Marku 10:1-52
10 Tsô a mough heela, a per Yordan a va hen anijiir ugen ken akighir a haregh u* Yudia, nahan ikpelaior shi va kohol hen a na. Maa shi a gba tesen ve, er vanden eren nahan.
2 Tsô Mbafarishi za va u va karen un, nahan ve pine un aluer ka u or a fatyô u paven ivaa a kwase u nan yô.
3 A pine ve ér: “Mose yange wa ne tindi ér nyi?”
4 Ve kaa ér: “Mose yange na ian i ngeren kwase takeda u paven ivaa, shi paven ivaa a nan.”
5 Kpa Yesu kaa a ve ér: “Ka er ne lu ior mba norom sha kwagh yum ve, Mose yange nger ne tindi ne ye.
6 Kpa sha igbetar je, ‘A gba ve, lu nomsoor man kwase.
7 Sha ityôkyaa ne yô, or nana undu ter u nan kua ngô u nan,
8 nahan or la man kwase u nan vea hingir iyol i môm,’ ve kera mba uhar ga, kpa ka iyol i môm.
9 Nahan kwagh u Aôndo a zough yô, or a de paven ga.”
10 Shi mba va nyer ken iyou yô, mbahenen gba pinen un kwagh sha kwagh ne.
11 Nahan a kaa a ve ér: “Aluer or pav ivaa a kwase u nan, nan za er kwase ugen yô, or la nan er idya, nan er kwase u nan la kwaghbo.
12 Shi aluer kwase pav ivaa a nom u nan, nan za er nom ugen yô, kwase la nan er idya.”
13 Tsô ior gba van un a mbayev mba kiriki ér a penda ve ave iyol,* kpa mbahenen zôhô a ve.
14 Yesu nengen nahan yô, ishima vihi un, a kaa a ve ér: “De nen mbayev mba kiriki ve va hen a mo; de yangen nen ve ga, sha ci u ka amba ne je Tartor u Aôndo u lu sha ci ve ye.
15 Mimi je me kaa ne, aluer or hide a iyol i nan ijime er wanye u kiriki nahan, nan lumun Tartor u Aôndo ga yô, mayange je nana nyôr ken u ga.”
16 Tsô a kuve mbayev mbara, a gba pendan ve ave iyol, haan ve iveren.
17 Ngur yemen yô, orgen za yevese va gure inya sha ishigh nagh maa pine un ér: “Ortesen u Dedoo, ka nyi i gbe u me er ve me zua a uma u tsôrono?”
18 Yesu kaa a na ér: “Er nan u yerem wer or u dedoo? Or u dedoo môm ugen ngu ga, saa Aôndo tseegh.
19 U fa atindi kaa ér: ‘De woo or ga, de eren idya ga, de iin ga, de eren shiada u aiegh ga, de ngohol or kwagh sha anyighe ga, naan teru man ngôu icivir.’”
20 Or la kaa a na ér: “Ortesen, atindi ne cii, m hii u kuran a iyev je.”
21 Yesu gem kenger un yô, a doo un ishima, nahan a kaa a na ér: “Kwagh shi u môm: Yem za tee akaa a u lu a mi la cii gema inyaregh na mbaatsanev, tsô u lu a kwagh u injaa sha, nahan va dondom.”
22 Kpa mkaanem nam man na or la ure tsung, maa a kar sha a ishimavihin, sha ci u lu a inyaregh kpishi.
23 Yesu gema kenger ior, maa kaa a mbahenen nav ér: “A taver kpishi u mbanyarev ve nyôr ken Tartor u Aôndo!”
24 Kpa kwagh u ôr ne kunda mbahenen iyol. Tsô Yesu kaa ér: “Mbayev av, taver u nyôron ken Tartor u Aôndo tsô!
25 Hemba kan zange u rakumi a̱ nyôr hen ihyura i anula, a u ornyar nana̱ nyôr ken Tartor u Aôndo.”
26 Maa hemba kundan ve iyol cii, ve pine ér: “Ka an je a fatyô u yiman nana?”
27 Yesu kenger sha a ve jighilii maa kaa ér: “Sha mnenge u ior yô, kwagh a fatyô u lun nahan ga, kpa Aôndo yô nenge nahan ga, sha ci u Aôndo una fatyô u eren akaa cii.”
28 Tsô Peteru kaa a na ér: “Nenge! Se undu akaa ase cii se dondo u.”
29 Yesu kaa ér: “Mimi je me kaa ne, hanma or u nan undu ya shin anmgbianev mba nomso shin mba kasev, shin ngô shin ter shin ônov shin ishule sha ci u iti yam man loho u dedoo yô,
30 nana zua a akaa ne hegen a hemba nahan kwa 100: uya man anmgbianev mba nomso man mba kasev man ungô man ônov man ishule, shi a tôv nan a ican, shi ken tar u he la* nana zua a uma u tsôron.
