Luka 10:1-42
10 Ken masejime yô, Ter tsua mbahenen mbagenev 70 tindi ve uhar uhar ér ve hemen a na, ve za hen hanma gar man ijiir i un iyol na kpa lu u una za yô.
2 Maa a kaa a ve ér: “Sha kpôô yô, sunda ngee, kpa mbasundan mba di kpuaa tsô. Nahan yô, zamber nen Ter u sunda, a tindi mbatomov ken sunda na.
3 Za nen! Nenge, m ngu tindin ne ne za lu er iyôngo hen atô u ugbaseela nahan.
4 De tôôn nen ikpa i wan inyaregh* shin ikpa i wan kwaghyan ga, shin akôv* kpaa ga, shi de sughun nen or môm* sha gbenda ga.
5 Hanma ijiir i ne ze cii, nea za nyôr hen ma ya yô, kaa nen ner: ‘Bem a lu sha ya ne.’
6 Man aluer or u soon bem* nan ngu her ga yô, bem la una hide sha a ven. Kpa aluer nan ngu yô, bem la una lu sha ya la.
7 Nahan lu nen hen ya la, yaan nen shi maan nen akaa a ve ne ne la, gadia ortom kuma injar i nan. De tsaan nen sha uya wue wue ga.
8 “Shi hanma ijiir i ne ze cii, nea za nyôr hen gar man a ngohol ne her yô, ya nen kwagh u i ne ne la,
9 shi bee nen mba ve lu uange ker la iangev vev, shi kaa nen ve ner: ‘Tartor u Aôndo va ikyua a ven.’
10 Kpa hanma gar u ne za nyer her man i ngohol ne ga yô, due nen sha ugodobi mba vesen ken gar la, kaa nen ner:
11 ‘Ihyundu i ken gar wen, i̱ i̱ hee se sha angahar la je kpa, se mba kuren i haan ne her. Kpa fa nen ner, Tartor u Aôndo zurum.’
12 Me kaa ne, sha iyange la, kwagh u gar la una hemba vihin a Sodom.
13 “Kwagh a tser ne, ne ior i Korashin! Kwagh a tser ne, ne ior i Beteseida! sha ci u, luun er ityom i kpilighyol i yange i er hen a ven la, a lu ken Tiru man Shidon yô, ngise je ior mbara ma ve gem ishima, ma ve haa ikyondo i huan zungwen iyol, ma ve shar shin mtuhwe.
14 Sha nahan yô, kwagh wen una hemba vihin a u ior i Tiru man Shidon sha Iyange i Ijirigh la.
15 Man ne ior i Kapenaum, a kende a ven sha je he? Ka shin Uwar* ne kure ye!
16 “Hanma or u nana kegh ato a ven yô, ka mo je nan kegh ato a mo ye. Shi or u nan vende ne yô, mo kpa nan vendam. Man or u nan vendem yô, nan venda Un u a tindim la kpaa.”
17 Tsô mba 70 mbara za hide saan saan, gba va kaan ér: “Tere, azôv je kpa nga ungwan se ken iti you.”
18 Maa a kaa a ve ér: “M nenge Satan sen sha aôndo er nyiar nahan, va gba.
19 Nenge, m na ne tahav mbu ndyaren íyô kua ayese angahar, shi m na ne agee a hemban tahav mbu orhyom wen cii, nahan kwagh môm una bula ne ga.
20 Kpa de ember nen sha ci u ujijingi mba ungwan ne ga, kpa ember nen sha ci u i nger ati a en sha.”
21 Nahan icighan jijingi na yô, saan un iyol tsung hen shighe la, a kaa ér: “Terem, me wuese we ken igbar, we Ter u sha man tar, sha er u yer mbabughunashe man mbafantakeda akaa ne kpile kpile, u gem u pase mbayev mba kiriki a yô. Man jighilii yô, Tere, kape u soo wer i lu je la.
22 Akaa cii Terem wam sha ikyev, shi or môm kpa nan fa Wan ga, ka Ter tseegh a fe un ye. Ter kpaa or môm nan fa un ga, ka Wan tseegh a fe un ye, kua ma or u Wan a soo u pasen nan kwagh u Ter yô.”
