Luka 24:1-53
24 Kpa ka va lu sha iyange i hiihii ken kasua* yô, ve va hen uwar shon pepe pepe a mcimbim ma ve nungwa la.
2 Kpa ve nenge i menger iwen sha uwar la kera,
3 nahan mba nyer ker yô, ve nenge a ikyom i Ter Yesu ga.
4 Er lu kundan ve iyol her la, ve nenge iorov uhar tile ikyua, a akondo a mondon iyol.
5 Nahan cier kasev mbara iyol je ve wa ityou inya. Tsô ior mbara kaa a ve ér: “Er nan ne lu keren or u uma hen ijiir i mbakpeneve?
6 A nder, kera ngu heen ga. Umbur nen kwagh u yange ôr ne shighe u lu ken Galilia her la,
7 a kaa ér gba keng u a na Wan u or sha ikyev i mbaasorabo, vea mande un sha kon, shi sha iyange i sha utar la una nder shin ku.”
8 Tsô ve umbur mkaanem nam,
9 nahan ve mough hen uwar la ve hide ve va ôr Mbapuekarmôm mbara kua mbagenev cii akaa ne.
10 Ve yô, lu Maria Madalina man Yoana kua Maria ngô u Yakobu. Shi kasev mbagenev mba ve lu vea ve la cii lu ôron mbaapostoli akaa ne.
11 Nahan kpa, akaa a i lu ôron ne lu ve er ka ibumekwagh nahan, ve na kasev mbara jighjigh ga.
12 Kpa Peteru mough yevese za hen uwar la, za ngurum gbirin ashe yô, a nenge a akondo tseegh. Maa a kar a yem, taver un u fan kwagh u za hemen yô.
13 Kpa sha iyange la je, mbagenev uhar ken a ve lu zan hen angar ugen, i yilan ér Emou. Angar ne gba ica a Yerusalem kuma er umai utaankaruhar* nahan.
14 Ve lu lamen sha akaa a a er ne cii.
15 Nahan er ve lu lamen sha akaa ne la, Yesu iyol na va kohol ve, gba zenden yemen a ve imôngo.
16 Kpa ve fatyô u fan ér ka un ga.
17 Tsô a pine ve ér: “Ka nyi akaa ne lu ôron yughur yughur yemen nahana? Maa ve tile, ve gema ve kenger zunguluu.
18 Ugen ken a ve, i yilan un ér Keliopa, gema pine un ér: “U ngu orvannya ken Yerusalem shi u ngu hen ya we tswene, shin u fe akaa a a sember eren ne ga?”
19 A pine ve ér: “Ka nyi akaa?” Ve kaa a na ér: “Ka akaa a sha kwagh u Yesu, Ornasareti, u mkaanem nam man ieren na sha ishigh ki Aôndo kua ior cii tese ér ngu profeti u ageegh la,
20 man er upristi mba tamen kua mbahemen kôr un na, i ôr un ijir i kure ér i wua un, maa ve za mande un sha kon yô.
21 Man yange se lu veren ishima ser ka or ne una yima Iserael ye. Shi bee kera yô, akaa ne cii er ayange kar ka atar je ne.
22 Shi kasev mbagenev ken a vese ôr se kwagh u kpiligh se iyol; ve za hen uwar la nyian pepe pepe
23 kpa ve zua a ikyom na ga, ve hide ve va ôr se er ve nenge a kwagh u kpiligh ve iyol yô, ve nenge a mbatyomov, ve kaa a ve ér, ngu uma.
24 Nahan mbagenev mba ve lu a vese la, za hen uwar shon, ve za nenge akaa a kasev mbara ôr la lu nahan vough, kpa un yô ve nenge a na ga.”
25 Nahan a kaa a ve ér: “Kpash! Ne mba kaven kwagh ga mba ka ne timbir u nan akaa a uprofeti ve ôr la cii jighjigh ne!
26 Kera lu u Kristu una ya atsan ne cii keng man una nyôr ken iengem* na ye gaa?”
27 Tsô a gba pasen ve akaa a i nger sha kwagh na ken Ruamabera la cii, hii sha akaaôron a Mose kua Uprofeti cica cii.
28 Tsô ve va zurum hen angar u ve lu zan her la, maa a er inja er a soo u karen yemen nahan.
29 Kpa ve zamber a na ér a de yemen ga, ve kaa ér: “Tsa vea vese, iyange ngi zan u been, ica a gba ga tsô tugh mbua ile.” Tsô a nyôr sha u una tsa vea ve yô.
