Mbagalatia 1:1-24
1 Mo Paulu, m ngu apostoli. Ka ior shin ma or nan ne m lu apostoli ga, kpa ka Yesu Kristu man Aôndo Ter u a nder un shin ku la.
2 Mo man anmgbianev mba ve lu vea mo cii, se mba ngeren hen atôônanongo* a ken Galatia:
3 Aôndo Ter wase man Ter Yesu Kristu ve̱ tese ne erdoo u sha mhôôn shi ve̱ na ne bem.
4 A na uma na sha ci u asorabo a ase, sha er una yima se ken tar* u ifer ne yô. A er kwagh ne sha ishima i Aôndo Ter wase;
5 i̱ wuese un gbem sha won. Amen.
6 Kpiligh mo iyol er ica i lu a gba ga je maa ne gem ijime a Un u a yer ne sha erdoo u sha mhôôn u Kristu la, ne ngohol loho u dedoo ugen kposo yô.
7 U ngu wer loho u dedoo ugen ngu ga; kpa ior mbagenev mba van ne a zayol shi ve soo u nzughul a loho u dedoo u sha kwagh u Kristu ne.
8 Nahan kpa, aluer se shin ma ortyom u sha nan ngu va pasen ne loho u dedoo man ka kwagh ugen kposo a loho u dedoo u yange se pase ne la yô, ifyan i̱ kôr nan.
9 Er se vande ôron nahan, shi m ngu kimbir mer, ma or u nan lu pasen ne loho u dedoo man i lu kwagh ugen kposo a u yange ne ngohol la cii yô, ifyan i kôr nan.
10 Jighilii yô, ka ior m nôngon mer ve na jighjigh shin ka Aôndo? Shin m ngu nôngon mer me doo ityough a ioro? Luun er m ngu doon ityough a ior her yô, ma m lu kpan u Kristu ga.
11 Gadia, anmgbianev, m soo mer fa nen ner, loho u dedoo u m lu pasen hen a ven ne due ka hen orumace ga;
12 gadia ka hen or m ngohol u ga, shin ka or nan pasem u kpaa ga, kpa ka Yesu Kristu a pasem u ye.
13 Er ne fe nahan, shighe u m lu ken kwaghaôndo u Mbayuda la, m zer tôvon tiônnongo u Aôndo a ican kpoghuloo shi m ker u vihin un kpaa,
14 shi m lu zan hemen ken kwaghaôndo u Mbayuda la hemban mbakwav wam kpishi mba ve lu ken tar wam la, sha ci u m lu a gbashima kpishi sha kwagh u aeren a uter av.
15 Kpa zum u Aôndo u a ne ngôm a marem shi a yerem sha erdoo na u sha mhôôn la nenge doo
16 u una pase kwagh u Wan na sha ikyev yam, sha u m yôô loho u dedoo sha kwagh na hen akuraior la, m hide fese m hen sha kwagh shon vea ma orumace ga;
17 shin m za sha Yerusalem hen mba ve vande lun mbaapostoli a mo la ga, kpa m za ken Arabia, m za mough ker m hide ken Damaseku.
18 Anyom nga karen atar yô, m za sha Yerusalem u za nengen a Sifa,* m za lu vea na ayange 15.
19 Kpa m nenge a mbaapostoli mbagenev ga, saa di Yakobu, anmgbian u Ter la tseegh.
20 Nenge! M ngu ôron a ven sha ishigh ki Aôndo wang mer, akaa a m lu ngeren hen a ven ne ka mbaaie ga.
21 Ken masejime yô, m za ajiir wue wue hen haregh u Shiria man u Shilishia.
22 Kpa mo iyol yam yô, atôônanongo a ken Yudia a a lu ken mzough vea Kristu la fam ga.
23 Yange ve ungwan a ungwa i kaan ér: “Or u yange tôvon se a ican la, hegen ngu yôôn loho u dedoo sha kwagh u kwaghaôndo u yange lu vihin la.”
24 Tsô ve gba wuese Aôndo sha kwagh wam.
