Mateu 24:1-51
-
IKYAV I TESEN ÉR KRISTU NGU VEA MBAHENEN IMÔNGO (1-51)
24 Tsô Yesu ngur duen ken tempel kera yô, mbahenen nav va kohol un ve gba tesen ave sha iyaagh ki tempel ér a nenge.
2 Kpa a kaa a ve ér: “Ne nenge akaa ne nahan kpiligh ne iyolo? Mimi je me kaa ne, awen ne cii, a va yôhôr a a haa inya. Iwen i môm kpa ia kera tema sha igen ga.”
3 Za tem sha Uwo u Olev yô, mbahenen nav va hen a na ve tseegh, ve va pine un ér: “Ôr ase se yôô, ka hanma shighe akaa ne aa ere? Man ka nyi ia lu ikyav i tesen ér u ngu vea vese imôngo* shi mkur u tar ne zurumu?”
4 Yesu gema kaa a ve ér: “Ver nen ishima, or a de tsughun ne ga,
5 sha ci u ior kpishi vea va ken iti yam, vea lu kaan ér, ‘M ngu Kristu,’ nahan vea tsugh ior kpishi.
6 Ne va ungwa kwagh u ityav mbi nôngon sha ajiir kposo kposo. Nahan kpa, i de cier ne iyol ga, sha ci u akaa ne aa er keng, kpa mkur una lu a va ga.
7 “Gadia ikyurior igen ia mough ityav a ikyurior igen, shi tartor ugen ua mough ityav a tartor ugen, shi ijen ia gba sha ajiir wue wue, shi tar ua tenger sha ajiir kposo kposo.
8 Akaa ne cii ka di mhii u ican* tsô.
9 “Sha shighe la, ior vea za a ven ér i tôv ne a ican shi vea wua ne, shi akuraior cii aa kôr ne ihyom sha ci u iti yam.
10 Shi ior kpishi vea undu jighjigh ve u nan,* shi vea hingir u nengen mbagenev mker shi kôron mbagenev ihyom.
11 Uprofeti mbaaiev kpishi vea due vea tsugh ior kpishi;
12 shi ifer* ia lu seer a seer, nahan dooshima u ior kpishi una ndôhôr.
13 Kpa or u nan taver ishima zan zan mkur la a yima nan.
14 Shi a pase loho u dedoo u Tartor ne a tser tar sha u u lu shiada hen akuraior cii, ka zum la mkur una va ye.
15 “Nahan zum u ne nenge kwaghndôhôrshima u van a mtim, u profeti Daniel ngise ôr kwagh na la, una tile ken icighanjiir yô (or u ôron* nana ver ishima sha er nana kav yô),
16 mba ve lu ken Yudia ve hii u yevese yemen sha iwo.
17 Or u nan lu sha ityough ki iyoughough* yô, nana̱ de hongo ér nana tôô ikyav ken iyou i nan ga.
18 Shi or u nan lu ken ityev kpaa nana̱ de hidi ér nana va tôô ikyondo i nan i haan iyol ga.
19 Sha ayange la, kwagh a tser kasev mba ve lu iyav man mba ve lu a anikyundanev sha ave yô!
20 Eren nen msen sha er a va gba u ne yevese sha shighe u wuhee* shin sha Iyange i Memen ga yô.
21 Gadia hen shighe la, zegecan una er, man a lu ican i i gbe tar je i lu a er ga yô, shi mayange je ia kera er ga.
22 Jighilii yô, luun er ka u a pande ayange la ga yô, or môm kpa ma i yima nan ga. Kpa sha ci u mba i tsough ve la yô, a pande ayange shon.
23 “Hen shighe la, aluer or kaa a ven ér, ‘Nenge! Kristu ngun,’ shin ‘Ngula!’ kpa de ne nen jighjigh ga.
24 Sha ci u Ukristu mbaaiev man uprofeti mbaaiev vea due vea er uivande man akaa a kpilighyol, sha u aluer ve fatyô yô, vea tsugh mba i tsough ve la je kpaa.
25 Nenge! m ngu tan ne icin sha akaa ne.
26 Nahan aluer ior mba kaan a ven ér, ‘Nenge! Ngu ken taaikyôngo,’ kpa de ze nen ga, shin ‘Nenge! Ngu ken iyou shin atô,’ kpa de ne nen jighjigh ga.
27 Gadia er inyiar ka i nyiar vegher u sha ityoughkitaregh i wanger zan zan i ar vegher u shin ityôtar nahan, kape a lu sha shighe u Wan u or una lu vea ven imôngo* la je la.
28 Ape kwagh u kpen a lu la, ka her uigyuve* vea kohol ye.
29 “Zegecan u sha ayange la una karen kera yô, fese je ime ia wa, sha ci u iyange ia kera due ga, uwer kpa ua ta ga, shi asan a sha aa osough aa gba; akaa a sha aa tenger.
