Luka 19:1-48
19 Tsô a nyôr ken Yeriko a gba karen.
2 Orgen lu ker, i yilan un ér Sakiu, lu torkpande, shi lu a inyaregh kpishi.
3 Sar un pe ma un nenge a Yesu, er a lu yô, kpa er tav ga yô, lu fan ityô ga, sha ci u ikpelaior lu a na.
4 Nahan a yevese a kar sha hemen, a za unde sha kon u tur, ér una nenge a na, sha ci u Yesu ver ishigh u karen gbenda her.
5 Yesu va nyer her yô, a kenger sha, maa a kaa a na ér: “Sakiu, hungwa shin inya fese, nyian ne me za hen ya wou keng.”
6 Tsô a hungwa fese a ngohol un saan saan, a yem a na hen ya na.
7 Mba nengen kwagh ne yô, ve gba lamen sha a na ivarvase, kaan ér: “A za hen ya u orisholibo.”
8 Kpa Sakiu mough sha kaa a Ter ér: “Tere, nenge! Me pav akaa a am cii avegher ahar me na mbaatsanev vegher môm, man hanma or u m ngohol nan kwagh* cii, me hide nan a mi kwa nyiin.”
9 Yesu maa kaa a na ér: “Myom nyôr hen ya ne nyian, sha ci u un kpa ngu wan u Aberaham.
10 Gadia Wan u or va ka u va keren kwagh u a saa la shi yiman un.”
11 Er ve lu ungwan akaa ne la, shi a ôr ve injakwagh igen, sha ci u a zurum a Yerusalem, nahan ve lu henen ér ka u Tartor u Aôndo ua va her ave ave la je.
12 Tsô a kaa ér: “Orgen u i mar un hen tsombor u tor yô, za zende ken tar u icaa ér una za ngohol tahav mbu lun tor man una hide ye.
13 Tsô a yila ikpan na pue, a na ve umina* pue, a kaa a ve ér, ‘Za er nen kpenga a mi zan zan me kar hiden.’
14 Kpa ior mba ken tar na kôr un ihyom, nahan ve tindi mba ve lu ashe a tar na la ér ve̱ za ken tar u a yem ker la, ve̱ za kaa ér, ‘Se soo ser or ne a tema tor sha a vese ga.’
15 “Mba za ne un tahav mbu lun tor* la, hidi yô, a yila ikpan na i yange wa ve inyaregh* sha ikyev la va, sha u una fa liba i ve zough a mi ken kpenga ve yô.
16 Tsô u hiihii la kporom va kaa a na ér, ‘Tere, m zua a liba umina pue sha mina môm u yange u nam la.’
17 Nahan a kaa a na ér, ‘U er doo, u ngu kpan u dedoo! Er u lu jighjigh sha ankwagh u cuku yô, ngohol tahav sha agar pue.’
18 U sha uhar la kpa va kaa ér, ‘Tere, m zua a liba umina utaan sha mina môm u yange u nam la.’
19 Ngun kpa a kaa a na ér, ‘We nengen sha agar ataan.’
20 Kpa ugen za va, gba va kaan ér, ‘Tere, ngohol mina wou, yange m koso un ken ikyondo.
21 M lu cian we, sha ci u u ngu or u taver kwagh. Ka u tôô kwagh u i lu we u koso ga yô, shi u sunda kwagh u i lu we u lee ga yô.’
22 A gema a kaa a na ér, ‘Ka sha kwaghôron wou je m lu ôron we ijir ye, we kpan u wan ifer ne. Wer u fa, m ngu or u taver kwagh, ka m tôô kwagh u i lu mo m koso ga yô, shi m sunda kwagh u i lu mo m lee ga yô, ka kwagh u u kaa laa?
23 Nahan er nan yange u za wam inyaregh yagh ken banke ga? Wea er nahan yô, er m hidi ne ma m ngohol ki a mtsera sha mi.’
24 “Nahan a kaa a mba ve tile ikyua la ér, ‘Ngohol nen mina la hen a na kera, gema na nen u a lu a umina pue la.’
