Mateu 22:1-46
22 Yesu shi gba ôron ve kwagh sha anzaakaa kaan ér:
2 “A fatyô u tôôn Tartor u sha karen sha tor ugen u yange er wan na u nomso iniongo i ivesegh yô.
3 A tindi ikpan na za kaa mba i lehe ve iniongo i ivesegh la, kpa ve soo u van ga.
4 A shi a tindi ikpan igen, a kaa a i ér, ‘Za kaa nen mba i lehe ve la ner: “Nenge, m yôr iwer, m sôngo ibua yam kua ilev mbi kehen, i er hanma kwagh i ver a ver. Yô, va ase nen iniongo i ivesegh ne.”’
5 Kpa ve wa ikyo ga, ve yem eren akaa a ve. Mbagen yar ityom ve, mbagenev di yem u eren kasua.
6 Kpa mbagen cii kôr ikpan na la, nzughul a ve, shi wua ve.
7 “Tsô ishima vihi tor la tsung, nahan a tindi ushoja nav za wua mbawuanior mbara shi nande gar ve la.
8 Maa tor la kaa a ikpan na ér, ‘I wa iyol sha iniongo i ivesegh ne i bee, kpa ior mba i lehe ve la kuma u van i ga.
9 Nahan yô, za nen sha igbenda i vesen, za lôhô nen hanma or u ne zough a nan cii nana va iniongo i ivesegh ne.’
10 Tsô ikpan la due sha igbenda za va a hanma or u ve zua a nan cii, mbaaferev kua ior mba dedoo kpaa. Nahan ior iv ken iyou i iniongo i ivesegh la poo, lu yan kwagh.
11 “Tor la ve u va nengen mba ve va iniongo la yô, a nenge a orgen u hua ikyondo i iniongo i ivesegh ga yô.
12 Maa a pine un ér, ‘Orne, u hua ikyondo i ivesegh ga, man u kar han ve u nyer hen ijiir nee?’ Or la zua a kwagh u ôron ga.
13 Tsô tor la kaa a mba eren un tom ér, ‘Kange un nen ave man angahar, kende un nen ken ime, ken won, ape una vaa je una wua anyi* yô.’
14 “Gadia i lôhô ior kpishi, kpa ka kpuaa tseegh i tsough ye.”
15 Tsô Mbafarishi yem idyu gba za henen kwagh u vea er ve vea kôr un a ikyaa zwa yô.
16 Maa ve tindi mbahenen vev a mbapatii mba Herode imôngo, ve va kaa a na ér: “Ortesen, se fa u ngu or u mimi shi u tesen ior gbenda u Aôndo sha mimi. U keren u doon ityough a or ga, sha ci u u nengen sha mlu u or u sha iyol la ga.
17 Yô kaa ase se yôô, u nenge nena? U tan Shisar kpandegh la ka shami* shin ka shami ga?”
18 Kpa Yesu kav ifer ve la, nahan a kaa ér: “Er nan ne karen mo? Ne mbawanatseregh mban!
19 Tesem nen gbenger azurfa u i te kpandegh a mi la.” Maa ve na un denariu* môm.
20 A pine ve ér: “Ka ikyav i ityough ki an i̱ lu sha mi nee? Man iti i i lu sha mi ne ka i ana?”
21 Ve kaa ér: “Ka i Shisar.” Maa a kaa a ve ér: “Nahan yô, na nen Shisar akaa a a lu a Shisar la, kpa akaa a a lu a Aôndo yô, na nen Aôndo.”
22 Mba ongo nahan yô, kpiligh ve iyol, tsô ve undu un ve yem.
23 Sha iyange shon la, Mbasadushi mba ve kaan ér mnder u shin ku ngu ga la, va pine un ér:
24 “Ortesen, Mose yange kaa ér: ‘Aluer or kpe man nan undu wan ga yô, anmgbian u nan a̱ tôô kwase u nan undu la, a̱ mar wan a mi sha ci u anmgbian u nan shon.’
25 Nomsombaiorov mbagenev utaankaruhar lu vea vese heen, ve lu anmgbianev. U hiihii la vôso kwase, kpa mar wan ga tsô kpe undu anmgbian na a kwase shon.
26 Anmgbian na u sha uhar la kpa va kpe nahan, u sha utar la kpa nahan, zan zan u sha utaankaruhar la kpa va kpe.
27 Ken masejime yô, kwase la kpa va kpe.
28 Nahan sha shighe u mnder u shin ku la, una lu kwase u an ken ve mba utaankaruhar mbara? Gadia hanma ve cii yange nan vôso un.”
29 Yesu gema kaa a ve ér: “Ne tsume, sha ci u ne fa Ruamabera ga, shi ne kav tahav mbu Aôndo kpaa ga.
30 Gadia a va nder ior shin ku yô, nomso vea er kasev ga, shi kasev kpa a na ve noov ga, kpa vea lu er mbatyomov mba shaav nahan.
31 Hide sha kwagh u nderen mbakpenev la yô, ne ôr mkaanem ma Aôndo yange ôr a ven la gaa? Yange kaa ér:
32 ‘M ngu Aôndo u Aberaham man Aôndo u Isaka man Aôndo u Yakob.’ Nahan un ka Aôndo u mbakpenev ga, kpa ka u mbaumav.”
33 Ikpelaior la ongo nahan yô, kpiligh ve iyol a ityesen na.
34 Mbafarishi mba ongo ér a sende Mbasadushi kera yô, ve za kohol ve va.
35 Maa môm ken a ve, u fa atindi tsema tsema yô, va kar un, a pine un ér:
36 “Ortesen, ken Atindi cii, ka tindi u han a lu u hemban ciili?”
37 A kaa a na ér: “‘Yehova* Aôndo wou a̱ doo u ishima kpee je, a ishima you cii man a uma wou cii man a mhen wou cii.’
38 Ka tindi u hemban cii man u hiihii je la.
39 Tindi u sha uhar u a lu er ngula nahan yô, ka un ne: ‘Or u nan we ndor a we nana̱ doo u ishima kpee je, er iyol you nahan.’
40 Atindi kua Uprofeti* cii har sha atindi a ahar ne.”
41 Tsô Mbafarishi mba va kohol imôngo yô, Yesu pine ve ér:
42 “Ka nyi ne henen sha kwagh u Kristu? Ka wan u ana?” Ve kaa a na ér: “Ka wan u Davidi.”
43 A gema a pine ve ér: “Tsô er nan ve jijingi yange mgbegha Davidi yila un ér Tere?
44 Yange kaa ér: ‘Yehova* kaa a Terem ér: “Temam ken uwegh ku yanegh zan zan me kar veren mbahyomov ou shin akevangahar a ou.”’*
45 Nahan, aluer Davidi yila un ér Ter yô, a er nan ve una lu wan u Davidi?”
46 Or môm tsô kpa fatyô u nan un mlumun ga, shi hii sha iyange la je or kera cihi shi pine un mpin ga.
Ngeren mba shin kpe
^ Ikyav i tesen ishimanyoon man ishimayinan.
^ Shin “ka sha tindi.”
^ Nenge Ngeren u Pasen Asember.
^ Nenge Ngeren u Pasen Asember.
^ “Atindi kua Uprofeti” ka Ruamabera u ken Zwa Heberu la jimin cii.
^ Nenge Ngeren u Pasen Asember.
^ Shin “me kar nan we tahav mbu hemban mbahyomov ou.”
