Mateu 3:1-17
3 Shighe kar yô, Yohane u Eren Batisema due gba pasen kwagh ken taaikyôngo u Yudia.
2 Lu kaan ér: “Gema nen asema, gadia Tartor u sha zurum.”
3 Ka Yohane shon je yange profeti Yesaia ôr kwagh na ken mkaanem man ye, ér: “Or ngu yôôn ken taaikyôngo ér: ‘Sôr nen gbenda u Yehova!* Kôôm nen igbenda na i lu jighilii.’”
4 Yohane ne huan ikyondo i sha aive a rakumi, shi tsulen kwange u ikyôv ken iwenge. Kwaghyan na lu ikyomon* man iyough i ken toho.
5 Ior mba ken Yerusalem man Yudia man mba hen haregh u Yordan la cii lu zan hen a na,
6 nahan lu eren ve batisema* shin Ifi u Yordan, ve lu pasen asorabo a ve ken igbar.
7 Er nenge Mbafarishi man Mbasadushi kpishi lu van ape lu eren ior batisema la yô, a kaa a ve ér: “Ne ônov mba igbindev mban, ka an nan we ne kwagh ér ne yevese iyugh i i lu van la?
8 Nahan yô, ume nen ityamegh ki ki tese mgemshima yô.
9 De kaan nen ken ishima yen ner, ‘Se mba ônov mba Aberaham’ ga. Nenge, me kaa ne, Aôndo una fatyô u geman awen ne aa hingir ônov mba Aberaham.
10 I ver ijembe hen atine a ikyon mba keghen a kegh. Nahan hanma kon u u um ityamegh ki dedoo ga cii yô, ka u a gber u a kende ken usu.
11 Mo yô, m ngu eren ne batisema sha mnger sha er ne gem ishima yô. Kpa orgen u a lu van mo ken ijime la hembam tahav. M kuma u tsuan un akôv* shin angahar ga. Un yô, una er ne batisema sha icighan jijingi man sha usu.
12 Ngu a kwagh u peer akoo* a mi ken uwe. Nahan una ese vande na u gbidyen iyiav pele pele, shi una kura alakema na una za ombo ken iyou i koson iyiav.* Kpa akoo yô, una nande a ken usu u a fatyô u pirin ga yô.”
13 Tsô Yesu mough ken Galilia va hen Yohane hen Yordan, sha u a er un batisema yô.
14 Kpa Yohane nôngo ér una venda a na, a kaa ér: “Ka we i gbe u ma u erem batisema ye, man u gema u ngu van her a moo?”
15 Yesu gema kaa a na ér: “De i lu nahan, sha ci u ka kwagh u se er ve se fatyô u eren hanma kwagh u perapera je ne.” Maa a kera venda a na ga.
16 Mba eren Yesu batisema yô, a due shin mnger fese. Tsô i bugh sha, maa a nenge jijingi u Aôndo lu senen sha a na er ikyungugh nahan.
17 Shi imo due sha aôndo* kaa ér: “Ngun ka Wan wam u ishima ishima. Doom a na.”
Ngeren mba shin kpe
^ Nenge Ngeren u Pasen Asember.
^ Shin “mbaahungwa.”
^ Shin “lu mirin ve shin mnger.”
^ Shin “sanda.”
^ Shin “shebul u tan sam-uyia.”
^ Shin “ken ityumbe.”
^ Shin “sha abeen.”