Luka 2:1-52
2 Tsô sha ayange la, Shisar Agôsetu na wada ér i nger ior mba sha tar* cii ati.
2 (Lu kwa u hiihii u i nger ior ati je la, hen shighe u Kwiriniu lu gomna u Shiria la.)
3 Nahan ior cii yem ér i za nger ve ati, hanma or hen gar u nan.
4 Yosev kpa mough ken Galilia, hen gar u Nasareti, yem ken Yudia, hen gar u Davidi u i yilan ér Betelehem la, sha ci u lu or u hen ya u Davidi, shi due ken tsombor na kpaa.
5 A za vea Maria u vôso un er tôndo zwa nahan la, ér i za nger ve ati. Hen shighe ne, zurum u Maria a mar.
6 Er ve lu ker la je maa shighe va kuma u una mar.
7 Tsô a mar wan u nomso, lu waniunda, a kange un ken abamber a ikyondo, a gbir un shin kpese,* sha ci u ve zua a ijiir i tsan ga.
8 Mbakuranilev kpa lu hen ningir la, ve lu tsan ken toho a ilev vev, kuran mbi tugh.
9 Tsô ortyom u Yehova* va ande her, tile ve sha ishi, nahan iengem i Yehova* mondo kase ve, tsô mciem gba ve iyol kpishi.
10 Kpa ortyom la kaa a ve ér: “De cie nen ga, gadia nenge! M ngu ôron ne loho u dedoo u ua va ior cii a msaanyol kpishi yô.
11 Gadia i mar ne oryiman u a lu Kristu shi a lu Ter la nyian, ken gar u Davidi.
12 Man ka ikyav i ne fa un sha mi je ne: Ne za yô, ne nenge i kange wanikyundan ken abamber a ikyondo, i gbir un shin kpese.”
13 Tsô fese nahan, ikpela i mbatyomov mba shaav* va kohol ortyom la gba wuese Aôndo kaan ér:
14 “I̱ wuese Aôndo u hemban u a tem sha usha la, shin tar kpaa, bem a lu a ior mba i doo un a ve* la.”
15 Mbatyomov mbara mba hidi mba yemen sha yô, mbakuranilev mbara gba kaan ker ayol a ve ér: “Se nôngo nen tsung se za nen ken Betelehem se za nenge kwagh u Yehova* a pase se ér a er ne.”
16 Tsô ve za fefa ve za zua a Maria man Yosev, kua wanikyundan la, i gbir un shin kpese.
17 Mba nengen nahan yô, ve pase loho u i ôr ve sha kwagh u wanikyundan shon la.
18 Nahan mba ve ungwa la cii kpiligh ve iyol a kwagh u mbakuranilev ôr ve la,
19 kpa Maria koso mkaanem mara cii ken ishima, lu henen sha mi.
20 Tsô mbakuranilev mbara hide gba yemen sughun Aôndo shi wuese un sha hanma kwagh u ve ungwa shi ve nenge vough er i vande kaan ve nahan la cii.
21 Ayange nga kar anigheni, ka kom u a tsôngo un yô, i ii un iti ér Yesu, iti i ortyom la vande ôron cii man i jile un la.
22 Shi ka va kom sha shighe u vea wanger ayol a ve er Atindi a Mose tese la yô, ve va a na ken Yerusalem u va nan Yehova,*
23 vough er i nger ken Atindi a Yehova* nahan, ér: “Hanma waniunda u nomso* yô, gba u a tsegha nan sha ci u Yehova.”*
24 Shi ve za na nagh er i ôr ken Atindi a Yehova* nahan, ér: “I̱ lu sha mbaatii uhar shin agum a mkungu ahar.”
25 Tsô orgen lu ken Yerusalem, i yilan un ér Shimion. Or ne lu orperapera shi civir Aôndo a ishima i môm, lu keghen shighe u a sur Iserael ishima yô, shi icighan jijingi lu sha a na.
26 Shi Aôndo pase un sha icighan jijingi ér, una kpe ga zan zan una kar nengen a Kristu, Un u Yehova* a tsough la.
27 Jijingi hemen un va a na ken tempel, nahan zum u mbamaren mba Yesu, wanikyundan la, va nyôr a na u eren kwagh u Atindi tese ér i eren la yô,
28 a kôr wan shon sha ave na, a gba wuese Aôndo kaan ér:
29 “Ter U Hemban Cii, hegen yô, de kpan wou a yem bem bem er yange u kaa nahan,
30 sha ci u ashe am nenge a gbenda wou u yiman se,
31 u u ser sha ishigh ki ior cii la;
32 ka iwanger i bughun ikyondo i̱ i̱ yisa akuraior ashe kua iengem i ior ou Iserael yô.”
