Mateu 7:1-29
7 “De nen u ôron mbagenev ijir, sha er ne kpa a ôr ne ijir ga yô;
2 sha ci u ka er ne ôron mbagenev ijir la, ne kpa a ôr ne ijir ye. Shi ka er ne eren a mbagenev la, ve kpa vea er a ven ye.
3 Man er nan ve u lu nengen a anivurkon ken ishe i anmgbian wou, kpa gungurkon u ken ishe you la yô, u nengen a mi ga?
4 Shin a er nan man u kaa a anmgbian wou wer, ‘De m dugh u anivurkon ken ishe,’ kpa we u gema u lu a gungurkon ken ishee?
5 We orwanatseregh! Hii dughun gungurkon u ken ishe you la cii ve u nenge tsembelee, u dugh anivurkon u a lu anmgbian wou ken ishe la ye.
6 “De naan nen aniwaav icighankwagh ga, shin de geman nen utagbede enev kenden nen igyo ga, sha er ia ndyar angahar sha mi ia hide a ta num sha a ven ga yô.
7 “Sônon nen her, nahan a na ne. Keren nen her, nahan ne zua a mi. Manden nen uwegh her, nahan a bugh ne.
8 Gadia hanma or u nan sônon yô, mba ne nan, shi hanma or u nan keren yô, nan zough a mi, shi hanma or u nan manden uwegh kpaa, a bugh nan.
9 Sha mimi yô, ka an ken a ven wan u nan una sôn nan beredi ve nana gema a na un iwene?
10 Shin aluer una sôn nan ishu yô, nana gema a na un iyô ase?
11 Nahan, aluer ne mba ne lu mbaasorabo ne je kpa ne fa u nan ônov enev uiyua mba dedoo yô, Ter wen u a lu sha la je yô una hemba nan mba ve sônon un la akaa a dedoo cii!
12 “Sha nahan yô, akaa a ne soo ner ior ve eren a ven la cii, ne kpa eren nen a a ve kpee je. Jighilii yô, ka kwagh u Atindi kua Uprofeti* cii ve tese je la.
13 “Nyôr nen hen hunda u hogholoo la, sha ci u gbenda u zan ken mtim la ngu bele bele, hunda u u kpa gbangese, man ior kpishi mba nyôron hen u;
14 kpa gbenda u zan ken uma la imbishi, shi hunda u u kpa hoghol, man ka ior kpuaa tseegh ve lu zuan a u ye.
15 “Wa nen ikyo sha kwagh u uprofeti mbaaiev mba ve van hen a ven a akôv a iyôngo iyol, kpa ken atô yô, ve lu ugbaseela mba ijen i ker ve tsung la.
16 Ka sha atam a ve je ne fa ve ye. Mayange mba zer atam a wain sha atine a saa, shin atam a tur sha kon u asaa kpa?
17 Kape hanma kon u injaa ka u ume atam a dedoo je la, kpa hanma kon u bo yô, ka u ume atam a bo.
18 Kon u injaa ua fatyô u umen atam a bo ga, kon u bo di kpaa ua fatyô u umen atam a dedoo ga.
19 Hanma kon u u umen atam a dedoo ga cii, ka i gber u i kende ken usu.
20 Nahan, ne fa ambaaior la sha atam a ve je.
21 “Ka hanma or u nan yilan mo ér, ‘Tere, Tere’ cii nana nyôr ken Tartor u sha ga, kpa ka or u nan eren ishima i Terem u a lu sha la tseegh nana nyôr ye.
22 Ior kpishi vea kaa a mo sha iyange la ér: ‘Tere, Tere, ka ken iti you yange se lu ôron akaaôron a profeti gaa? Shi lu ken iti you se lu zendan azôv ken ior kera gaa? Man lu ken iti you se lu eren ityom i kpilighyol* kpishi gaa?’
23 Tsô me kaa a ve mer: ‘Mayange je m fa ne ga! Karem nen sha ishi kera, ne mbavendanatindi mban!’
24 “Sha nahan yô, hanma or u nan ongo akaaôron a am ne man nan er sha mi yô, nan ngu er orfankwagh u nan maa iyou i nan sha vande nahan.
25 Ura nôô kpishi, nahan mngerem kua akaa, shi ahumbe a taver ta sha iyou la, kpa i yôhôr ga, sha ci u i wa i ityô sha vande.
26 Kpa hanma or u nan ongo akaaôron a am ne man nan er sha mi ga yô, nan ngu er ibumeor u nan maa iyou i nan shin waarawa nahan.
27 Ura nôô kpishi, nahan mngerem kua akaa, shi ahumbe a taver ta sha iyou la, maa i yôhôr i haa inya vindi vindi.”
28 Yesu ôron akaa ne been yô, kpiligh ikpelaior la iyol kpishi a ityesen na,
29 sha ci u lu tesen ve er ka or u i ne nan tahav mbu tesen yô, lu er mbangerenatindi nahan ga.
Ngeren mba shin kpe
^ “Atindi kua Uprofeti” ka Ruamabera u ken Zwa Heberu la jimin cii.
^ Shin “uivande.”
