Marku 16:1-8
-
I nder Yesu shin ku (1-8)
16 Iyange i Memen karen kera yô, Maria Madalina man Maria ngô u Yakobu, kua Salome yam akaa a human doon ér vea va shighe sha ikyom na.
2 Nahan ve mough pepe pepe sha iyange i hiihii ken kasua,* ve va hen uwar shon.
3 Ve lu pinen ayol a ve ér: “Man ka an nana menger se iwen i sha zwa uwaregh ne kera?”
4 Kpa mba kenger yô, ve nenge i menger iwen la kera, shin er i kehe kpishi nahan kpaa.
5 Mba nyer ken uwar shon yô, ve nenge gumor ugen tema vegher u ken uwegh ku yanegh, hua ikyondo i pupuu, nahan iondo kura ve iyol.
6 A kaa a ve ér: “De cie nen ga. Ka Yesu Ornasareti u i mande un sha kon la ne lu keren ye. I nder un shin ku. Ngu heen ga. Nenge nen, ka hen ijiir i yange ve gbir un je ne.
7 Kpa yem za ôr nen mbahenen nav kua Peteru ner, ‘Una vande yemen ken Galilia a ven. Ka ker ne za nenge a na ye, vough er yange ôr ne nahan.’”
8 Nahan mba dugh ken uwar la kera yô, ve yevese a akarkase iyol, shi kpiligh ve iyol kpishi. Ve lam a or môm ga, sha ci u mciem gba ve iyol.*
Ngeren mba shin kpe
^ Ka iyange i se yer hegen ser Lahadi la. Hen Mbayuda yô, lu iyange i hiihii ken kasua je la.
^ Ken uruamabera mbagenev mba yange i hii ngeren la, Loho u Dedoo sha Uwegh ku Marku kure hen mkaanem ma ivur i sha 8 ne.
