Mbaefese 6:1-24
6 Ônov, ungwan nen imo i mbamaren enev ken Ter, gadia ieren ne ka i vough.
2 “Naan teru man ngôu icivir,” ka tindi u hiihii u i er ityendezwa sha mi yô, ér:
3 “Sha er a kpe u iyol* shi u tsa sha won kpishi yô.”
4 Ne uter kpaa, de eren nen a ônov enev er vea yue ga, kpa za nen hemen u yesen ve sha ityesen man kwaghwan* u Yehova.*
5 Ne mba ne lu ikpan yô, ungwan nen imo i uumace* mba ne lu sha ikyev ve la a mciem man ikyarkyase iyol, a ishima yen i môm, er ne ungwan imo i Kristu nahan,
6 i̱ de lu sha ci u mba nengen kwagh u ne eren, yô ne nôngo i̱ doo ior a ven* ga, kpa er ne lu ikpan i Kristu yô, eren nen ishima i Aôndo a uma wen cii.
7 Eren nen mbavesen enev tom a awashima u dedoo, er ka Yehova* ne eren un tom nahan, i̱ de lu er ka ior ne eren ve tom ga,
8 gadia ne fa, nyityô kwagh i dedoo i or nan er cii, Yehova* una kimbi nan injar sha mi, nana̱ lu kpan shin nana̱ lu kpan ga kpaa.
9 Ne mba ne lu a ikpan sha ikyev kpaa, eren nen a mba ve lu ikpan yen la nahan vough, de te nen ve mciem iyol ga, gadia ne fa, Orvesen wen man u ve cii ngu sha, man un sangen a sange ga.
10 U masen yô, Ter a za hemen u nan ne tahav sha agee a hemban cii a a lu a mi la.
11 Wuha nen iyol i utya sha ikyav mbi utyaav mbi Aôndo a ne ne cii, sha er ne fatyô u tilen dông, hendan a ayom a* Diabolo yô;
12 gadia ka inyam man awambe* se lu nôngon ityav a ve ga, kpa ka ugomoti man mbautahav man mbahemenev mba tar u imegh ne, kua ikyum i ujijingi mbaaferev mba sha ajiir a sha.
13 Sha ityôkyaa ne yô, tôô nen akaa a wuhan iyol i utya a Aôndo a ne ne la cii, sha er ne fatyô u hendan kwagh sha iyange i bo, zum u ne er hanma kwagh u i gbe u ne er ve ne tile dông la kera yô.
14 Nahan yô, tile nen dông, tsule nen kwange ken iwenge, ka mimi je la, shi hua nen rigautya, ka perapera je la,
15 shi wa nen akôv shin angahar, sha u kohol iyol i pasen loho u dedoo u bem.
16 Heela tseegh ga, shi tôô nen perutya u vesen, ka jighjigh u nan je la, u ne fatyô u pirin avaan a usu a orbo la a mi yô.
17 Shi ngohol nen idyerutya, ka myom je la, man sanker u jijingi, ka mkaanem ma Aôndo je la,
18 shi eren nen msen hanma shighe sha tahav mbu jijingi, hanma inja msen man zamber cii. Sha nahan yô, lu nen per, zamber nen Aôndo hanma shighe sha ci u uicighanmbaiorov cii.
19 Eren nen msen sha ci wam kpaa, sha u i nam mkaanem zum u m bugh zwa u ôron kwagh yô, sha er me fatyô u lamen gbar gbar, pasen mer i fa icighan kwaghmyer u loho u dedoo,
20 u m lu ortom u i heem mshirim sha kwagh u u ne; man sha er me ôr kwagh u u gbar gbar, er i gbe u me ôr la yô.
21 Tikiku, anmgbian u doon mo ishima man ortom u mimi ken Ter, una pase ne akaa cii, sha er ne kpa ne fa kwagh wam man akaa a m lu eren la yô.
22 Ka ityôkyaa i m lu tindin un hen a ven jighilii je la, sha er ne fa er se lu la, man sha er una sur ne asema yô.
23 Aôndo Ter man Ter Yesu Kristu ve̱ na anmgbianev bem shi ve̱ tese ve dooshima shi ve̱ wase ve ve̱ lu a jighjigh u nan.
24 Erdoo u sha mhôôn a̱ lu a mba Ter wase Yesu Kristu a doo ve ishima, man i lu dooshima u been mayange ga la cii.
Ngeren mba shin kpe
^ Shin “u za ikyura.”
^ Shin “mkôôm; tsaha.” Zwa Grika, “wa ken ishima ve u soon.”
^ Nenge Ngeren u Pasen Asember.
^ Shin “ior.”
^ Zwa Grika, “i̱ de lu sha ikpam-ashe, er ka mba keren u doon ityough a ior.”
^ Nenge Ngeren u Pasen Asember.
^ Nenge Ngeren u Pasen Asember.
^ Shin “hendan a mbamhen mba.”
^ Ka, “uumace” je la.