33 Nahan kpiligh ter u wan la kua ngô na iyol tsung sha akaa a i lu ôron sha a na la.
34 Shi Shimion sôn iveren sha ci ve, a kaa a Maria, ngô u wan la ér: “Nenge! I ver wan ne sha ci u ior kpishi ken Iserael ve gba shi ve mough, shi a lu kwagh u lamen sha mi dang,
35 sha u á fa kwagh u a lu ior kpishi ken asema yô. Kpa we yô, u ya ican er ka or u i kum nan sanker u lihen nahan.”
36 Profeti u kwase ugen lu, i yilan un ér Ana. Lu wan u Fanuel, or u ken ipyaven i Asher. Kwase ne bee iyol; yange er nom* kpa tsa vea nom na anyom ataankarahar tseegh.
37 Nahan hen shighe ne lu kwasecôghol, shi lu anyom 84. Mayange banen ken tempel ga, sha u eren Aôndo tom tugh man atetan, hôron kwaghyan shi zamber a na ken mbamsen.
38 Hen shighe* la, a kporom a gba va sughun Aôndo shi ôron kwagh u wan shon a mba ve lu keghen myom u Yerusalem la cii.
39 Nahan Yosev vea Maria mba eren akaa a Atindi a Yehova* tese la cica cii yô, ve hide ve yem ken Galilia, hen gar ve, Nasareti.
40 Wan la lu vesen shi iyol na lu taver, Aôndo lu ivin un a kwaghfan shi suen un.
41 Hanma inyom yô, mbamaren nav yange ve za iniongo i Paseka ken Yerusalem.
42 Nahan shighe u lu anyom 12 la kpa, ve za iniongo shon ken Yerusalem, er ve vanden eren nahan.
43 Iniongo la been mba ngur hiden yô, Yesu, wanakiriki la, lu ken Yerusalem her, kpa mbamaren nav fa ga.
44 Ve tôô ér ngu vea ior mbagenev mba ve lu hiden vea ve la, nahan ve yem zan zan kuma zende u iyange i môm, maa ve hii u keren un hen anmgbianev vev kua ior mbagenev mba ve fa ve yô.
45 Kpa mba zough a na ga yô, ve hide ve yem ken Yerusalem ve za ker un kpoghuloo.
46 Ayange nga kar atar yô, ve za zua a na ken tempel, tema hen atô u mbatesen lu ungwan akaa a ve lu ôron yô, shi lu pinen ve mbampin.
47 Kpa mkav na kua mbamlumun mba lu nan la kpiligh mba ve lu ungwan la cii iyol je saa her.
48 Er mbamaren nav nenge a na yô, kpiligh ve iyol, nahan ngô na kaa a na ér: “Wana, er nan u er a vese nahana? Nenge, teru man mo se mba keren we a ishimanyian je.”
49 Kpa a pine ve ér: “Er nan ne keren mo? Ne fa er i gbe u me luun ken iyou i Terem gaa?”
50 Kpa ve kav kwagh u lu ôron ve la ga.
51 Tsô a sen vea ve, ve hide ken Nasareti, shi a za hemen u lun sha ikyev* ve. Shi ngô na koso mkaanem man cii ken ishima na.
52 Yesu lu vesen, kwaghfan na kpaa lu seer a seer, shi lu doon Aôndo a na seer a seer, kua ior kpaa.
Ngeren mba shin kpe
^ Shin “ior mba ken tartor u Roma.”
^ Shin “anar u haan ilev kwaghyan.”
^ Nenge Ngeren u Pasen Asember.
^ Nenge Ngeren u Pasen Asember.
^ Zwa Grika, “ikyum i sha i vesen.”
^ Shin “a lumun ve.”
^ Nenge Ngeren u Pasen Asember.
^ Nenge Ngeren u Pasen Asember.
^ Nenge Ngeren u Pasen Asember.
^ Nenge Ngeren u Pasen Asember.
^ Zwa Grika, “wan u a hii duen ken sagh, man a lu u nomso.”
^ Nenge Ngeren u Pasen Asember.
^ Nenge Ngeren u Pasen Asember.
^ Zwa Grika, “shighe u lu iniunkwase la je.”
^ Zwa Grika, “ihwa.”
^ Nenge Ngeren u Pasen Asember.
^ Shin “ungwan imo.”