23 Maa a gema ishigh ken mbahenen, a ôr a ve tseegh ér: “Saan mba ashe a ve a nenge a akaa a ne lu nengen ne iyol.
24 Mimi je me kaa ne, uprofeti man utor kpishi yange sar ve u nengen a akaa a ne lu nengen a mi ne, kpa ve nenge a a ga. Shi sar ve u ungwan akaa a ne lu ungwan ne, kpa ve ungwa a ga.”
25 Tsô orgen u fa Atindi tsema tsema yô, mough tile sha, gba karen un, a pine un ér: “Ortesen, ka nyi i gbe u me er ve me zua a uma u tsôrono?”
26 A kaa a na ér: “I nger ken Atindi ér nyi? U ôr nahan u kav nena?”
27 A gema a kaa ér: “‘Yehova* Aôndo wou a̱ doo u ishima kpee je, a ishima you cii man a uma wou cii man a agee a ou cii man a mhen wou cii,’ shi ‘or u nan we ndor a we nana̱ doo u ishima kpee je, er iyol you nahan.’”
28 Maa a kaa a na ér: “U kaa vough; eren kwagh ne her, nahan u zua a uma.”
29 Kpa er or ne soo u tesen ér un ngu orperapera yô, a pine Yesu ér: “Ka an jim nan lu or u wan ndor a moo?”
30 Yesu gema kaa a na ér: “Orgen mough ken Yerusalem lu zan ken Yeriko, nahan mbaiv za num un gbenda, ve ér un akondo shi ve gbidye un je hume, maa ve yem ve undu un her.
31 Tsô pristi ugen gba karen sha gbenda la, kpa va nengen a or la yô, a palegh a kar vegher ugen a yem.
32 Orlevi ugen kpa va aren hen ijiir la yô, a nenge a na, maa a palegh a kar vegher ugen a yem.
33 Kpa Orsamaria ugen lu karen sha gbenda la zan zende, nahan a va ande sha or la, kenger un yô, kunya kôr un.
34 Nahan a za her a za kange un avav, shi a haa mkurem man wain sha mi. Maa a tôô un a penda sha zendenya* na, a yem a na hen ijiir i kimbin inyaregh tsan her, a za nenge sha a na.
35 Mba ker ken sev mbu gen yô, a dugh udenariu* uhar a na or u nengen sha ijiir la, a kaa ér: ‘Nenge sha a na tsembelee, shi aluer u vihi inyaregh hemba kin yô, me kimbi u zum u me hiden yô.’
36 Ken iorov mba utar mban, ka an u nenge wer nan er kwagh u tesen ér nan ngu or u wan ndor a or u mbaiv num un gbenda laa?”
37 A kaa ér: “Ka or u yange zungwe un mhôônom la.” Yesu maa kaa a na ér: “We kpa yem za er nahan.”
38 Ve kar mba ngur yemen yô, a za nyôr hen angar ugen. Kwase ugen lu her, i yilan un ér Marta, a nyôr a na hen ya na.
39 Kwase ne lu a anmgbian u kwase, i yilan un ér Maria, wen tema hen angahar a Ter, lu ungwan kwagh u lu ôron la.*
40 Marta di tume ityough eren akaa kpishi. Nahan a va kaa a na ér: “Tere, anmgbian wam u kwase undum m ngu eren akaa tswen, nahan kpa kwagh gba u sha mi gaa? Kaa un a va wasem.”
41 Ter gema kaa a na ér: “Marta, Marta, ishima nyian we, shi akaa kpishi nga zan we iyol.
42 Nahan kpa, kwagh gba sha akaa kpuaa, shin kwagh môm tseegh. Maria yô, tsua ci u dedoo,* man a ngohol un hen a na kera ga.”
Ngeren mba shin kpe
^ Zwa Grika, “ikpa i wan inyaregh zeren ken iwenge.”
^ Shin “usanda.”
^ Shin “de sughun nen or kuven nen nan.”
^ Zwa Grika, “wan u bem.”
^ Zwa Grika, “Hade.” Nenge Ngeren u Pasen Asember.
^ Nenge Ngeren u Pasen Asember.
^ Shin “jaki.”
^ Nenge Ngeren u Pasen Asember.
^ Shin “kwaghôron na.”
^ Shin “tsua kwagh u hemban doon cii.”
