Marku 7:1-37
7 Kwagen la Mbafarishi man mbangerenatindi mbagenev mba ve mough ken Yerusalem yô, va kohol hen ape Yesu lu yô.
2 Tsô ve nenge mbahenen nav mbagenev lu yan kwagh a ave a hôngor, inja na yô, ve ôô ave* ga.
3 (Sha ci u Mbafarishi kua Mbayuda mbagenev cii, saa yange ve ôô ave i gba sha iniuwe man ve ya kwagh ye; ve lu dondon aeren a uter mba ngise la.
4 Shi yange vea za hide kasua kpa, saa ve ôô iyol cii ve ya kwagh ye. Aeren a uter agen kpa lu kpishi, a yange ve ngohol shi ve dondon yô, er u mirin* ukôôpu man ujôôgu man agbande a togula shin mnger nahan.)
5 Nahan Mbafarishi man mbangerenatindi mbara pine un ér: “Er nan ve mbahenen ou ve dondon aeren a ior mba ngise la ga, ve ye kwagh a ave a hôngor nahana?”
6 A kaa a ve ér: “Kwagh u Yesaia yange tsenga ôron sha a ven la zua sha ieren yen vough, ne mbawanatseregh mban, er i nger nahan, ér, ‘Ior mban mba nem icivir ka sha zwa, kpa asema a ve yô nga ica a mo.
7 Ka gbilin tsô ve civir mo ye, gadia ka atindi a ior ve tesen ye.’
8 Ka ne undu tindi u Aôndo, ne gema ne dondon aeren a ior.”
9 Shi a kaa a ve ér: “Ne fa u geman tindi u Aôndo tan kera sha er ne za hemen a aeren a uter enev yô.
10 U tesen ikyav yô, Mose yange kaa ér, ‘Naan teru man ngôu icivir,’ shi ‘Or u nan lam a ter u nan shin ngô u nan dang* yô, i wua nan.’
11 Kpa ka ne kaa ner, ‘Aluer or kaa a ter u nan shin ngô u nan ér: “Kwagh u m lu a mi u ma m wase u a mi la cii ka korban (inja na yô ér, ka iyua i nan Aôndo)” yô,’
12 nahan ne kera na nan ian i eren kwagh môm sha ci u ter u nan shin ngô u nan ga.
13 Sha nahan yô, ne gema kwaghôron u Aôndo hingir gbilinkwagh sha ci u aeren en a ityôô a ne tesen mbagenev la. Shi ne mba eren ambaakaa ne nahan kpishi.”
14 Tsô shi a yila ikpelaior va kohol hen a na, a kaa a ve ér: “Kegh nen ato a mo, ne cii, nahan kav nen inja i kwagh ne.
15 Ka kwagh u or nan ye la a hôngor nan ga, kpa ka akaa a a duen ken a nan la a hôngor nan ye.”
16 *——
17 Undun ikpelaior za nyer ken iyou yô, mbahenen gba pinen un kwagh u injakwagh la.
18 Nahan a kaa a ve ér: “Ne kpa ne kav ga er ve nahana? Ne fa er nyityôkwagh i or nan ye cii i hôngor nan ga kpa?
19 Sha ci u ka ken ishima ka a nyôr ga, kpa ka a yem shin uya, a za due a haa shin ihyungwa.” Inja na yô, lu kaan ér hanma kwaghyan cii ngu wang.
20 Shi a kaa a ve ér: “Ka kwagh u a duen ken or la a hôngor nan ye.
21 Gadia ka ken ishima mbamhen mba eren akaabo, er ijimba* kua iv man iwoo-or nahan, ka ve due ye,
22 kua idya man hua man afer a eren man icugh man aeren a ndôhôrshima,* man iyuhwe man u lahan Aôndo man u kenden a iyol sha kua ibumegh.
23 Aferakaa ne cii ka a due ken or, a hôngor nan.”
24 Tsô a mough heela a gba yemen hen haregh u Tiru man Shidon. Za sôôn her yô, a nyôr ken iyou, sha ci u soo ér or môm nana de fe ga, kpa ior fa.
25 Fese nahan, kwase ugen u wan na u kwase u kiriki lu a jijingi u bo yô, va gba un hen angahar.
26 Lu kwase Grika, u i mar un hen Fenishia, ken tar u Shiria yô. A gba zamber a na tsung ér a zenda jijingi u bo ken wan na u kwase kera.
27 Kpa a kaa a na ér: “De mbayev ve vande iden, sha ci u doo u tôôn kwaghyan u mbayev kenden ônov mba iwaav ga.”
28 Kpa kwase la kaa a na ér: “Orvesen, u ôr ka mimi, kpa nenge ase, ônov mba iwaav je kpa ka ve yaan avur a kwaghyan u mbayev mba kiriki ve lu yan la, shin ityô tebul.”
29 Maa a kaa a na ér: “Er u ôr nahan yô, gba yemen tsô; jijingi u bo la due ken wan wou u kwase kera.”
30 Tsô a hide a yem hen ya na a za kohol wan u kiriki la lu yaven sha gambe, jijingi u bo la due ken a na kera.
31 Yesu za moughon hen haregh u Tiru la ngur hiden yô, a kar ken Shidon hen tiôntar u Dekapoli* la, a va hen Zegemnger u Galilia.
32 Tsô i va un a orakondoato u faan ityô u lamen tsembelee ga yô. Ve zamber a na ér a penda un uwegh iyol.
33 Nahan a kar a na hen ikpelaior sha, a yem a na hen ape or lu ga yô, a za wa un ahôaveegh ken ato, shi a ta ijer, maa a bende un sha nombor.
34 Gem ashe kenger sha yô, a shir ishima foo, maa a kaa a na ér: “Efata,” inja na yô ér, “Bugh.”
35 Nahan ato na maa bugh, shi ikyer na kpa bugh, a hingir u lamen doo doo.
36 Maa a ta ve icin ér ve̱ de ôron or môm ga. Kpa er lu tan ve icin var var nahan kpaa, ve lu hemban zan un agwa cii.
37 Jighilii yô, yange kpiligh ve iyol tsung, nahan ve kaa ér: “A er akaa cii sha inja. Ngu a er mbaakondoato je kpa ve ungwan, shi a er mbakondonikyer ve lamen.”
Ngeren mba shin kpe
^ Ka, “u ôôn ave er Mbayuda ôôn la” je la.
^ Zwa Grika, “er batisema u.”
^ Shin “nan laha ter gayô ngô u nan.”
^ Ivur ne ngi ken uruamabera mba tsuaa mbagenev mba yange i hii ngeren sha ave la ga, nahan kwagh ne tese ér ka mkaanem ma ken Ruamabera u Aôndo yange na i nger la ga.
^ Zwa Grika, porneia (ponia). Nenge Ngeren u Pasen Asember.
^ Shin “dang u eren.” Ka ishember i ken zwa Grika i i yer ér aselgeia (asejia) la. Nenge Ngeren u Pasen Asember.
^ Shin “Haregh u Lun a Agar Pue.”
