Marku 3:1-35
3 Shi kwagen la Yesu za nyôr ken shinagoge, nahan orgen gema lu ker u uma* uwegh yô.
2 Tsô ve haa ashe sha a na sha u vea nenge una bee or la uwegh sha Iyange i Memen yô. Una eren nahan yô, vea zua a ityôkyaa i nan un ibo.
3 Maa a kaa a or u uman* uwegh la ér: “Mough sha, va her atô heen.”
4 Maa a pine ve ér: “Ka nyi tindi a ne ian ér i er sha Iyange i Memene? Ka kwagh u dedoo shin ka kwagh u bo? Ka u waren uma shin ka u wuana?” Kpa ve bugh zwa ga.
5 Gem kenger ve cii yô, vanger var un ker; vihi un er asema a ve a cighir yô. Maa a kaa a or la ér: “Nalegh uwegh ou.” Tsô a nalegh ku, maa uwegh nagh hide lu dedoo.
6 Nahan Mbafarishi due yem, maa fese je ve za kohol mbapatii mba Herode ve gba eren mhen u bo sha a na, sha u vea wua un yô.
7 Kpa Yesu moughon shin kpe zegemnger vea mbahenen nav mba gbe yemen yô, ikpelaior i vesen i ken Galilia man Yudia dondo un ijime.
8 Shi ken Yerusalem man Idumea man Yordan yande la man ken Tiru man Shidon je kpa ikpelaior i vesen due va hen a na, zum u ve ungwa akaa kpishi a a lu eren la yô.
9 Tsô a kaa a mbahenen nav ér ve va un a tso u cuku una nyôr shimi, sha er ikpelaior la ia imbishi un ga yô.
10 Er lu been ior kpishi iangev yô, mba ve lu a iangev mbi vesen cii kase un sha u vea bende a na yô.
11 Ujijingi mba bov je kpa hanma shighe u vea nenge a na yô, ve gba inya sha ishigh nagh, ve ôr genger genger ér: “U ngu Wan u Aôndo.”
12 Kpa a venda a ve var var ér ve de pasen ior or u un lu ga.
13 Za unden sha uwo yô, a yila mba yange soo u yilan la, nahan ve va hen a na.
14 A tsua ve ve lu iorov 12, a yila ve ér mbaapostoli. Lu u vea zenden vea na shi una tindin ve vea za pasen loho u dedoo,
15 shi una na ve tahav mbu zendan azôv ken ior kera.
16 Iorov 12 mba a tsua la, lu Shimon, un u a na un iti ér Peteru la;
17 man Yakobu vea anmgbian na Yohane, ônov mba Sebedeu (yange na ve iti ér Uboanage, inja na yô ér “uidyuranmbauôn”);
18 man Anderia; Filibu man Batolomiu man Mateu; Toma man Yakobu, wan u Alefeu; Tadeu man Shimon, u i yilan ér ortseenshima la;
19 kua Yuda Isekarioti, u yange va tee un la.
Tsô a nyôr ken iyou,
20 maa ikpelaior la shi va cir her, je yô kwaghyan tsô kpa ve lu fan ityô u yan ga.
21 Mba hen tsombor na mba ongo nahan yô, ve due ve za ér vea za kôr un, sha ci u ve lu kaan ér: “A nyôr ihyundugh.”
22 Shi mbangerenatindi mba ve due ken Yerusalem ve va la kpa lu kaan ér: “Ngu a Belesebul,* nahan ka a zenda azôv ken ior kera sha tahav mbu tor u azôv la.”
23 Tsô a yila ve a gba ôron ve kwagh sha anzaakaa, ér: “A er nan Satan una zenda Satan kera?
24 Aluer tartor pav ker sha ihyom yô, tartor la ua gba;
25 ya kpaa, aluer a pav ker sha ihyom yô, ya la una fatyô u lun ga.
26 Shi aluer Satan mough num a iyol na, nahan a pav ker sha ihyom yô, una fatyô u lun ga, kwagh na bee a bee je.
27 Jighilii yô, or a fatyô u nyôron hen ya u or u taver iyol, iin nan akaa ga, saa nana vande kangen or u taver iyol shon. Ka er nana er nahan la ve, nana fatyô u kuran nan akaa hen ya ye.
28 Mimi je me kaa ne, akaa cii a fatyô u den ônov mba iorov, a lu nyityô isholibo ve er, shin nyityô kwagh ve ôr sha ilyahan kpaa.
29 Kpa or u nan laha icighan jijingi yô, mayange a de nan isholibo la ga, kpa nana ya ibo i isholibo i been mayange ga.”
30 Yange ôr kwagh ne sha ci u ve lu kaan ér: “Ngu a jijingi u bo.”*
31 Tsô ngô na man anmgbianev nav za va va tile ken won, ve tindi or ér nana za yila un.
32 Er ikpelaior tema kase un la, i kaa a na ér: “Nenge! Ngôu man anmgbianev ou mba nomso mba ken won, mba pinen we.”
33 Kpa a kaa a ve ér: “Ka an nan lu ngôm, man ka unô ve lu anmgbianev ava?”
34 Maa a gema a kenger mba ve tema ve kase un la, a kaa ér: “Nenge, ngôm man anmgbianev av mban!
35 Hanma or u nan eren ishima i Aôndo cii yô, nan ngu anmgbian wam u nomso man anmgbian wam u kwase man ngôm.”
Ngeren mba shin kpe
^ Shin “kpe.”
^ Shin “kpe.”
^ Ka, “Satan” je la.
^ Zwa Grika, “jijingi u hôngorough.”
