Luka 23:1-56
23 Tsô ikpelaior la cii mough yem a na hen Pilatu.
2 Ve gba za wan un akaa iyol, kaan ér: “Or ne ngu senden ior ityough a gomoti, vendan ér i de te Shisar kpandegh ga, shi kaan ér un ngu Kristu man tor.”
3 Nahan Pilatu pine un ér: “U ngu Tor u Mbayuda?” A gema a kaa ér: “Ka vough er u lu ôron nahan.”
4 Tsô Pilatu kaa a upristi mba tamen man ikpelaior la ér: “M zua or ne a ibo ga.”
5 Kpa ve gba sendegh kaan ér: “Ngu tesen ken Yudia cii, hii ken Galilia zan zan va ar heen, tuur ior ér ve er ayôôso.”
6 Pilatu ongo nahan yô, a pine sha u una fa, aluer ka Orgalilia yô.
7 Fe ér ka or u hen haregh u Herode yô, a kaa ér i za a na hen Herode. Sha ayange la Herode kpa lu ken Yerusalem.
8 Herode nengen a Yesu yô, doo un tsung. Yange vande saren un u nengen a Yesu shighe kar, sha ci u a ungwa akaa kpishi sha kwagh na, shi lu veren ashe ér a̱ er ivande una nenge.
9 Tsô a gba pinen Yesu mbampin kpishi, kpa Yesu bugh un zwa ga.
10 Kpa upristi mba tamen man mbangerenatindi tile gba wan un akaa iyol sha ishimavihin.
11 Shi Herode vea ushoja nav hee un, shi haa un ikyondo iyol, i doon tsung, sha u nahan un tar, maa a kaa ér i hide i yem a na hen Pilatu.
12 Hii sha iyange la je Herode hingir ijende i Pilatu, gadia cii man shighe ne yô, ve lu ihyom ayol a ve.
13 Tsô Pilatu yila upristi mba tamen man mbahemen kua ior mbagenev, mba va kohol yô,
14 a kaa a ve ér: “Ne va a or ne hen a mo ner ngu tuur ior ér ve er ayôôso. Kpa nenge! M tôv un sha ishigh yenegh, kpa m zua un a ibo sha akaa a ne va yer un ijir sha mi la ga.
15 Jighilii yô, Herode kpa zua un a ibo ga, ka nahan ve a kaa ér i hide a na her a vese ye, sha ci u a er kwagh môm u a wua un ga.
16 Nahan me tsaha un, maa me pase un a yem.”
17 *——
18 Kpa ikpelaior la cii ôr genger genger ér: “Bee a or ne sha,* gema pase Baraba sha ci wase!”
19 (Yange i wuhe Baraba ne ken purusu ér a er ayôôso vea gomoti ken gar la shi a wua or.)
20 Pilatu shi yila ve, sha ci u soo u pasen Yesu.
21 Tsô ve gba ngoron kaan ér: “I za mande un sha kon! I za mande un sha kon!”
22 Shi a ôr a ve kwa u sha utar ér: “Ka nyi kwaghbo or ne a ere? M zua a ityôkyaa i wuan un ga, nahan me tsaha un, maa me pase un a yem.”
23 Kpa ve hanger her, ve lu ôron genger genger ér i wua un,* ve ôr taver taver gbem tsô va gande un.
24 Pilatu maa kaa ér i er kwagh u ve soo la.
25 A pase or u ve soo la, or u i wuhe un ken purusu ér a er ayôôso a gomoti shi a wua or la. Kpa a gema Yesu a na ve ér ve za er a na er ve soo la.
26 Er ve lu yemen a na la, orgen ken Shirene, iti na ér Shimon, mough ken agar lu van, maa ve kôr un ve penda un kon u manden or sha mi* la, ér a tôô a dondo sha Yesu.
27 Ior kpishi lu van un ken ijime, kua kasev mba ve lu vaan shi zungwen un yô.
28 Kpa Yesu gema kenger ve, kaa ér: “Ne ônkasev mba Yerusalem, de nen u vaan mo. Kpa vaa nen sha ci wen man ônov enev;
29 sha ci u, nenge! ayange nga van, a ior vea kaa ér, ‘Saan kasev mba ve lu ikyôm la iyol, man mba ve mar ga, kua mba wan a lu a ma ve atumba ga la kpaa!’
