Mbafilipi 1:1-30
1 Mo Paulu, m ngu vea Timoteu, se ikpan i Kristu Yesu. M ngu ngeren hen uicighanmbaiorov mba ken Kristu Yesu mba ve lu ken Filipi cii, kua mbakuran man mbashiren tiônnongo:
2 Aôndo Ter wase man Ter Yesu Kristu ve̱ tese ne erdoo u sha mhôôn shi ve̱ na ne bem.
3 Ka m shi sughun Aôndo wam hanma shighe u m umbur ne
4 ken mbamsen mba ka m eren sha u zamber sha ci u hanma wen la. Hanma kwa u m lu eren msen u zamber yô, ka m lu a iember ken ishima
5 sha kwagh u ne eren sha ci u* loho u dedoo, hii sha iyange i ne hii ungwan u la je zan zan hegen la.
6 Gadia m ngu a vangertiôr sha kwagh ne, mer un u yange hii tom u dedoo ken a ven la una er u zan zan una kar kuren sha iyange i Kristu Yesu la.
7 Er m lu a ven ken ishima yam yô, m nenge mer aluer m hen sha kwagh u hanma wen nahan kpa a lu sha inja, ne mba i tese ne erdoo u sha mhôôn a mo imôngo hegen u m lu ken purusu ne, kua sha shighe u m lu eren shiada shi ôron ajir kpoghuloo mer me zua a ian i pasen loho u dedoo la.
8 Gadia Aôndo kpa fa dedoo er i sarem tsung u nengen a ven, shi ne doom ishima kpishi er Kristu Yesu kpa ne doo un ishima nahan yô.
9 Man ka kwagh u m eren msen sha mi gbem je ne, mer dooshima wen ma a lu seer a seer, nahan ma ne lu a mfe u vough shi ma ne iv a mkav kpaa;
10 shi ma ne fe akaa a a hembe lun a inja la, sha er ne lu wang, ne palegh u nan mbagenev gbeev mbu nôngon zan zan sha iyange i Kristu la yô;
11 shi ma ne iv a ityamegh ki perapera sha iwasen i Yesu Kristu, sha er a na Aôndo icivir shi a wuese un yô.
12 Nahan, anmgbianev, sarem u ma ne fe er kwagh u a erem ne a gem a ne loho u dedoo u lu samber zan a za hemen yô.
13 Nahan Mbakuran Shisar kua ior mbagenev cii hingir u fan er m lu ken purusu sha ci u Kristu yô.
14 Hegen anmgbianev kpishi ken Ter hingir u lun a vangertiôr sha ci u purusu u m lu ker ne, shi mba hemban tesen ishimataver cii sha u ôron ior loho u Aôndo a mciem shio.
15 Jighilii yô, mbagenev ka iyuhwe man ahendan a ne ve pasen kwagh u Kristu ye, kpa mbagenev mba pasen a awashima u dedoo.
16 Mba ve pasen a awashima u dedoo la ka dooshima a ne ve pasen kwagh u Kristu ye, sha ci u ve fa er i tsuam ér m er shiada sha kwagh u loho u dedoo yô;
17 kpa mba i lu iyuhwe man ahendan a ne ve pasen kwagh la yô, ka ayôôso a gbe ve ye, mba a awashima u dedoo ga, gadia ve soo u van mo a zayol, er m lu ken purusu ne.
18 Ka nyi i dugh kere? Sha hanma gbenda cii, a̱ lu sha atseregh shin sha mimi kpa, mba pasen kwagh u Kristu, nahan m ngu ember sha kwagh ne. Man sha kpôô yô, me za hemen u ember,
19 gadia m fa kwagh ne una na me zua a myom sha mbamsen enev mba zamber man sha iwasen i jijingi u Yesu Kristu.
20 Nahan m ngu a vangertiôr shi m ngu a ishimaverenkeghen taveraa mer me hee sha ma gbenda môm ga, kpa me lam a ishima i gbar gbar shi Kristu una zua a icivir sha a mo hegen, er i vande lun nahan, mea lu uma shin mea kpe kpaa.
21 Gadia mo yô, mea lu uma kpa, ka sha ci u Kristu, man aluer m kpe kpa, kam mtsera.
22 Nahan, aluer ka u me za hemen u lun uma ken iyol ne kpa, ka ityamegh ki tom wam je la; nahan kpa, kwagh u me tsua la yô, me pase ga.
23 Ishima hingir mo ta te ta sha akaa a ahar ne,* gadia ka saren mo u ma i kar a mo ken iyol ne kera ma m za lu vea Kristu, man jighilii yô, hemba doon nahan.
24 Nahan kpa, hemba kan a inja u mo lun ken iyol ne her sha ci wen.
25 Nahan, er m lu a vangertiôr sha kwagh ne yô, m fa me lu her shi me za hemen u lun vea ven cii, sha er ne yem hemen hemen shi a saan ne iyol sha jighjigh u nan wen,
26 nahan ne iv a iember kpishi ken Kristu Yesu zum u me hide me va hen a ven yô.
27 Eren nen kwagh* u a kom sha loho u dedoo u sha kwagh u Kristu yô, sha er aluer m va zua ishigh a ven shin m va ga kpa, me ungwa kwagh wen shi me fa mer ne tile dông, ne zua sha mhen* shi ne mba gungur môm man ishima i môm, sha er jighjigh u ne ne loho u dedoo la una lu her,
28 shi mayange ne cia mba hendan a ven ga yô. Kwagh ne ngu tesen je ér ka u a va tim ve, kpa ne yô a gema a yima ne; man ka hen Aôndo kwagh ne a dugh ye.
29 Gadia i na ne ian i icivirigh sha kwagh u Kristu, ka sha u ne̱ na un jighjigh tseegh tsô ga, kpa ka sha u ne̱ ya ican sha kwagh na kpaa.
30 Gadia ne mba nôngon ka ityav mbi shon mbi yange ne nenge m lu nôngon, shi ne ongo hegen ner m ngu nôngon mbi her la.
Ngeren mba shin kpe
^ Shin “sha tom u ne eren sha u samber a.”
^ Shin “asema hingir mo ahar.”
^ Shin “Er ne lu marnya yô, eren nen kwagh.”
^ Zwa Grika, “jijingi wen ngu môm.”
