Mbaefese 3:1-21
3 Sha ityôkyaa ne yô, mo Paulu, u m lu ken purusu sha ci u Kristu Yesu man sha ci wen, ne ior mba ken akuraior agen ne—*
2 Mimi je, ne ungwa kwagh u tom u i nem ér m̱ wase ne u zuan a mtsera sha erdoo u sha mhôôn u Aôndo la.
3 Yange pasem icighan kwaghmyer ne sha u m fa, vough er yange m vande ngeren kwagh sha mi tiônôô nahan.
4 Nahan aluer ne ôr kwagh ne yô, ne nenge er m fe icighan kwaghmyer u Kristu ne yô.
5 Ken ikyov i ken ijime la, i pase icighan kwaghmyer ne hen ônov mba iorov ga, kpa hegen i pase un hen uicighan mbaapostoli man uprofeti nav sha jijingi,
6 ér, ior mba ken akuraior agen kpa ve̱ lu mbayandyako shi ve̱ lu ken iyol i môm a vese, shi ve̱ zua a kwar ken kwagh u i tende zwa u nan se la, ken Kristu Yesu sha loho u dedoo.
7 M hingir ortom u icighan kwaghmyer ne sha ci u iyua i Aôndo a nem gbilin sha erdoo na u sha mhôôn, sha tahav nav la.
8 Ka mo, or u hemban gban ijime ken uicighanmbaiorov cii ne, i tesem erdoo u sha mhôôn la ye, ér m̱ pase loho u dedoo u sha kwagh u averen a Kristu a a gande u fan been la,
9 shi m̱ wase hanma or nana̱ nenge er i lu eren tom u kohol akaa, u u lu icighan kwaghmyer, u Aôndo u a gbe akaa cii la, a koso un a lu myer sha ikyov ikyov la.
10 Yange lu nahan sha er a pase un hegen sha ikyev i tiônnongo,* hen ugomoti man mbautahav mba sha ajiir a sha, ve̱ nenge a kwaghfan u Aôndo, u a tese sha igbenda wuee la yô.
11 Ngu eren kwagh ne ka sha awashima na u tsôron u yange hii sha Kristu Yesu Ter wase,
12 u i lu sha a na se zough a ian i lamen a ishima i gbar gbar, shi se lu a ian gbanger gbanger i zan hen Aôndo vangertiôr sha jighjigh u se ne un la.
13 Nahan m ngu kaan a ven mer, asema a de yen ne sha atsan a m lu yan sha ci wen la ga, gadia ka er m lu yan atsan ne la ne va zua a icivir ye.
14 Sha ityôkyaa ne yô, m gure anu inya hen Ter,
15 un u hanma tsombor u sha man u shin tar cii u zough a iti hen a na la.
16 M ngu eren msen mer, ma a taver or u ne lu kimi la sha jijingi na man sha iengem i a lu a mi kpishi la,
17 shi sha jighjigh u nan wen la, Kristu ma a tem ken asema a en sha dooshima. Ma ne we amise gbang shi ma i tim ne sha imaagh ki i we la dông,
18 sha u ne vea uicighanmbaiorov cii ma ne fe igbanger man iniembe man ityaven man mze la vindi vindi,
19 shi ma ne fe dooshima u Kristu u a hembe mfe la, sha er ne iv a aeren a Aôndo, a ka a iv or a mi la cica cii yô.
20 Nahan, un u una fatyô u eren kwagh sha tahav nav mbu mbu eren tom ken a vese la ngeen je hemban akaa a se sônon shin se henen cii la,
21 icivir i lu i na ken tiônnongo man ken Kristu Yesu, sha ikyov ikyov zan zan gbem sha won. Amen.
Ngeren mba shin kpe
^ Ikyav tese ér a za hemen a kwaghôron ne sha ivur i sha 14 la.
^ Nenge Ngeren u Pasen Asember.