30 Shi vea gba kaan a iwo ér, ‘Gba kighir se!’ shi vea kaa a agungu ér, ‘Cir se!’
31 Aluer ve er akaa ne shighe u kon u lu ndor la yô, ka nyi ia er shighe u ua va uma laa?”
32 Ior mbagenev uhar lu mbaaferev, ve kpa i lu yemen a ve u za wuan a na imôngo.
33 Mba za nyer hen ijiir i i yilan ér Igbôndotyou la yô, ve mande un sha kon, kua mbaaferev mbara, u môm ken uwegh nagh ku yanegh, ugen ken uwegh nagh ku imesegh.
34 Kpa Yesu lu kaan ér: “Tere, de ve isholibo ve, sha ci u ve fa kwagh u ve lu eren ga.” Shi ve er ishor sha akondo a na, maa ve kar a.
35 Ior tile lu kenger. Kpa mbahemen mbara lu miin zwa kaan ér: “A yima mbagenev, nahan a̱ yima ase iyol na, aluer ngu Kristu, Un u Aôndo a Tsough la yô.”
36 Ushoja je kpa lu nahan un tar, ve lu va nan un wain u angen
37 kaan ér: “Aluer u ngu tor u Mbayuda yô, yima ase iyol you.”
38 Shi ve nger kwagh vegher u sha, ape ver ityou la, ér: “Tor u Mbayuda.”
39 Tsô môm ken mbaaferev mba i mande ve her la, gba lamen sha a na dang, kaan ér: “U ngu Kristu gaa? Yô, yima iyol you kua se kpaa!”
40 Kpa ugen la gema venda a na, kaa ér: “Aôndo je kpa u cie gaa? Shin ka er u ye mtsaha môm vea na yumu?
41 Se yô, i kure se ijir vough, se zua a injar kuma sha akaa a se er la, kpa or ne yô, a er ma kwaghbo ga.”
42 Maa a kaa ér: “Yesu, umbur mo zum u u nyôr ken Tartor wou yô.”
43 Yesu maa kaa a na ér: “Mimi je m kaan we nyian ne, u va lu vea mo ken Paradiso.”
44 Hen shighe ne, lu er ahwa 12 atetan* nahan, kpa ime gema wa hen tar la cii, zan zan va kighir er ahwa atar* atetan nahan,
45 sha ci u iyange pir. Tsô ikyondo i yisan i ken tempel la pav hen atô va tume shin inya.
46 Kpa Yesu ôr kwagh genger genger, kaa ér: “Tere, m wa uma* wam sha ikyev you.” Ôron kwagh ne been maa a sule.*
47 Orvesen u ushoja mbara nengen kwagh u er ne yô, a gba wuese Aôndo kaan ér: “Mimi je, or ne lu orperapera.”
48 Er ikpelaior i i kohol her sha u nengen kwagh u lu zan hemen la, nenge akaa ne yô, ve kighir ave vanger ve gba zungwen yemen ken uya vev.
49 Mba ve fa un cii, tile ken ica. Shi kasev mba yange ve mough vea na ken Galilia ve va la kpa lu her, lu nengen akaa ne.
50 Tsô orgen lu, i yilan un ér Yosev, lu or u ken Mkohol u Mbaajiriv, fa kwagh shi lu orperapera.
51 (Or ne yange lumun a mhen ve man kwagh u ve er ne ga.) Lu or u ken Arematia, gar ugen ken Yudia; lu keghen Tartor u Aôndo.
52 Or ne nyôr za tile sha ishigh ki Pilatu, pine ian i tôôn ikyom i Yesu.
53 Nahan a va hungwa a i shin inya, a kange i ken ikyondo i taver ishe, a za wa ken uwar u i time ken vande, u i lu a vande iin or ker ga yô.
54 Hen shighe ne, lu Iyange i Kohol Iyol, u a nyôr ken Iyange i Memen yô.
55 Kpa kasev mba ve mough vea na ken Galilia ve va la kpa za, za nenge uwar la, shi ve nenge er i gbir ikyom na yô.
56 Nahan ve hide ve yem ve za nungwa mcimbim man mkurem ma human doon. Kpa ve mem sha Iyange i Memen, er tindi tese nahan.
Ngeren mba shin kpe
^ Ivur ne ngi ken uruamabera mba tsuaa mbagenev mba yange i hii ngeren sha ave la ga, nahan kwagh ne tese ér ka mkaanem ma ken Ruamabera u Aôndo yange na i nger la ga.
^ Shin “kar a or ne kera.”
^ Shin “i mande un sha kon.”
^ Nenge Ngeren u Pasen Asember.
^ Zwa Grika, “er ihwa i sha ataratar nahan.” Yange i hii u ôron ahwa ne pepe shighe u iyange ka i hii u duen la.
^ Zwa Grika, “ihwa i sha utaankarunyiin.”
^ Zwa Grika, “jijingi.”
^ Shin “a kpe.”
