Mbagalatia 2:1-21
2 Nahan anyom nga karen 14 yô, shi m za sha Yerusalem vea Banaba, Titu kpa lu vea mo.
2 Yange m za sha ci u i pasem ér gba u me za, nahan m za ôr ve loho u dedoo u m lu pasen hen akuraior ne. Nahan kpa, lu mba i naan ve icivir kpishi la tseegh m pase ve ye, sha er tom u yange m lu eren, shin m er la, a lu gbilinkwagh ga yô.
3 Nahan kpa, Titu u yange lu vea mo la je kpa nenge ér saa i̱ tsôngo un keng ga, shin er lu Orgrika nahan kpaa.
4 Kpa kwagh ne lu nahan sha ci u anmgbianev mbaaiev nyôr myer, sha u va meen fan mlu u ken uikyangen ga, u se lu ker vea Kristu Yesu imôngo la, sha er vea kôr se ikpan sha hanma kwagh yô.
5 Kpa se ungwa ve ga, ma shighe* môm kpaa ga, sha er ne za hemen u lun a mimi u loho u dedoo la yô.
6 Kpa sha kwagh u mba ve henen ér ve gba kwagh la yô—aluer yange vea lu nyi je kpa, kwagh ve kaham ga, gadia Aôndo lumun or ka sha mluashe u nan ga—ior mba i nenge ér ve gba kwagh kpishi la, tesem ma kwagh u he ga.
7 Kpa zum u ve nenge er i lu mo i wem tom u pasen mba i tsôngo ve ga la loho u dedoo, vough er Peteru di i lu u pasen mba i tsôngo ve la—
8 gadia un u yange na Peteru tahav mbu lun apostoli sha ci u mba i tsôngo ve la, ka un shon mo kpa a nem tahav sha ci u ior mba ken akuraior agen ye—
9 shi mba nengen a erdoo u sha mhôôn u i tesem la yô, Yakobu man Sifa* kua Yohane, ve mba i nenge ér mba mtuunum la, zua uwegh vea mo man Banaba sha u tesen ér se mba eren tom môm a ve, sha er se za ken akuraior agen, ve di vea gema a za hen mba i tsôngo ve la yô.
10 Ve ôr di tsô ér se̱ umbur u wan mbaatsanev ikyo, shi ka kwagh u m lu nôngon kpoghuloo eren je la.
11 Nahan kpa, shighe u Sifa* va ken Antiôki la, m venda* kwagh a na ken ishi, sha ci u lu eren kwagh u shami ga* je lu ashe tugh ga.
12 Gadia cii man Yakobu tindi ior va hen a na yô, vanden yan kwagh vea ior mba ken akuraior agen imôngo; kpa ior mba i tindi la mba za ve yô, a de u eren nahan, a nyôr u palegh ve, lu cian mba ken nongo u mba i tsôngo ve la.
13 Mbayuda mbagenev cii kohol un, ve kpa ve lu eren atseregh* ne, nahan Banaba je kpa nyôr u eren atseregh* ne a ve imôngo.
14 Kpa er m nenge mer mba eren kwagh u mimi u loho u dedoo u tese la ga yô, m ôr a Sifa* sha ishigh vev cii mer: “Aluer we u u lu Oryuda je kpa, u ngu eren kwagh er ior mba ken akuraior ve eren nahan, ka er Mbayuda ve eren la ga yô, er nan u soo wer ior mba ken akuraior agen ve̱ eren kwagh er Mbayuda ve eren nahan keng keng-ne?”
15 Se mba Mbayuda sha marami je, se mba er ior mba ken akuraior agen a a eren isholibo la ga.
16 Se fa ser, mba kaan ér or ngu perapera ka sha atindi a kuran ga, kpa ka sha u nan Yesu Kristu jighjigh tseegh. Sha nahan yô, se na Kristu Yesu jighjigh, sha er a kaa ér se mba mbaperapera sha jighjigh u se ne Kristu la, a lu sha atindi a kuran ga yô, gadia or môm kpa a kaa ér nan ngu orperapera sha atindi a kuran ga.
17 Nahan aluer i nenge ér se kpa se mba mbaasorabo er se lu nôngon ser se lu mbaperapera ken Kristu ne yô, Kristu hingir ortom u isholibo shinii? Mayange ga!
18 Aluer m hide m ngu maan akaa a yange m hembe kera la yô, m ngu tesen mer m ngu orsholibo.
19 Gadia Atindi na yô, m kpe sha kwagh u tindi, sha er me gema me lu uma sha ci u Aôndo yô.
20 I mandem sha kon vea Kristu imôngo. Kera ka mo m lu uma ga, kpa ka Kristu a lu uma ken a mo ye. Jighilii yô, uma u m lu ken iyol i inyam man awambe hegen ne, m ngu ka sha ci u jighjigh u m ne Wan u Aôndo, un u yange m doo un ishima shi na uma na sha ci wam la.
21 M venda erdoo u sha mhôôn u Aôndo a tesem la ga, gadia aluer ka sha atindi a kuran i kaan ér or ngu orperapera yô, mimi je, ku u Kristu a kpe la ka gbilinkwagh.
Ngeren mba shin kpe
^ Zwa Grika, “ihwa.”
^ Mba yer un kpaa ér Peteru.
^ Mba yer un kpaa ér Peteru.
^ Shin “m hendan.”
^ Shin “lu a ibo.”
^ Shin “ikpam-ashe.”
^ Shin “ikpam-ashe.”
^ Mba yer un kpaa ér Peteru.