25 Kpa ve kaa a na ér, ‘Tere, ngu a umina pue!’. . .
26 ‘Me kaa ne, hanma or u nan lu a kwagh yô, a seer nan. Kpa or u nan lu a kwagh ga yô, kwagh u nan henen ér nan ngu a mi la je kpa a ngohol hen a nan kera.
27 Shi va nen a mbahyomov av mba yange ve soo ér m de tem tor sha a ve ga la heen, va wua nen ve sha ishigh yagh.’”
28 Ôron akaa ne been yô, a mough a gba yemen sha Yerusalem.
29 Nahan va zurum hen uwo u i yilan ér Uwo u Olev, ikyua a Betefeji man Betani yô, a tindi mbahenen uhar,
30 a kaa a ve ér: “Za nen hen angar u a lu se sha hemen ne, ne za nyôron ker yô, ne nenge i zer wanjaki u i lu je or nan lu a tema sha mi ga yô. Sagh un nen va nen a mi heen.
31 Kpa aluer or pine ne ér, ‘Er nan ne saghen unu?’ yô, kaa nen ner, ‘Kwagh gba Ter a mi.’”
32 Nahan mba i tindi ve la mba ze yô, ve nenge a mi vough er vande ôron ve nahan.
33 Kpa mba ngur saghen yô, ior mba wanjaki la pine ve ér: “Er nan ne saghen wanjaki nee?”
34 Ve kaa ér: “Kwagh gba Ter a mi.”
35 Tsô ve va a wanjaki shon hen Yesu, ve va tar akondo a ve a haan iyol sha mi, ve penda Yesu sha mi.
36 Gbe yemen yô, ve lu taren akondo a ve a haan iyol sha gbenda.
37 Mba va zurum ape gbenda u hii u senen sha Uwo u Olev la yô, ikpela i mbahenen cii gba ember, wuese Aôndo genger genger sha ci u ityom i kpilighyol i ve nenge la,
38 kaan ér: “Saan Tor u a lu van ken iti i Yehova* la iyol. Bem a lu sha, shi iengem i lu sha usha mba hemban gban ica la!”
39 Kpa Mbafarishi mba ve lu ken ikpelaior la kaa a na ér: “Ortesen, venda a mbahenen ou.”
40 A gema a kaa ér: “Me kaa ne, luun er mban mba ving yô, awen ne ma a gbire vaa.”
41 Va zurum u nyôron yô, a gema a kenger gar la, a vaa un,
42 a kaa ér: “Luun er we, we nahan, u kav akaa a van a bem u mimi la sha iyange ne yô—kpa nenge ase, nga myer sha ashe ou.
43 Sha ci u ayange nga van, a mbahyomov ou vea wa igyar sha ikyon i horon, vea kase u shi vea imbishi we* hanma vegher cii yô.
44 Vea ta u inya, we a ônov ou mba ve lu ken a we la, ne hembe avur avur, vea undu iwen i môm sha igen ken a we ga, sha ci u u kav shighe u i ve u va sôron we ne ga.”
45 Tsô a za nyôr ken tempel a gba zendan mba ve lu teen akaa la,
46 kaan ér: “I nger ér, ‘A yilan iyou yam ér iyou i msen,’ kpa ne na i hingir iyou i mbaiv.”
47 A za hemen u tesen ken tempel ayange ayange. Kpa upristi mba tamen man mbangerenatindi man mbavesen mba nongoior la lu keren gbenda u wuan un,
48 kpa ve zua a gbenda môm u eren kwagh ne ga, sha ci u ior cii lu a na her, ve lu ungwan kwaghôron na.
Ngeren mba shin kpe
^ Shin “m ngohol nan kwagh sha anyighe.”
^ Mina u Mbagrika môm lu uderakema 100.
^ Shin “mba za ne un tartor.”
^ Zwa Grika, “azurfa.”
^ Nenge Ngeren u Pasen Asember.
^ Shin “vea er u ican.”
