Mateu 25:1-46
25 “A fatyô u karen Tartor u sha la sha kwagh u anuunaukase pue a yange tôô amenger a ve za u za keghen orkwasehe gbenda yô.
2 Mbautaan ken a ve lu mbalanenkwagh, mbautaan mbagenev mbara lu mbafankwagh.
3 Mbalanenkwagh mbara tôô amenger a ve, kpa ve tôô mkurem ga.
4 Kpa mbafankwagh mbara yô, ve tôô mkurem ken akpe kua amenger a ve.
5 Tsô er orkwasehe timbir u van yô, ve cii ashe yuhwa ve ikyôr, nahan ve gba mnyam.
6 Ka va lun ken atôutu yô, i gba yôôn angwe kaan ér: ‘Orkwasehe gba van ve! Due za kegh un nen gbenda.’
7 Nahan anuunaukase la cii mough sha gba tsaren amenger a ve.
8 Tsô mbalanenkwagh mbara gba kaan a mbafankwagh mbara ér, ‘Pande nen se mkurem enev mara, gayô amenger a ase nga nôngon u pirin.’
9 Mbafankwagh mbara gema kaa a ve ér: ‘Ka inja er se pande ne yô, ma a kera kuma se ga nahan. Guda yô, za nen hen mbateen, za yam nen ma enev.’
10 Mba ngur yemen u za yamen yô, orkwasehe va nyôr. Nahan anuunaukase a yange wa iyol lu keghen a kegh la nyôr vea na ken iyou i iniongo i ivesegh la, maa i wuhe hunda.
11 Ica i gbe ga yô, anuunaukase agen la za hide, gba va kaan ér, ‘Orvesen, Orvesen, bugh se hunda!’
12 A gema a kaa a ve ér, ‘Me ôr ne sha mimi, m fa ne ga.’
13 “Sha nahan yô, kuran nen, sha ci u ne fa iyange shin ihwa la ga.
14 “Gadia ka di vough er orgen u lu wan iyol i zan zende ken tar u icaa ve yila ikpan na, gema akaa a na wa ve sha ikyev la nahan.
15 A na u môm utalenti* utaan, ugen la utalenti uhar, ugen la di a na un talenti môm. A na hanma ve er agee a nan lu la, maa a yem ken tar u icaa.
16 Fese je maa u i na un utalenti utaan la yem za er kasua a mi, zua a liba sha mi utalenti utaan.
17 U yange ngohol uhar la kpa za er nahan, zua a liba sha mi uhar.
18 Kpa, kpan u i na un môm tseegh la yô, yem za time ihyungwa gema inyaregh ki* orvesen na la yer shimi.
19 “Tsô ka tse gbem yô, orvesen u ikpan la za hide va gba ve ceke sha u una fa kwagh u ve er a inyaregh ki shon yô.
20 Nahan u yange ngohol utalenti utaan la seer utalenti mbagenev sha mi utaan, va a mi va kaa ér, ‘Orvesen, yange u nam utalenti utaan, kpa nenge, m zua a liba sha mi utalenti utaan.’
21 Orvesen na kaa a na ér: ‘U er doo. U ngu kpan u jighjigh man u fan kwagh! U ngu jighjigh sha akaa kpuaa. Nahan me wa u akaa kpishi sha ikyev. Ember a orvesen wou imôngo.’
22 Tsô ugen u ngohol utalenti uhar la kpa za va, va kaa ér, ‘Orvesen, yange u nam utalenti uhar, kpa nenge, m zua a liba sha mi utalenti uhar.’
23 Orvesen na kaa a na ér: ‘U er doo. U ngu kpan u jighjigh man u fan kwagh! U ngu jighjigh sha akaa kpuaa. Nahan me wa u akaa kpishi sha ikyev. Ember a orvesen wou imôngo.’
24 “Tsô kpan u ngohol talenti môm la za ve yô, a kaa ér: ‘Orvesen, m fa, u ngu or u taver kwagh. Ka u sunda kwagh u u lee ga yô, shi u kura samuyia u i lu we u peer ga yô.
25 Nahan m cia aniyagh, m yem a talenti wou m za yer shin inya. Ngohol ase kwagh wou.’
26 Orvesen na la gema kaa a na ér: ‘U ngu kpan u wan ifer shi wan hwev. Wer ka m sunda kwagh u m lee ga shi m kura samuyia u i lu mo m peer ga yô, ka kwagh u u kaa laa?
