Marku 9:1-50
-
I gema mluyol u Yesuv (1-13)
-
I zenda azôv ken wannomso u azôv nzughul a na yô (14-29)
-
Hen or u nan ne jighjigh yô, akaa cii a fatyô u eren (23)
-
-
Shi i tsengaôron ku u Yesu (30-32)
-
Mbahenen gba anyiman sha kwagh u or u nan hembe yô (33-37)
-
Or u nan hendan a vese ga yô, nan ngu or wase (38-41)
-
Akaa a nan gbeev mbu nôngon (42-48)
-
“Lu nen bar” (49, 50)
9 Shi a kaa a ve ér: “Mimi je me kaa ne, mbagenev ken mba ve til heen ne vea nenge a ku ashe ga, zan zan vea vande nengen Tartor u Aôndo ua hii u hemen.”
2 Ayange nga karen ataratar yô, Yesu mough a Peteru man Yakobu man Yohane yem a ve sha uwo u taven tsung, ve za lu her ve tseegh. Tsô ve nenge i gema mluyol na;
3 akondo a a haa iyol la hii u engem, zan zan va kungu segh segh je or u kiren akondo môm shin tar nana fatyô u kiren a kungun nahan ga.
4 Shi ve nenge Eliya vea Mose lu lamen a Yesu.
5 Maa Peteru kaa a Yesu ér: “Rabi, doo kpishi er se lu heen yô. De se tim utenti utar heen, u môm sha ci wou, ugen sha ci u Mose, ugen di sha ci u Eliya.”
6 Jighilii yô, yange fa kwagh u una ôr ga, sha ci u cier ve iyol kpishi.
7 Tsô ibyeenegh wa cir ve, maa imo due ken ibyeenegh kira kaa ér: “Ngun ka Wan wam u ishima ishima. Ungwan nen un.”
8 Ica i gbe ga yô, ve nenge orgen môm kera lu vea ve ga, mase shin Yesu tseegh.
9 Mba ngur hungwan sha uwo la yô, a ta ve icin gbang gbang ér ve de ôron or môm kwagh u ve nenge la ga, zan zan saa a va nder Wan u or shin ku.
10 Ve lu a mkaanem mara ken ishima,* kpa ve lu pinen ayol a ve inja i kwagh u mnder u shin ku u a ôr la.
11 Nahan ve gba pinen un ér: “Er nan ve mbangerenatindi ka ve kaa ér gba u Eliya una vande vana?”
12 A kaa a ve ér: “Ka mimi, Eliya ngu van, shi una va sôr akaa cii; kpa kwagh ne zua sha kwagh u i nger sha Wan u or ér gba keng u una ya atsan kpishi shi a hee un la nena?
13 Kpa me kaa ne, jighilii yô, Eliya vande van kera, shi ve er hanma kwagh u ve soo cii a na, vough er i nger kwagh na nahan.”
14 Mba va nyer ape mbahenen mbagenev lu la yô, ve nenge zegeikpelaior kase ve, shi mbangerenatindi lu nyiman kwagh a ve.
15 Kpa ikpelaior la cii nengen a na yô, kpiligh ve iyol, maa fese je ve yevese ve za u za sughun un.
16 Tsô a pine mbahenen nav ér: “Ka nyi ne gbe anyiman sha mi vea ve?”
17 Maa orgen ken ikpelaior la kaa a na ér: “Ortesen, m va a wan wam u nomso hen a we sha ci u jijingi ugen ngu ken a na, u a kondo un ikyer yô.
18 Ka una mough un yô, a ta un inya, nahan a mbua hugh zwa shi a wuan anyi, shi a vôr kpishi. M kaa a mbahenen ou mer ve zenda un ken a na kera, kpa ve fatyô ga.”
19 Yesu gema kaa a ve ér: “Kpash! Kov u banen a jighjigh ne. Me lu a ven a kuma shighe nan je man ne lu a jighjigh u nan sha wono? M̱ wa ishima a ven i̱ kuma nan je? Vam a na.”
20 Tsô ve va a wannomso la hen a na, kpa jijingi la nengen a na je maa, a er wan la gba ikyungu. Wan la gbe hen inya yô, a gba viligh iyol inya, mbuan hugh zwa.
21 Tsô Yesu pine ter na ér: “Kwagh ne hii un kuma shighe nena?” A kaa ér: “Yange hii un shighe u lu wanye cuku la je,
22 man ashighe kpishi ka a er un a gba sha atse man shin mnger kpaa, ér a̱ kpe. Kpa aluer u fatyô u eren ma kwagh sha mi yô, zungwe se mhôônom, wase se.”
23 Yesu kaa a na ér: “Er nan u kaa wer ‘aluer u fatyô yô’? Gadia or u nan ne jighjigh yô, nan nengen ér akaa cii a fatyô u eren.”
24 Fese je maa ter u wan la ôr taver taver ér: “M na jighjigh! Kpa wasem m seer lun a jighjigh u nan!”
25 Yesu nengen ikpelaior ngur yevese van hen ape ve lu la yô, a yange jijingi u bo la taver taver, a kaa ér: “We jijingi u kondon or ikyer man ato ne, m ngu kaan a we mer, due ken a na kera, shi mayange de kera hiden nyôron ken a na ga!”
