Mbagalatia 4:1-31
4 Nahan m ngu kaan mer, shighe u oryandyako nan lu wanye her la, nan kaha a kpan ga, shin er akaa cii a lu a nan nahan kpaa.
2 Kpa ka nan lu sha ikyev i mbanengen sha a nan kua mba nengen sha ya u nan, zan zan shighe u ter u nan a ver la a kar kuman.
3 Se kpa shighe u se lu mbayev la, mhen u tar ne kua ieren i u kôr se ikpan.
4 Kpa shighe u yange i ver la va kom vough yô, Aôndo tindi Wan na, lu kwase mar un ye, shi un lu sha ikyev i tindi,
5 sha u una yam mba ve lu sha ikyev i tindi la, vea kera lu sha ikyev i tindi ga, sha er a lumun se se lu ônov yô.
6 Er ne lu ônov yô, Aôndo tindi jijingi u Wan na ken asema a en,* man ka jijingi ne ka a na se yilan ser: “Aba* Tere!” ye.
7 Nahan u kera ngu kpan ga, kpa u ngu wan; man aluer u ngu wan yô, Aôndo na u ngu oryandyako kpaa.
8 Nahan cii kpa, shighe u ne lu a fa Aôndo ga la, ne lu ikpan i mbaaôndo mbaaiev.
9 Kpa hegen u ne va fe Aôndo, shin de m kaa mer, Aôndo a fe ne ne, er nan ve shi ne lu hiden za eren agbilinakaa man akaa a saan ishe, ne soo u hiden lun ikpan i a?
10 Ne mba umbur ayange man iwer kua ashighe man anyom dike dike.
11 Ishima nyian mo er iniôngon yam i wasen ne la cii i̱ saa ishe nahan.
12 Anmgbianev, m ngu zamber a ven, hingir nen er mo nahan, sha ci u mo kpa yange m lu er ne nahan. Ne erem kwaghbo ga.
13 Kpa ne fa er lu shighe u doom iyol ga la m zua a ian i pasen ne loho u dedoo sha kwa u hiihii yô.
14 Shin er angev av mbura lu ikyaren hen a ven nahan kpa, ne palegh mo shin m ndôhôr ne ishima* ga; kpa ne ngohol mo er m ngu ortyom u Aôndo nahan, er m ngu Kristu Yesu yô.
15 Msaanyol wen la shi ngu hana? M ngu eren ne shiada mer, yange nea fetyô yô, ashe a en je kpa ma ne ongor ma ne nam.
16 Nahan m gema m hingir orhyom wen sha ci u m ngu ôron ne kwagh u mimi yumuu?
17 Gba ve ishima u ngohol ne asema, kpa ka sha ityôkyaa i dedoo ga; ve soo u paven ne a mo, sha er a sar ne tsung u dondon ve yô.
18 Nahan kpa, aluer hanma shighe or ngu keren sha gbashima ér nana ngohol ne a awashima u dedoo yô, vihi ga; kpa i̱ de lu hen shighe u m lu a ven imôngo tseegh ga,
19 ne mbayev av mba kiriki, mba m hidi m lu toghor mar wen zan zan mer Kristu a kar vian* ken a ven ne.
20 Sarem u ma m lu hen atô wen hegen je, ma m lam a ven sha gbenda ugen kposo, sha ci u hingir mo ken ishima dang sha kwagh wen.
21 Ne mba ne soo u lun sha ikyev i tindi la, ôrom nen ase yôô, Ne fa kwagh u Atindi a kaa gaa?
22 U tesen ikyav yô, i nger ér Aberaham yange lu a ônov mba nomso uhar, u môm la mar un a kpankwase, gema mar ugen la a kwase u lu kpankwase ga yô;
23 kpa wan u mar a kpankwase la yange i mar un sha gbaaôndo, wan u mar a kwase u lu kpankwase ga la di i mar un sha ityendezwa.
24 Akaa ne lu ikyav i tesen kwagh ugen; gadia kasev mba uhar mban tile sha ityough ki uikyuryan uhar, ikyuryan i yange i er sha Uwo u Senai la ka Hagar, ngi maren ônov sha u ve lu ikpan yô.
25 Nahan Hagar tile sha ityough ki Senai, uwo ugen ken Arabia, man kwagh na zua vea Yerusalem u nyian ne, sha ci u ngu ken kpan vea ônov nav.
26 Kpa Yerusalem u sha la yô, ngu ken kpan ga, shi ka ngô wase.
27 Gadia i nger ér: “I saan we iyol, we ikyômkwase u u maren ga ne; wa icam genger genger, we kwase u u lu a toghor mar ga ne; gadia ônov mba kwase u i kende un la hemba ngeen a mba kwase u a lu a nom la.”
28 Nahan, anmgbianev, ne mba ônov mba ityendezwa, er Isaka lu nahan.
29 Kpa er ngise wan u i mar un sha gbaaôndo la hii u tôvon u i mar un sha jijingi la a ican nahan, kape hegen kpa i lu je la.
30 Nahan kpa, ruamabera kaa ér nyi? “Zenda kpankwase la a wan na, gadia wan u kpankwase la una ya dyako vea wan u kwase u a lu kpankwase ga la mayange ga.”
31 Nahan yô, anmgbianev, se mba ônov mba kpankwase ga, kpa se mba ônov mba kwase u a lu kpankwase ga la.
Ngeren mba shin kpe
^ Zwa Grika, “asema a ase.”
^ Aba ka ishember i ken zwa Heberu shin zwa Aram, inja na yô, ér “Tere!”
^ Shin “ne kenger mo ne ta ijer.”
^ Shin “mer aeren a Kristu a kar lun.”
