Mbagalatia 5:1-26
5 Ka sha u se̱ lu ken mlu u kpan ga la je Kristu a due a vese ken mlu u kpan u sha ikyev i Tindi la kera ye. Sha nahan yô, tile nen dông, i̱ de kera tôôn ne igbur i kpan ga.
2 Nenge! Mo Paulu, m ngu kaan a ven mer, aluer ne tsôngo yô, Kristu una kera lu ne a inja ga.
3 Shi m ngu kaan a hanma or u nan tsôngo cii mer, gba u nana kuran Atindi cica cii.
4 Ne pav a Kristu, ne mba ne lu nôngon ner i kaa ér ne mba mbaperapera sha atindi a kuran la. Ne kera mba sha ian i una tese ne erdoo na u sha mhôôn la ga.
5 Se yô, jijingi na se mba veren ashe keghen ser i va kaa ér se mba mbaperapera sha jighjigh u nan wase la.
6 Mba ve lu ken mzough vea Kristu Yesu yô, vea̱ tsôngo shin vea̱ tsôngo ga kpa, kwagh gba sha kwagh la ga, kpa kwagh u kwagh a gbe sha mi yô, ka jighjigh u nan u i tesen un sha dooshima la.
7 Yange ne lu eren* sha inja. Man ka an nan yange ne ve ne de u dondon mimi?
8 Un u a lu yilan ne la, yangen or ér nana̱ de u dondon mimi ga.
9 Ankwa u cuku tseegh kpa ka a ange ijenmwe jimin cii.
10 M ngu a vangertiôr mer ne mba ne lu ken mzough vea Ter la ne va hingir u henen kwagh ugen kposo ga; kpa or u nan lu van ne a zayol la yô, nana̱ lu nyityô or kpa, nana va zua a mtsaha u a kom sha a nan la.
11 Kpa mo yô, anmgbianev, aluer hegen kpa m ngu pasen mer i̱ tsôngo yô, er nan ve i lu tôvon mo a ican here? A lu nahan yô, kwagh u un u i mande un sha kon* la kera ka kwagh u nan gbeev mbu nôngon ga.
12 Sarem er mba ve lu keren ér vea tsume a ven la cii ma ve dugh alegh a iyolough a ve a yaven a or la kera yô.*
13 Anmgbianev, yange i yila ne sha u ne de kera lu ken kpan ga yô; nahan kpa, de geman nen mlu wen u ken kpan ga ne a hingir ne ian i eren sha asaren a iyolough ga, kpa eren nen mbagenev tom sha dooshima.
14 Gadia Atindi cii kure* kwagh môm u tindi a kaa ne, ér: “Or u wan ndor a we nana̱ doo u ishima kpee je, er iyol you nahan.”
15 Kpa aluer ne mba eren mbagenev akaa a nyoon ve shi nan ve ican yô, wa nen ikyo sha er ne tim ayol a en ga yô.
16 Kpa m ngu kaan mer, De nen jijingi a hemen ne,* nahan mayange ne kera eren kwagh sha isharen i iyolough ga.
17 Gadia iyol ka i hendan a jijingi sha asaren a i, jijingi kpa a hendan a iyol; akaa ne nga zough ga, ka nahan ne eren akaa a ne soo u eren jim jim la ga ye.
18 Shi aluer jijingi ngu hemen ne yô, ne mba sha ikyev i tindi ga.
19 Mba nengen a aeren a iyolough ken igbar je, a yô ka, idya,* man mlu u wang ga man ieren i ndôhôrshima,*
20 man eev mbu civir man akombo a sôron* man ihyom i kôron man ayôôso man iyuhwe man ishimanyoon, man anyiman a gban man u van a mbampav man u paven iniongo,
21 man kwaghtômon man msôrom ma hunden, man uiniongo mba i eren dang her la, kua ambaakaa la nahan. M ngu tan ne icin sha akaa ne tsuaa, er m vande tan ne icin kera nahan, mer ior mba ve eren ambaakaa ne la vea ya dyako u Tartor u Aôndo ga.
22 Kpa ityamegh ki jijingi yô, ka dooshima man iember* man bem man ishimawan man erdoo man ieren i dedoo man jighjigh u nan,
23 man ishima i legh legh man iyolkôrontsaha. Tindi môm yange ambaakaa ne ga.
24 Heela tseegh ga, mba ve lu kwagh u Kristu Yesu yô, ve mande iyol ve a asaren a i a taver la, kua mbamhen mba i sha kon.
25 Aluer jijingi ngu hemen se yô, se za nen hemen u eren kwagh* sha inja sha inja kpaa, sha iwasen i jijingi.
26 Se hingir nen mbakeren icivir ga, shi se eren nen akaa a van a gesa u gban hen atô wase ga, shi se gbaan nen mbagenev iyuhwe ga.
Ngeren mba shin kpe
^ Zwa Grika, “yevese.”
^ Nenge Ngeren u Pasen Asember.
^ Shin “ma ve kera lu sha inja i yaven a or ga,” nahan ma ve kera kom u dondon atindi shon a ve lumun a mi la ga.
^ Shin a fatyô u kaan ér, “kohol tese.”
^ Shin “Zenden nen sha jijingi.”
^ Zwa Grika, porneia (ponia). Nenge Ngeren u Pasen Asember.
^ Shin “dang u eren.” Ka ishember i ken zwa Grika i i yer ér aselgeia (asejia) la. Nenge Ngeren u Pasen Asember.
^ Shin “ahir a eren; u nan or mcimbim ma bom.”
^ Shin “msaanyol.”
^ Shin “zenden.”
