Mateu 23:1-39
23 Tsô Yesu ôr kwagh a ikpelaior man mbahenen nav kaa ér:
2 “Mbangerenatindi man Mbafarishi nenge ér ka ityesen i Mose la ve kpa ve tesen ye.
3 Sha nahan yô, eren nen hanma kwagh u ve kaa ne cii, kpa de dondon nen aeren a ve ga, sha ci u mba eren kwagh u ve kaan la ga.
4 Atindi a ve nga er ikyav mbi yuhwan mbi i tôô ior sha akende nahan, kpa ve ayol a ve yô, ve kegh iyol u benden ihyôwe ve sha mi ga.
5 Ityom i ve eren cii, ka ve eren i sha u ior ve nenge. Ka ve zer ankwagh u i we avur a ruamabera ker u hemban kehen la sha icul, ér a̱ lu kurayol* ve, shi ve tume ica i shin akur a akondo a ve kpa i hemba lihen.
6 Ka vea za hen iniongo yô, ve soo u teman sha ajiir a hemban doon la. Shi ka ve soo u teman sha mkônom ma sha hemen* ken ushinagoge.
7 Ka ve soo ér i̱ sughun ve sha icivir ken igbar,* shi i̱ yilan ve ér Rabi.*
8 Kpa ne yô, i̱ de yer ne ér Rabi ga, sha ci u Ortesen wen ngu môm, shi ne cii ne mba anmgbianev.
9 Heela tseegh ga, de yer nen or môm shin tar ne ner ter* ga, gadia Ter wen ngu môm tseegh, ka u a lu sha la.
10 Shi i̱ de yer mô wen ér orhemen ga, sha ci u Orhemen wen ngu môm tseegh, ka Kristu.
11 Kpa or u nan hembe ken a ven yô, a gba u nana lu or u eren ne tom.
12 Or u nan kenden a iyol sha yô, a hide a nan ijime, kpa or u nan hiden a iyol ijime yô, a kende a nan sha.
13 “Kwagh a tser ne, ne mbangerenatindi man Mbafarishi, ne mbawanatseregh! sha ci u ne mba yangen ior u nyôron ken Tartor u sha. Gadia ne ayol a en ne mba nyôron ga, shi ior mba ve soo u nyôron la kpa ne mba nan ve ian ga.
14 *——
15 “Kwagh a tser ne, ne mbangerenatindi man Mbafarishi, ne mbawanatseregh! sha ci u ka ne zende shin zegemnger man sha tar sha u keren ortyôtyev môm ner ne gema nan nana nyôr nongo a ven. Nana nyôron nongo a ven yô, ne na nan kuma u a va kende nan ken Gehena,* shi nan ya ibo i hemba ne kwa har.
16 “Kwagh a tser ne, ne mbaapirashe mba hemen ior! Ka ne kaa ner, ‘Aluer or bum tempel yô, ka kwagh ga; kpa aluer or bum zanaria u ken tempel yô, a gba u nana er sha kwagh u nan bum la keng.’
17 Ne mbalanenkwagh man mbapirinashe! Ka nyi i hembe gban kwagha? Ka zanaria shin ka tempel u a ne zanaria a hingir icighankwagh laa?
18 Shi ka ne kaa ner, ‘Aluer or bum atse a nan nagh yô, ka kwagh ga; kpa aluer or bum nagh ku i ne sha mi la yô, a gba u nana er sha kwagh u nan bum la keng.’
19 Ne mbaapirashe! Ka nyi i hembe gban kwagha? Ka nagh kura shin ka atse a a ne nagh ku shon ku hingir icighankwagh laa?
20 Nahan or u nan lu bumun atse a nan nagh yô, nan ngu bumun a kua hanma kwagh u a lu sha a cii.
21 Shi hanma or u nan lu bumun tempel yô, nan ngu bumun tempel la kua Un u i lu iyou na la.
22 Shi hanma or u nan lu bumun sha yô, nan ngu bumun ka ikyônough ki torough ki Aôndo, kua Un u a tem sha ki la.
23 “Kwagh a tser ne, ne mbangerenatindi man Mbafarishi, ne mbawanatseregh! sha ci u ka ne na môm-ken-pue u kunguraku man yiye kua kumin,* kpa akaa a a hembe lun hange hange a ken Atindi la yô, ne mba we a ikyo ga. A yô, ka ijirôron i mimi, man mhôônom ma zungwen man jighjigh. Gba u a er akaa la, kpa ka u a gema a undu a a hembe lun hange hange ne ga.