26 Wan la ngoron shi gbe ikyungu acin imôngo yô, jijingi la due ken a na kera, maa a hingir er a kpe nahan, je ior kpishi lu kaan ér: “A kpe ve!”
27 Kpa Yesu za kôr un sha uwe, mough a na, maa a tile sha.
28 Yesu karen za nyer ken iyou yô, mbahenen nav va ve tseegh va pine un ér: “Er nan man se se fetyô u zendan jijingi shon ken a na kera ga?”
29 A kaa a ve ér: “Ka sha msen tseegh imba ne ka i due kera ye.”
30 Tsô ve mough her ve gba karen ken Galilia yemen, kpa soo ér or môm nana fa kwagh sha mi ga.
31 Gadia lu tesen mbahenen nav, ôron a ve ér: “Ka u a za zua zwa a na Wan u or sha ikyev i ior, vea wua un, man er a wua un nahan kpa, ayange a karen atar yô, una nder shin ku.”
32 Kpa ve kav inja i kwagh u ôr ne ga, shi cier ve iyol u pinen un kwagh sha mi.
33 Tsô ve va nyôr ken Kapenaum. Nyer ken iyou yô, a pine ve ér: “Ka nyi ashen ne gbe anyiman sha mi sha gbenda?”
34 Ve bugh zwa ga, sha ci u ve gba anyiman sha gbenda sha kwagh u or u nan hembe ken a ve yô.
35 Tsô a tema inya, a yila Mbapuekaruhar mbara a kaa a ve ér: “Aluer or soo u lun or u hiihii ken a ven yô, a gba u nana lu or u masetyô ken a ven cii, shi nana eren ne cii tom.”
36 Maa a va a wanye u cuku a va tile a na hen atô ve; a penda un ave sha akende, maa a kaa a ve ér:
37 “Hanma or u nana ngohol wanye u cuku er ngun nahan ken iti yam yô, ka mo je nan ngohol ye; shi hanma or u nana ngohol mo yô, nan ngohol ka mo tseegh ga, nan ngohol Un u a tindim la kpaa.”
38 Yohane kaa a na ér: “Ortesen, se nenge orgen lu zendan azôv ken ior kera ken iti you, nahan se nôngo ser se yange un, sha ci u ngu or wase ga.”
39 Kpa Yesu kaa a na ér: “De yangen nen un ga, sha ci u or môm u nana er ivande ken iti yam ve nana fatyô u hiden fese ôron ma kwagh u dang sha mo je kpa nan ngu ga.
40 Sha ci u or u nan hendan a vese ga yô, nan ngu or wase.
41 Shi hanma or u nana na ne kôôpu u mnger ér ne ma sha ci u ne mba ior i Kristu yô, mimi je me kaa ne, nana ngohol injar i nan keng a bunde ga.
42 Kpa hanma or u nana na môm ken mba hiden a iyol ijime mba ve nem jighjigh ne gbeev mbu nôngon yô, guda u ma i zer imbaor la zegenase* sha mon, ma i gbihi nan shin zegemnger.
43 “Aluer uwegh ou ku nan we gbeev mbu nôngon yô, tôndo ku kera. Guda war a uwegh môm, a u i gbihi u a ave ou ahar cii ken Gehena,* ken usu u a fatyô u pirin u ga la.
44 *——
45 Shi aluer nguhar wou ku nan we gbeev mbu nôngon yô, tôndo ku kera. Guda war a nguhar môm, a u i gbihi u a angahar a ou ahar cii ken Gehena la.
46 *——
47 Shi aluer ishe you ngi nan we gbeev mbu nôngon yô, dugh i ta kera. Guda nyôr ken Tartor u Aôndo a ishe i môm, a u i gbihi u a ashe ou ahar cii ken usu u Gehena,*
48 ape ijôô i̱ kpen ga, shi usu u pirin ga la.
49 “A haa usu sha hanma or, er ka i haa bar sha kwaghyan nahan.
50 Bar doo, kpa aluer bar kera nyoho ga yô, ka nyi ne haa sha mi ve una hide a nyohoo? Lu nen bar, nahan lu nen ken bem a hanmô wen.”
Ngeren mba shin kpe
^ Shin a fatyô u kaan ér, “ve ôr kwagh a mi ga.”
^ Nenge Ngeren u Pasen Asember, “Nase.”
^ Nenge Ngeren u Pasen Asember.
^ Ivur ne ngi ken uruamabera mba tsuaa mbagenev mba yange i hii ngeren sha ave la ga, nahan kwagh ne tese ér ka mkaanem ma ken Ruamabera u Aôndo yange na i nger la ga.
^ Ivur ne ngi ken uruamabera mba tsuaa mbagenev mba yange i hii ngeren sha ave la ga, nahan kwagh ne tese ér ka mkaanem ma ken Ruamabera u Aôndo yange na i nger la ga.
^ Nenge Ngeren u Pasen Asember.