31 Kpa ior kpishi mba ve lu mba hiihii la vea va hingir mba masetyô, mba masetyô di vea hingir mba hiihii.”
32 Zum u ve lu sha gbenda u zan sha Yerusalem yô, Yesu lu yemen ve sha hemen, nahan cier mbahenen iyol, shi mba ve lu sha gbenda vea ve la kpa mciem gba ve iyol. Tsô shi a ta ibyalegh a Mbapuekaruhar mbara, a gba ôron ve akaa a a sôôn eren un ne, ér:
33 “Nenge! Se mba zan sha Yerusalem, nahan a za na Wan u or sha ikyev i upristi mba tamen man mbangerenatindi. Vea ôr un ijir vea kure ér i wua un, maa vea gema un vea na sha ikyev i ior mba ken atôatyev,
34 vea naha un tar shi vea ta un azer iyol shi vea gbidye un shi vea wua un. Kpa ayange a karen atar yô, una nder shin ku.”
35 Tsô Yakobu man Yohane, ônov mba Sebedeu va kohol un kaa a na ér: “Ortesen, se soo ser ma u er se hanma kwagh u a sar se cii.”
36 A pine ve ér: “Ka nyi ne soo ner m er ne?”
37 Ve kaa a na ér: “Na se ian i teman vea we imôngo ken iengem you, or môm ken uwegh ou ku iyanegh, orgen ken uwegh ou ku imesegh.”
38 Kpa Yesu kaa a ve ér: “Ne fa kwagh u ne lu sônon la ga. Ne fatyô u man shin kôôpu u* m lu man shimi la, shin eren batisema u i lu eren mo la kpa?”
39 Ve kaa a na ér: “Se fatyô.” Maa a kaa a ve ér: “Ka mimi, ne va ma shin kôôpu u m lu man ne, shi a va er ne batisema u i lu eren mo la.
40 Kpa u teman mo ken uwegh ku yanegh man ku imesegh la yô, ka mo me na zwa ga, sha ci u ka mba i tsough ve la vea tema ye.”
41 Mba pue mbagenev mbara mba ongo kwagh ne yô, ishima vihi ve a Yakobu man Yohane.
42 Kpa Yesu yila ve kaa a ve ér: “Ne fa, utor mba tar ne ka ve eren tahav sha ior vev, shi uzegembaiorov kpaa ve tesen mhembe sha ior vev.
43 Ne yô, gba u ne lu nahan ga. Kpa or u nan soo u lun or u hemban ken a ven yô, a gba u nana lu or u eren ne tom.
44 Shi hanma or u nan soo u lun or u hiihii ken a ven yô, a gba u nana lu kpan wen cii.
45 Sha ci u Wan u or je kpa va ka sha u i er un tom ga, kpa ka sha u eren mbagenev tom shi nan uma na sha u paan ior kpishi.”
46 Tsô ve va nyôr ken Yeriko. Kpa ngur duen ken Yeriko, un man mbahenen nav kua ikpelaior kpishi yô, orapirashe ugen u sônon ior kwagh yô, iti na ér Batimeu (wan u Timeu), tema hen kpegbenda.
47 Ongo ér ka Yesu Ornasareti yô, a gba ôron genger genger ér: “Yesu, Wan u Davidi, zungwem mhôônom!”
48 Tsô ior kpishi gba vendan a na, kaan ér a cir zwa, kpa lu hemban ôron genger genger cii ér: “Wan u Davidi, zungwem mhôônom!”
49 Yesu maa tile kaa ér: “Yila un a va.” Maa ve yila orapirashe shon, ve kaa a na ér: “Taver ishima! Mough sha; ngu yilan we.”
50 Maa a ér ikyondo i haa iyol la, a ta kera, a kighir fese a mough a za ape Yesu lu la.
51 Yesu maa pine un ér: “Ka nyi u soo wer m er u we?” Orapirashe la kaa a na ér: “Raboni,* ma u bughum ashe.”
52 Yesu maa kaa a na ér: “Yem. Ka sha jighjigh u nan wou la ashe a bugh u ye.” Nahan her je a hingir u nengen, maa a hii u dondon un ijime sha gbenda la je.
Ngeren mba shin kpe
^ Shin “sha uboda mba.”
^ Shin “a haa ve iveren.”
^ Shin “ken kov u ua va la.” Nenge Ngeren u Pasen Asember, “Kov.”
^ Shin “iyongo i.”
^ Inja na yô ér, “Ortesen.”
