Mbafilipi 2:1-30
2 Nahan aluer ka u ne fatyô u taver or ishima ken Kristu, shi aluer ka u ne fatyô u surun or ishima sha dooshima, man aluer ka u ne fatyô u lun ken mzough* vea mbagenev sha akaa a ken jijingi, shi aluer ne mba tesen ior dooshima kpishi shi mhôônom ma kôron ne a ve yô,
2 er nen kwagh u una na iember yam ia iv yô: lu nen ishima i môm shi lu nen a dooshima môm, shi lu nen gungur môm, shi mhen wen a̱ lu kwaghmôm.
3 De eren nen kwagh môm sha u van a ayôôso ga, shin sha u keren icivir i gbilinigh ga, hiden nen a iyol ijime, nengen nen mbagenev ner ve hemba ne.
4 De keren nen mtsera wen tseegh ga, kpa keren nen mtsera u mbagenev kpaa.
5 Lu nen a mhen u Kristu Yesu kpa yange lu a mi ne ken a ven her.
6 Shin er yange lu er Aôndo nahan kpa, ker u ngohol kwagh u a lu sha ci na ga la ga, inja na yô, yange ker u lun kwaghmôm a Aôndo ga.
7 Jighilii yô, yange undu akaa a na cii, nyôr ken mlu u kpan, va hingir orumace.*
8 Ka nahan tseegh ga, shighe u lu ken mlu u or la, hide a iyol na ijime, ungwa kwagh zan zan ar ken ku, man lu ku u sha kon* je.
9 Ka sha ityôkyaa ne je Aôndo a kende a na sha, a ver un sha ian i hemban, shi a tese un erdoo, a ne un iti i i hembe hanma iti igen cii ye,
10 sha u hanma inyu i̱ gure ken iti i Yesu—inyu i mba ve lu sha man i mba ve lu shin tar kua i mba ve lu shin inya* la cii—
11 shi hanma zwa u ôr gbar gbar ér Yesu Kristu ka Ter, sha ci u icivir i Aôndo Ter.
12 Sha nahan yô, ne mba doon mo ishima, er ne vanden ungwan kwagh, i lu shighe u m lu a ven tseegh ga, kpa ne hembe keghen iyol u eren nahan zum u m lu ga kpaa yô, za nen hemen u eren akaa a van ne a myom, a mciem man ikyarkyase iyol.
13 Gadia ka Aôndo a nan ne tahav ye, ngu a na sha u ne̱ lu a isharen kua tahav mbu eren kwagh, sha ci u doo un u eren nahan.
14 Eren nen akaa cii a ahon a gban shio, shi de gbe nen ayôôso ga,
15 sha er ne hingir wang shi ne lu iyolshô, ne lu ônov mba Aôndo mba lun a acôghor shio hen atô u kov u ifer man u hemban ato, u ne mondo hen atô u u, ne lu ior mba tan iwanger ken tar,
16 ne kôr ave sha loho u uma gbang yô. Kwagh ne una na yô, me zua a ityôkyaa i ember sha iyange i Kristu la, sha ci u me fa je mer iniôngon yam shin tom u yange m er la lu gbilinkwagh ga.
17 Kpa aluer mba haan mo er ka nagh ku wain nahan, sha nagh ku icighantom, ku jighjigh u nan wen a mgbegha ne u nan la nahan je kpa, saan mo iyol shi m ngu ember a ven cii imôngo.
18 Ne kpa i saan ne iyol shi ember nen a mo nahan vough.
19 Nahan m ngu veren ishima mer, aluer ka ishima i Ter Yesu yô, me tindi Timoteu hen a ven fefa, sha er me zua a ibaver sha kwagh wen, nahan ishima ia taver mo yô.
20 Gadia m ngu a ma orgen u lun ishima er un nahan, u nana ver ishima nana nenge sha akaa a a ze ne iyol la tsembelee ga.
21 Gadia mbagenev cii mba keren ka mbamtsera vev, ka mba Yesu Kristu ga.
22 Kpa ne fa shiada u a er sha iyol na yô; a er tom u samber a loho u dedoo vea mo er ka wan a ter nahan.
23 Sha nahan yô, ka un m lu veren ishima u tindin ye, man me er nahan fefa je, zum u me nenge er akaa aa za a mo la kera yô.
24 Jighilii yô, m ngu a vangertiôr ken Ter mer, mo iyol yam kpa m sôôn van.
25 Kpa hegen yô, m nenge ka hange hange u me tindi Epafroditu, anmgbian wam u se lu eren tom imôngo shi a lu orshoja u Ter a mo imôngo, u ne tindi ner a va wasen mo u eren akaa la,
26 gadia sar un tsung u nengen a ven cii, shi er ne ongo ner yange gba angev yô, ishima za un iyol je a ure.
27 Sha kpôô yô, yange gba angev je war kpen; kpa Aôndo zungwe un mhôônom, man jighilii yô, ka un tseegh ga, mo kpa a zungwem, sha er me seer zuan a ijungwen ga yô.
28 Sha nahan yô, m ngu tindin un fele fele je, sha er ne nenge a na, nahan a hide a saan ne iyol shi mo kpa ishima ia kera nyian mo kpishi ga yô.
29 Nahan yô, ngohol nen un a iember tsung er ne vanden eren ken Ter nahan, shi za nen hemen u wan ior er un nahan ikyo tsung,
30 gadia a war ku sha ikyughur sha ci u tom u Kristu, yange wa ku ikyo ga, sha er una wasem u eren akaa a nea lu heen ve ma ne lu eren mo la yô.
Ngeren mba shin kpe
^ Shin “lun a kwar.”
^ Zwa Grika, “va lu ken mlu u or.”
^ Nenge Ngeren u Pasen Asember.
^ Ka, “mbakpenev mba a va nder ve shin ku mbara” je la.