30 Tem kwaghyan vea ve sha tebul yô, a tôô kpenberedi, a er msen* maa a coon a gba karen ve.
31 Maa baver ve, ve kav un, kpa a ndiir ve ashe.
32 Tsô ve gba kaan ker a ayol a ve ér: “Ashen asema a lu yeghen se a yegh zum u a lu lamen a vese sha gbenda, pasen se Ruamabera* wanger wanger la gaa?”
33 Maa ve mough hen shighe* la je ve hide ken Yerusalem, ve va zua a Mbapuekarmôm mbara man mba ve kohol a ve imôngo la,
34 lu mba ve vande kaan ér: “Mimi je i nder Ter shin ku, shi a ande hen Shimon!” la.
35 Tsô ve pase akaa a a er ve sha gbenda la, man er ve va mase kaven un shighe u coon beredi yô.
36 Er ve lu ôron akaa ne zan a mi ave la, Yesu iyol na va ande, tile hen atô ve, kaa a ve ér: “Bem a lu sha a ven.”
37 Kpa er cier ve iyol kpishi shi ishima lu tan ve kwe yô, lu ve er ka jijingi ve lu nengen a mi nahan.
38 Tsô a kaa a ve ér: “Er nan ishima i lu zan ne iyolo, man er nan ne lu tan akperan ken asema a ene?
39 Nenge nen ave am man angahar a am, ka mo iyol yam; bendem nen ave iyol nenge nen, jijingi lun a inyam man akuhe, er ne nenge m lu a mi nahan ga.”
40 Kaan nahan yô, a tese ve ave na kua angahar a na.
41 Kpa ve lu a na jighjigh ga, sha ci u saan ve iyol shi lu kpiligh ve iyol her, maa a kaa a ve ér: “Ne mba a kwaghyanaa?”
42 Nahan ve na un ishu i anen,
43 maa a ngohol i a ya sha ashe a ve je.
44 Tsô a kaa a ve ér: “Ka mkaanem ma yange m ôr a ven shighe u m lu vea ven her la je ne. Yange m kaa mer, gba u akaa a i nger sha kwagh wam ken Atindi a Mose man ken ityakeda i Uprofeti kua Upasalami la cii aa kure sha mi keng.”
45 Tsô a bugh ve asema wang u kaven inja i akaa a i nger ken Ruamabera la,
46 a kaa a ve ér, “Kape yange i nger je la: ér gba u Kristu una ya ican shi una nder shin ku sha iyange i sha utar la,
47 man ka ken iti na je a pase ior mba ken akuraior cii er i gbe u vea gema ishima, nahan a de ve asorabo ye; a hii ken Yerusalem je.
48 Ne lu mba eren shiada sha akaa ne.
49 Man nenge, m ngu tindin ne a kwagh u Terem yange tôndo zwa la. Nahan kpa, lu nen ken gar zan zan ne va kar zuan a tahav mbu mbu dugh sha la.”
50 Tsô a due a yem a ve zan zan, a za ar ken Betani, maa a kende ave sha, a sôn iveren sha ci ve.
51 Er lu sônon iveren zan a mi ave la, a undu ve, i tôô un i yem a na sha.
52 Tsô ve gure inya ve na un icivir, maa ve hide ken Yerusalem, saan ve iyol tsung.
53 Ve za hemen u lun ken tempel, wuese Aôndo.
Ngeren mba shin kpe
^ Ka iyange i se yer hegen ser Lahadi la. Hen Mbayuda yô, lu iyange i hiihii ken kasua je la.
^ Kuma ér ukilomita 11 nahan. Zwa Grika, “usitediom 60.” Sitediom môm yange a lihe i kuma umita 185 (angahar 606.95).
^ Shin “una zua a icivir.”
^ Shin “a sôn iveren.”
^ Zwa Grika, “bughun Ruamabera.”
^ Zwa Grika, “hen ihwa.”
