Mateu 8:1-34
8 Hungwan sha uwo yô, zegeikpelaior dondo sha a na.
2 Tsô orimande ugen va gure un inya kaa ér: “Tere, wea lumun yô, u fatyô u wanger mo.”
3 Tsô a za uwegh a bende un iyol, a kaa ér: “M lumun! I wanger we.” Her je imande na la bee.
4 Maa Yesu kaa a na ér: “Nenge, de ôron or môm kwagh ne ga, kpa za tese pristi iyol you, shi na nagh ku Mose yange kaa la, nahan i lu ve shiada.”
5 Za nyer ken Kapenaum yô, orshoja u vesen ugen va her a na, gba va zamber a na
6 kaan ér: “Orvesen, wanye wam u shiren mo tom gba angev mbu kpen alegh, ngu sha gambe ken iyou, man ngu yan ican je gande.”
7 A kaa a na ér: “Me va tsô me bee un angev.”
8 Orshoja u vesen shon gema kaa ér: “Orvesen, m kuma u ú va hen ya wam ga. Ôr a ôr kwagh tseegh kpa angev mbua bee wanye wam la.
9 Sha ci u mo kpa m ngu sha ikyev i mbavesen av, man m gema m ngu a ushoja sha ikyev. Ka mea kaa a orshoja ngun mer, ‘Za heela!’ maa nan za je. Shi mea kaa a ugen mer ‘Va!’ maa nan va je; shi mea kaa a kpan wam mer, ‘Er ingin!’ maa nan er je.”
10 Yesu ongo kwagh ne yô, kpiligh un iyol, nahan a kaa a mba ve dondo un ijime la ér: “Mimi je me kaa ne, m ngu a nenge a or môm ken Iserael u lun a jighjigh u nan kpishi nahan ga.
11 Kpa me kaa ne, ior kpishi vea due vegher u sha ityoughkitaregh man vegher u shin ityôtar vea va ya kwagh sha tebul môm vea Aberaham man Isaka man Yakob ken Tartor u sha.
12 Kpa ônov mba Tartor yô, a kende ve ken ime i ken won. Vea vaa her je vea wua anyi.”*
13 Maa Yesu kaa a orshoja u vesen la ér: “Yem. Er u tese wer u na jighjigh yô, i lu er u kaa nahan.” Tsô hen ihwa la je angev bee wanye na la.
14 Yesu za nyer hen ya u Peteru yô, a nenge ngôkem u Peteru gba fiva* lu hen inya.
15 Tsô a bende un uwegh iyol, maa fiva la bee. Nahan a mough sha a gba eren un kwaghyan.
16 Kpa iyange been yô, i va un a ior kpishi mba ve lu a ujijingi mba bov yô. A na zwa ujijingi mbara cii due ken a ve kera, shi a bee mba ve lu yan ican a iangev la cii iangev vev,
17 sha u kuren kwagh u yange Aôndo mgbegha profeti Yesaia ôr la, ér: “A tôô se iangev kera, shi a kar a mbamnyoon asev sha.”
18 Yesu nengen er ikpelaior i kase un yô, a kaa a mbahenen nav ér vea per Zegemnger u Galilia yande la.
19 Tsô orngerenatindi ugen va kohol un kaa a na ér: “Ortesen, hanma ijiir i u lu zan cii, me dondo u.”
20 Kpa Yesu kaa a na ér: “Atsôngo nga a ubar, shi inyon i purugh kpa ngi a aya, kpa Wan u or yô ngu a ya na u una tsaan her ga.”*
21 Tsô orhenen na ugen kaa a na ér: “Tere, nam ian m za vande iin terem man me hide ye.”
22 Yesu kaa a na ér: “Dondo sha a mo her. De mbakpenev ve ii mbakpenev vev.”
23 Tsô Yesu nyôr shin tso vea mbahenen nav.
24 Ica i gbe ga yô, zegeuraahumbe hii shin zegemnger la, maa agôndoamnger gba kpianger haan shin tso. Kpa un yô, lu yaven.
25 Tsô ve va nder un, ve kaa a na ér: “Tere, yima se, se mba nôngon u saan!”
26 Kpa a kaa a ve ér: “Er nan ve ne lu cian* yum nahana? Jighjigh wen u nan vese ga tsôô!” Tsô a mough a yange ahumbe la kua zegemnger, maa huan ving.
27 Nahan kpiligh ve iyol, ve kaa ér: “Or ne jim yô, ka nyi oro? Ahumbe man zegemnger je kpa mba ongo imo na.”
28 Mba peren mba gbe yande la hen haregh u Mbagadarene yô, iorov uhar mba lun a ujijingi mba bov za due hen iwar i mbakpenev va kohol un. Ve wa tswam kpishi, nahan ior cian u karen gbenda la.
29 Ve gba genger amo kaan ér: “Wan u Aôndo, ka nyi i zough se a wee? U va heen wer u va na se ican cii man shighe u i ver la yee?”
30 Ikpela-igyo gema lu yan kwagh hen ijiir la ica a ve.
31 Tsô azôv la gba zamber a na kaan ér: “Aluer u ngu zendan se ken or ne kera yô, na se ian i nyôron ken ikpela-igyo la.”
32 Nahan a kaa a a ér: “Za nen!” Tsô a due a za nyôr ken igyo la, nahan ikpela-igyo la cii hembe ayem za osough sha kurugh ku ijem haa shin zegemnger, kpe shin mngerem mara.
33 Kpa mbakuranigyo mbara yevese, mba za nyer ken gar yô, ve ôr hanma kwagh u za hemen yô, kua kwagh u ior mba azôv lu nzughul a ve la kpaa.
34 Nahan ior mba ken gar la cii due gba van hen Yesu. Mba va kohol un yô, ve zamber a na ér a due hen ijiir ve kera.
Ngeren mba shin kpe
^ Ikyav i tesen ishimanyoon man ishimayinan.
^ Shin “hia iyol.”
^ Zwa Grika, “ngu a pe pendan ityough ga.”
^ Shin “ishima i yen ne.”
