Luka 18:1-43
18 Tsô a gba ôron ve injakwagh sha u pasen er i gbe u vea eren msen hanma shighe, shi vea yina ishima ga yô.
2 A kaa ér: “Orjir ugen lu hen gar ugen. Or ne cian Aôndo ga shi naan or icivir ga.
3 Kwasecôghol ugen di gema lu hen gar la, nahan a zer za kaan a na ér, ‘Nôngo kure ijir yam vea or u m lu ôron ijir a na ne sha mimi.’
4 Shighe kar je kpa lu nan un ishigh ga, kpa ken masejime yô, a va kaa ken ishima na ér, ‘Shin er m cie Aôndo ga shi m ne or icivir ga nahan kpa,
5 kwasecôghol ne zam iyol gande, nahan me kure un ijir sha mimi, a de u va zeren zan mo iyol.’”
6 Tsô Ter kaa ér: “Ungwa ase nen, orjir ne lu orperapera ga, kpa lu kwagh u ôr je la!
7 Man gema mba Aôndo a tsough ve, mba ve vaan ve yer un tugh man atetan, shi a lu wan ishima a ve la ve, una kera ôr ve ijir sha mimi ga yee?
8 Me kaa ne, una ôr ijir ve fefa. Nahan kpa, zum u Wan u or una va la, una zua a imba jighjigh u nan ne shin tar je kpa?”
9 Shi a ôr mbagenev mba ve hen ér ve mba mbaperapera shi ve nengen mbagenev ér ve gba kwagh ga la, injakwagh ne, ér:
10 “Yange iorov uhar za ken tempel u za eren msen, u môm lu Orfarishi, ugen la di lu orngoholkpandegh.
11 Orfarishi la mough sha gba eren msen ken ishima na kaan ér, ‘Aôndo, m sugh u sha er m lu er mbagenev nahan ga yô, amba er, mbanumungbenda shin mba ve lu mbaperapera ga shin mbadyarev shin er orngoholkpandegh ne nahan kpaa ga yô.
12 Ka m hôr kwaghyan kwa har ken kasua; m ne môm-ken-pue u akaa a m zough a mi cii.’
13 Kpa orngoholkpandegh la gema tile ken ica, lu un pe kenden ashe sha tsô kpaa ga, kpa a kighir ave sha vanger, lu kaan ér, ‘Aôndo, zungwem mhôônom, m ngu orisholibo.’
14 Me kaa ne, sha ishigh ki Aôndo yô, or ne yange yem ken ya na a ishô hemba Orfarishi la. Gadia hanma or u nan kenden a iyol sha yô, a hide a nan ijime, kpa or u nan hiden a iyol ijime yô, a kende a nan sha.”
15 Tsô ior gba van un a mbayev mba kiriki* ér a̱ penda ve ave iyol, kpa mbahenen mba nengen nahan yô, ve gba zôhôn a ve.
16 Nahan kpa Yesu yila mbayev mba kiriki mbara ér ve va, a kaa ér: “De nen mbayev mba kiriki* ve va hen a mo; de yangen nen ve ga, sha ci u ka amba ne je Tartor u Aôndo u lu sha ci ve ye.
17 Mimi je me kaa ne, aluer or hide a iyol i nan ijime er wanye u kiriki nahan, nan lumun Tartor u Aôndo ga yô, mayange je nana nyôr ken u ga.”
18 Tsô môm ken mbavesen mbara pine un ér: “Ortesen u Dedoo, ka nyi i gbe u me er ve me zua a uma u tsôrono?”
19 Yesu kaa a na ér: “Er nan u yerem wer or u dedoo? Or u dedoo môm ugen ngu ga, saa Aôndo tseegh.
20 U fa atindi kaa ér: ‘De eren idya ga, de woo or ga, de iin ga, de eren shiada u aiegh ga, naan teru man ngôu icivir.’”
21 Or la gema kaa ér: “Atindi ne cii, m hii u kuran a iyev je.”
22 Yesu ongo nahan yô, a kaa a na ér: “Kwagh shi u môm: Za tee akaa a u lu a mi la cii gema inyaregh na mbaatsanev, tsô u lu a kwagh u injaa sha, nahan va dondom.”
23 Ongo kwagh ne yô, ishima vihi un tsung, sha ci u lu a inyaregh kpishi.
24 Yesu kenger un, maa kaa ér: “Taver kpishi u mba lun a inyaregh ve nyôr ken Tartor u Aôndo!
25 Sha kpôô yô, hemba kan zange u rakumi a nyôr hen ihyura i anula u koron kwagh, a u ornyar nana̱ nyôr ken Tartor u Aôndo.”
26 Mba ve ungwa kwagh ne la kaa ér: “Ka an je a fatyô u yiman nana?”
27 A gema a kaa ér: “Akaa a ior ve nengen ér vea fatyô ga la, Aôndo yô una fatyô.”
28 Kpa Peteru kaa ér: “Nenge! Se undu akaa ase cii se dondo u.”
29 Yesu kaa a ve ér: “Mimi je me kaa ne, hanma or u nan undu ya shin kwase shin anmgbianev, shin mbamaren shin ônov sha ci u Tartor u Aôndo yô,
30 nana zua a akaa ne hegen a hemba nahan kwa imôngo, shi ken tar u he la* nana zua a uma u tsôron.”
31 Tsô a ta ibyalegh a Mbapuekaruhar mbara, a kaa a ve ér: “Nenge! Se mba zan sha Yerusalem, nahan hanma kwagh u uprofeti ve nger sha Wan u or cii una kure sha mi.
32 Ikyav i tesen yô, a na un sha ikyev i ior mba ken atôatyev, vea naha un tar shi vea er a na dang shi vea ta un azer iyol.
33 Vea gbidye un shi vea wua un, kpa sha iyange i sha utar la, una nder shin ku.”
34 Kpa ve kav kwagh môm ken akaa a a lu ôron la ga, sha ci u inja i mkaanem mara lu myer hen a ve, nahan ve kav akaa a i ôr la ga.
35 Yesu za zurum a Yeriko yô, orapirashe ugen tema hen kpegbenda, lu sônon kwagh.
36 Er ungwa ikpelaior lu karen yô, a gba pinen kwagh u a lu zan hemen yô.
37 Nahan i kaa a na ér: “Ka Yesu, Ornasareti a lu karen ye!”
38 Tsô a genger imo a kaa ér: “Yesu, Wan u Davidi, zungwem mhôônom!”
39 Nahan mba ve lu sha hemen la gba vendan a na ér a cir zwa, kpa lu hemban ôron genger genger ér: “Wan u Davidi, zungwem mhôônom!”
40 Tsô Yesu tile, maa kaa ér i va a or shon. Mba ve a na yô, Yesu pine un ér:
41 “Ka nyi u soo wer m er u we?” A kaa ér: “Tere, ma m nenge kera.”
42 Yesu maa kaa a na ér: “Nenge ase kera; ka sha jighjigh u nan wou ashe a bugh u ye.”
43 Nahan fese je a hingir u nengen, tsô a gba dondon un, wuese Aôndo. Ior mbara cii mba nengen nahan yô, ve wuese Aôndo.
Ngeren mba shin kpe
^ Zwa Grika, “anikyundanev.”
^ Nenge ngeren u shin kpe u sha ivur 15 la.
^ Shin “ken kov u ua va la.” Nenge Ngeren u Pasen Asember.