30 Zum la ikyav i Wan u or ia due sha, nahan akuraior a shin tar cii aa zungwe je aa kera saan ga. Vea nenge Wan u or una gba van sha abeen a sha kwavaôndo a tahav man iengem i kpilighyol.
31 Tsô busa ua gba imo taver taver, nahan una tindi mbatyomov nav vea kohol ior nav mba a tsough ken avegher a tar a anyiin la cii imôngo, a hii ken ikighir i kwavaôndo vegher ne zan zan a ar ken ikighir i kwavaôndo vegher la.
32 “Nahan yô, hen nen kwagh ne sha kwagh u kon u tur: Ka ua ta gbaa u he shi ikya ia hiin u hômon sha mi yô, ne fa je ner fam zurum.
33 Ne kpa zum u ne nenge akaa ne cii aa nguren eren yô, fa nen je ner ngu ikyua, sha ihinda je.
34 Mimi je me kaa ne, kov ne ua kar kera ga zan zan akaa ne cii aa kar eren.
35 Sha man tar vea kar kera, kpa kwaghôron wam yô, una kar kera mayange ga.
36 “Kpa iyange la man ihwa la yô, or môm fa ga, mbatyomov mba shaav kpa fa ga, Wan kpa fa ga, ka Ter tseegh a fe ye.
37 Er lu sha ayange a Noa la nahan, kape a lu sha shighe u Wan u or una lu vea ven imôngo* la vough je la.
38 Sha ayange a Mngerem ma Deemee lu a va ga la, ior lu yan akaa shi man akaa. Nomso lu vôson kasev, shi i lu nan kasev noov, zan zan ar sha iyange i Noa nyôr ken tso la.
39 Kpa ve ver ishima ga zan zan Mngerem ma Deemee va kua a ve cii kera. Nahan kape a lu sha shighe u Wan u or una lu vea ven imôngo* la je la.
40 Zum la, iorov uhar vea lu ken ityev; a kua a u môm, a undu ugen.
41 Kasev uhar vea lu wuan kwagh sha nase; a kua a u môm, a undu ugen.
42 Nahan yô, kuran nen, sha ci u ne fa iyange i Ter wen una va la ga.
43 “Kpa fa nen kwagh ne: Aluer orya fa ihwa* i ormbaiv nana va yô, orya la nana lu kuran sha er a va pev nan iyou a nyôr ga yô.
44 Nahan yô, ne kpa wa nen iyol keghen nen a kegh, sha ci u Wan u or ngu van hen ihwa i ne hen ner una va ga yô.
45 “Ka an jighilii nan lu wanakiriki* u jighjigh man u fan kwagh, u orvesen u nan una wa nan mbashirentom* mba hen ya na cii sha ikyev, ér nana naan ve kwaghyan ve sha shighe voughlo?
46 A saan wanakiriki* la iyol, aluer orvesen u nan hide va kohol nan u eren nahan yô!
47 Mimi je me kaa ne, orvesen la una gema akaa a na cii una wa nan sha ikyev.
48 “Kpa aluer wanakiriki la nan er iferkwagh, nan kaa ken ishima i nan ér, ‘Orvesen wam timbir yum,’
49 nahan nan hii u gbidyen mbashirentom mbagenev shi yan kwagh shi man kwagh vea mbahundenmsôrom imôngo yô,
50 orvesen u wanakiriki la una za hide sha iyange i a ver ishima ga yô, shi a lu hen ihwa i a fe ga yô,
51 nahan una tsaha un je a doo ato ga,* una kende un ken ican i môm vea mbawanatseregh, ape una vaa je una wua anyi* yô.
Ngeren mba shin kpe
^ Nenge Ngeren u Pasen Asember, “Shighe u Kristu lun vea mbahenen imôngo.”
^ Ka er mnyoon u martoghor nahan.
^ Shin “vea nôngo gbeev.”
^ Zwa Grika, “ieren i vendan tindi.”
^ Ka, “kwaghôron u profeti Daniel la” je la.
^ Ayou kpishi yange i maa i za kondo a sha, nahan ityough ki iyoughogh ki lu a tembe sha mi, ior ve eren akaa atô kposo kposo sha mi.
^ Ken Iserael yô, ura ka u nôôn shi senou a haan hen shighe ne, nahan i lu ican u zan zende.
^ Nenge Ngeren u Pasen Asember, “Shighe u Kristu lun vea mbahenen imôngo.”
^ Uigyuve mbagenev mba ye kwagh u kpen.
^ Nenge Ngeren u Pasen Asember, “Shighe u Kristu lun vea mbahenen imôngo.”
^ Nenge Ngeren u Pasen Asember, “Shighe u Kristu lun vea mbahenen imôngo.”
^ Zwa Grika, “ihwa i utu.”
^ Zwa Grika, “kpan.”
^ Shin “mbatomov.”
^ Zwa Grika, “kpan.”
^ Zwa Grika, “una gber un atôôn ahar.”
^ Ikyav i tesen ishimanyoon man ishimayinan.