24 Ne mbaapirashe mba hemen ior! Ka ne kese ankaam ma purugh kera, kpa ne gema ne ma rakumi.
25 “Kwagh a tser ne, ne mbangerenatindi man Mbafarishi, ne mbawanatseregh! sha ci u ne mba er kôôpu shin gbande u i kire un ken won, kpa a lu kimi côu côu nahan. Ken atô yô, ne iv a hua man asaren a ne fetyô u kighir ga yô.
26 We Orfarishi u pirin ashe, vande kiren kôôpu shin gbande kimi, sha er ken won kpaa una hingir wang yô.
27 “Kwagh a tser ne, ne mbangerenatindi man Mbafarishi, ne mbawanatseregh! sha ci u ne mba er iwar i i te i penti u pupuu nahan. Ken won yô, ka i doo ashe tsô, kpa kimi yô, ka i gema i iv a akuhe a mbakpenev kua hanma inja kwagh i hôngorough cii.
28 Kape ne kpaa, ior ve nengen ér ne mba perapera je la, kpa kimi yô, ne iv a atseregh man ieren i vendan atindi.
29 “Kwagh a tser ne, ne mbangerenatindi man Mbafarishi, ne mbawanatseregh! sha ci u ka ne maa iwar i uprofeti shi ne er hwe sha iwar i mbaperapera,
30 ne kaan ner, ‘Yange sea lu sha ayange a uter asev mba tsev la yô, ma se nyôr nongo a ve sha u wuan uprofeti mban ga.’
31 Sha nahan yô, ne mba eren shiada sha ayol a en ner, ne mba ônov mba ior mba yange ve wua uprofeti la.
32 Yô, er nen ase kwagh u uter enev mba tsev lu er la, er ne fetyô la cii.*
33 “Ne íyô, ônov mba igbindev mban, a er nan man ne war ijir i Gehena* la sha wono?
34 Sha ityôkyaa ne yô, m ngu tindin uprofeti man mbatesen hen a ven. Né wua mbagenev ken a ve, né mande ve sha kon. Mbagenev di né gbidye ve ken ushinagoge enev shi né er ve atsan ken agar kposo kposo.
35 Nahan né ya ibo sha awambe a mbaperapera a i hee inya shin tar la cii, hii sha awambe a orperapera Abel zan zan ar sha awambe a Sekaria wan u Barakia, u ne wua un ken tempel hen atô u icighanjiir man atse a nan nagh la.
36 Mimi je me kaa ne, akaa ne cii aa er kov ne.
37 “Yerusalem, Yerusalem, we u u wuan uprofeti shi u tan mba i tindi ve hen a we awen ne! M nôngo acin imôngo mer me kohol ônov ou, er ngôkyegh ka a kohol ônov nav ken akper a na nahan! Kpa u soo ga.
38 Yô nenge, i undu ne a ya wen* ve.
39 Nahan me kaa ne, mayange ne kera nenge a mo ga, zan zan ne va kaa ner, ‘Saan un u a ve ken iti i Yehova* la iyol.’”
Ngeren mba shin kpe
^ Ka Anikpa u cuku u i we avur a ruamabera ker yô. Mbayuda mba nomso yange ve zer anikpa ne ér a lu ve kurayol.”
^ Shin “mkônom ma hemban doon.”
^ Zwa Grika, “ken ityembekasua.”
^ Inja na yô ér, “Ortesen.”
^ Yesu lu vendan ér i de yilan or ér ‘ter’ shin ‘fada,’ er i yilan mbahemenev mba ukwaghaôndo mbagenev nahan la ga.
^ Ivur ne ngi ken uruamabera mba tsuaa mbagenev mba yange i hii ngeren sha ave la ga, nahan kwagh ne tese ér ka mkaanem ma ken Ruamabera u Aôndo yange na i nger la ga.
^ Ijiir i yange i nanden ihyôghonov her ken akôngo a gar u Yerusalem yô. Nenge Ngeren u Pasen Asember.
^ Kumin kpa ka ilyôghonough ki human doon ki wan sha kwaghyan.
^ Zwa Grika, “iv ase nen ikyaren i uter enev mba tsev la.”
^ Nenge Ngeren u Pasen Asember.
^ Shin a fatyô u kaan ér, “i undu ya wen hingir ice.”
^ Nenge Ngeren u Pasen Asember.