27 Yô yange ma u za wam inyaregh kira* ken banke, nahan er m hidi ne ma m zough a mtsera sha mi.
28 “‘Nahan yô, ngohol nen talenti na la, gema na nen u a lu a utalenti pue la.
29 Sha ci u hanma or u nan lu a kwagh yô, a seer nan, nana lu a mi kpishi. Kpa or u nan lu a kwagh ga yô, kwagh u nan henen ér nan ngu a mi la je kpa a ngohol kera.
30 Nahan kende nen gbilin kpan la ken ime, ken won, ape una vaa je una wua anyi* yô.’
31 “Zum u Wan u or una va ken iengem na a mbatyomov nav cii imôngo la, una tema sha ikyônough nagh ki torough ki icivirigh.
32 A kohol ior mba ken akuraior cii sha ishigh nagh, una pav ior mbagenev una ver kposo a mbagenev, vough er orkuranilev ka nan pav iyôngo a ivo nahan.
33 Nahan una ver iyôngo ken uwegh nagh ku yanegh, kpa ivo yô, una ver i ken uwegh nagh ku imesegh.
34 “Maa Tor la una kaa a mba ve lu ken uwegh nagh ku yanegh la ér: ‘Va nen, ne mba Terem a lu nan ne iveren ne, ya nen dyako u Tartor. I ver sha ci wen hii sha shighe u i lu gban tar la je.
35 Sha ci u yange ne nam kwaghyan zum u ijen lu kôron mo yô, shi ne nam kwaghman zum u imura lu kôron mo yô. Shi yange ne fam ga, shi m lu a ijiir i tsan ga, kpa ne ngohol mo hen ya wen.
36 M lu idyelegh* kpa ne zerem ikyondo. M gba angev kpa ne nenge sha a mo. Shi m lu ken purusu kpa ne za nengem.’
37 Tsô mbaperapera mbara vea gema a pine un ér: ‘Tere, lu hanma shighe se nenge ijen kôr u ve se na u kwaghyan, shin imura kôr u ve se na u kwaghmana?
38 Man lu hanma shighe se nenge u lu a ijiir i tsan ga ve, se ngohol we hen ya wase, shin u lu idyelegh ve se zer u ikyondo?
39 Shi lu hanma shighe se nenge u gba angev shin u lu ken purusu ve se za nenge u we?’
40 Tsô Tor la una kaa a ve ér, ‘Mimi je me kaa ne, er yange ne er akaa ne a or u hemban gban ijime ken anmgbianev av mban yô, lu mo je ne er a mo nahan ye.’
41 “Maa una kaa a mba ve lu un ken uwegh ku imesegh la ér: ‘Yem nen kera, ne mba i we ne ifyan ne. Yem nen ken usu u tsôron, mtsaha u a lu sha ci u Diabolo man mbatyomov nav la.
42 Sha ci u ijen lu kôron mo kpa ne nam kwaghyan ga, shi imura lu kôron mo kpa ne nam kwaghman ga.
43 M lu a ijiir i tsan ga, kpa ne ngohol mo hen ya wen ga. M lu idyelegh kpa ne zerem ikyondo ga. M gba angev kpa ne nenge sha a mo ga. Shi m lu ken purusu kpa ne za nengem ga.’
44 Tsô ve kpa vea pine ér: ‘Tere, lu hanma shighe se nenge ijen kôr u shin imura kôr u shin u lu a pe tsan ga shin u lu idyelegh shin u gba angev shin u lu ken purusu ve se na u iwasen ga?’
45 Tsô una gema a kaa a ve ér: ‘Mimi je me kaa ne, er yange ne er akaa ne a or u hemban gban ijime ken anmgbianev av mban ga yô, lu mo je ne erem akaa ne ga ye.’
46 Mban vea nyôr ken mtim u tsôron, kpa mbaperapera yô, vea nyôr ken uma u tsôron.”
Ngeren mba shin kpe
^ Talenti u Mbagrika môm lu samnyar u yuhwan kuman ukilogeram 20.4. Nenge Ngeren u Pasen Asember.
^ Zwa Grika, “azurfa u.”
^ Zwa Grika, “azurfa la.”
^ Ikyav i tesen ishimanyoon man ishimayinan.
^ Shin “m lu a ikyondo ga.”
