Luka 17:1-37
17 Tsô a kaa a mbahenen nav ér: “Ka keng, akaa a nan gbeev mbu nôngon aa va. Kpa kwagh a tser or u nana va a akaa a nan gbeev mbu nôngon la!
2 Guda u ma i zer nan nase sha mon, ma i gbihi nan shin zegemnger, a u nana̱ na môm ken mba hiden a iyol ijime mban gbeev mbu nôngon la.
3 Ver nen ishima sha ayol a en. Aluer anmgbian wou nan er u kwaghbo yô, ta nan icin, man aluer nan vaa afanyô yô, de nan kwaghbo u nan.
4 Shi aluer nan er u kwaghbo kwa taankaruhar ken iyange i môm je kpa, nan hide kwa taankaruhar nan va kaa ér, ‘M vaa afanyô, yam anyi’ yô, de nan kwaghbo u nan kpee je.”
5 Tsô mbaapostoli kaa a Ter ér: “Wase se, se seer lun a jighjigh u nan.”
6 Ter gema kaa ér: “Aluer ne mba a anjighjigh u nan er ishange i masetadi nahan tseegh kpa, ne fatyô u kaan a kon ne ner, ‘Bugh iyol you za môôr shin zegemnger!’ kpa ua er kwagh u ne kaa la.
7 “Ka an ken a ven kpan u nan una yar u za kahan nan tom shin kuran nan ilev, una za kur ve nana kaa a na ér, ‘Kar a kar va ya kwagh sha tebul heene’?
8 Nana kera kaa a na ér, ‘Erem kwaghyan u me ya aikighe ne yô, zer ikyondo i iweregh, duem a iwer, m ya kwagh shi m ma kwagh, me va bee tsô we kpa u ya shi u ma’ ga zee?
9 Nana sugh kpan la sha ci u a er tom u nan we un la yum ga, shin nana sugh unu?
10 Ne kpaa, zum u ne er ityom i i we ne la cii yô, kaa nen ner: ‘Se mba ikpan, se kuma u a sugh se ga. Se er kwagh u i gbe u se er la di tsô.’”
11 Va nguren yemen ken Yerusalem yô, a za kar hen anijiir ugen hen ijootar i Samaria man Galilia.
12 Gbe nyôron ken angar ugen yô, mbaamandev pue va kohol un, kpa ve tile ica.
13 Maa ve genger amo ve kaa ér: “Yesu, Ortesen, zungwe se mhôônom!”
14 Nengen a ve yô, a kaa a ve ér: “Yem za tese nen ayol a en hen upristi.” Mba ngur yemen yô, imande ve la maa wanger.
15 U môm ken a ve, nengen er i bee un imande yô, a cin a gba hiden wuese Aôndo genger genger.
16 A va gure hen angahar a Yesu, a sua ityough inya, a gba sughun un. Man or ne lu Orsamaria.
17 Yesu gema kaa ér: “Ka iorov pue mbara cii i wanger ve gaa? Man mba utaankarunyiin mbara mba hana?
18 Orgen ken a ve kera hide sha u va wuese Aôndo ga, saa or u ken ikyurior igen ne tseeghlee?”
19 Maa a kaa a na ér: “Mough sha yem; ka sha jighjigh u nan wou imande you i̱ bee ye.”
20 Zum u Mbafarishi pine un shighe u Tartor u Aôndo ua va yô, a kaa a ve ér: “Tartor u Aôndo ua va sha gbenda u a lu ior cii vea fa ga,
21 shin sha gbenda u ior vea kaa ér, ‘Nenge ngú heen!’ shin, ‘Ngú heela!’ kpaa ga yô. Gadia Tartor u Aôndo ngu hen atô wen.”
22 Maa a kaa a mbahenen nav ér: “Shighe ngu van u ne tôm ner ma ne nenge a iyange i môm ken ayange a Wan u or la yô, kpa ne nenge a mi ga.
23 Ior vea kaa a ven ér, ‘Nenge ngula!’ shin, ‘Nenge ngun!’ Kpa de duen zaan nen shin dondon nen ve ga.
24 Er inyiar ka i nyiar sha kwavaôndo vegher ne i wanger i za ar vegher la nahan, kape a lu sha iyange i Wan u or je la.
25 Nahan kpa, a gba u una vande yan atsan kpishi, shi kov ne ua venda un.
26 Shi er lu sha ayange a Noa la nahan, kape a lu sha ayange a Wan u or je la:
27 ior lu yan akaa shi man akaa. Nomso lu vôson kasev, shi i lu nan kasev noov, zan zan ar sha iyange i Noa nyôr ken tso la, maa Mngerem ma Deemee va tim ve cii.
28 Shi er lu sha ayange a Loti la nahan: ior lu yan akaa shi man akaa, shi ve lu yamen akaa shi teen akaa; ve lu lôôn akaa shi maan ayou.
29 Kpa iyange i Loti due ken Sodom la, usu man sulfur sen sha aôndo tim ve cii.
30 Kape a lu sha iyange i Wan u or una pase iyol na je la.
31 “Sha iyange la, or u nan lu sha ityough ki iyoughough* kpa akaa a nan a lu ken iyou yô, nana̱ de hongo ér nana tôô a ga. Shi or u nan lu ken ityev kpaa nana̱ de hidi ér nana va tôô akaa a nan undu la ga.
32 Umbur nen kwagh u kwase u Loti la.
33 Or u nan keren ér nana kura uma u nan yô, una saa nan, kpa or u uma u nan a saa nan yô, nana gema a kura un.
34 Me kaa ne, hen tugh mbura, iorov uhar vea lu sha gambe; a kua a u môm, a undu ugen.
35 Kasev uhar vea lu wuan kwagh sha nase môm; a kua a u môm, a undu ugen.”
36 *——
37 Tsô ve pine un ér: “Tere, ka han kwagh ne una ere?” A gema a kaa a ve ér: “Ape kwagh u kpen a lu la, ka her uigyuve* vea kohol ye.”
Ngeren mba shin kpe
^ Nenge Mateu 24:17.
^ Ivur ne ngi ken uruamabera mba tsuaa mbagenev mba yange i hii ngeren sha ave la ga, nahan kwagh ne tese ér ka mkaanem ma ken Ruamabera u Aôndo yange na i nger la ga.
^ Uigyuve mbagenev mba ye kwagh u kpen.
