Mbaheberu 10:1-39
-
Iniav mbi sha zendenya mbi a inja keng ga (1-4)
-
Atindi, ka mure (1)
-
-
Kristu na nagh kwa môm ku kua lu a inja gbem yô (5-18)
-
Gbenda u he man u uma, sha u nyôron (19-25)
-
Se bunden nen mbamkombo asev ga (24, 25)
-
-
Icintan sha kwagh u isholibo i eren sha apera (26-31)
-
Vangertiôr man jighjigh u nan u wasen se u taver ishima (32-39)
10 Gadia er Atindi a lu mure u akaa a a lu van la, a lu akaa la jim jim ga yô, mayange je ka sha iniav mbi ka i zer nan hanma inyom la a* er mba ve lu kporom hen* Aôndo la vea hingir vough ga.
2 Luun er ka sha mbi a er ior vea hingir vough yô, ma i zer nan mbi gbeme? A lu nahan yô, a̱ naan nagh ku wanger mbacivir Aôndo kwa môm je maa, ishima i̱ de u nan ve ibo sha asorabo a ve er la gaa?
3 Kpa, iniav mbin ka mbi gema mbi umbur ior hanma inyom er ve lu mbaasorabo yô,
4 gadia awambe a anomabua man a ivo aa fatyô u tôôn asorabo a ase kera ga.
5 Nahan shighe u va shin tar la, a kaa ér: “‘Yange lu nagh ku nan man iyua doo u ishima ga, kpa u er iyol sha ci wam.
6 Yange u lumun a iniav mbi nanden man iniav mbi isholibo ga.’
7 Nahan m kaa mer: ‘Nenge! M va (i nger kwagh wam ken ihyurenruamabera*) ka u va eren ishima you, Aôndo wam.’”
8 A hii ôron ér: “Yange lu iniav mbi nan man uiyua man iniav mbi nanden jimin kua iniav mbi isholibo doo u ishima ga, shi u lumun a mbi kpaa ga”—ka iniav mbi i naan er Atindi a tese la je la—
9 been yô, a kaa ér: “Nenge! M va ka u va eren ishima you.” Ngu karen a kwagh u hiihii la kera, sha er una va a kwagh u sha uhar la yô.
10 Ka sha “ishima” i un shon ne i wanger se sha nagh ku Yesu Kristu a ne sha iyol na la ye; a na ku kwa môm vough maa a kure kwagh la.
11 Heela tseegh ga, hanma pristi nan til hen ijiir i nan ayange ayange sha u eren icighantom shi nan iniav mbi shon ne hanma shighe, shin er i lu u mayange mbia fatyô u tôôn asorabo kera vindi vindi ga nahan kpaa.
12 Kpa or ne yô, na nagh môm sha ci u asorabo, ku kua lu a inja gbem yô, maa a za tema ken uwegh ku yanegh ku Aôndo,
13 hii shighe la je ngu keghen, zan zan a va kar veren mbaihyomov nav vea lu un kpenga* u pendan angahar sha mi.*
14 Gadia ka sha nagh ku a ne môm la a er i lu u mba i lu wanger ve la vea hingir vough gbem ye.
15 Heela tseegh ga, icighan jijingi shi ngu eren shiada a vese, sha ci u a hii kaan ér:
16 “‘Gadia ka ikyuryan i me ya a ve zum u ayange la aa kar kera je ne,’ kape Yehova* a kaa la. ‘Me wa atindi a am ken asema a ve, shi me nger a ken mhen ve.’”
17 Maa a kaa ér: “Shi mayange me kera umbur asorabo a ve kua atindi a ve peren la ga.”
18 Nahan ka a̱ de or akaa ne yô, mba kera ne ma nagh sha ci u isholibo ga.
19 Sha nahan yô, anmgbianev, se mba a vangertiôr* u zan sha gbenda u karen nyôron ken icighanjiir la sha awambe a Yesu,
20 un u a bugh se* gbenda u he man u uma sha u nyôron ken ikyondo i yisan la, ka iyol na je la;
21 shi er se lu a pristi u hemban u a nengen sha ya u Aôndo yô,
22 se kporom nen a ishima i môm man a jighjigh u nan taveraa, er i kire asema a ase se de u yan ibo ken ishima, shi i ôô se iyol sha mngerem ma wang i bee kera ne.
23 Se za nen hemen u yôôn kwagh u ishimaverenkeghen yase la ken igbar taveraa a uwer gban shio, gadia un u a tende zwa la ka u jighjigh.
24 Se waan nen hanma wase ikyo* sha er ishima ia taver se u tesen dooshima shi eren akaa a dedoo yô;
25 se bunden nen mbamkombo asev er i lu ikye i mbagenev u eren nahan la ga, kpa se taver nen hanma wase ishima. Se hemba eren nen nahan cii, er ne nenge iyange la i lu mgbôghom yô.
26 Gadia aluer se zua a mfe u vough u mimi la kpa se mba eren isholibo her sha apera yô, mba kera nan ma nagh sha ci u asorabo ga,
27 kpa kwagh u i lu masen keghen yô, ka ijirôron i cieryol man iyugh i yeghen er usu nahan, i ia va hia mba ve lu hendan a Aôndo la.
28 Or ka nana̱ per Atindi a Mose sha apera yô, i wua nan sha shiada u iorov uhar shin utar.
29 Ne hen ner or u nan ndyar Wan u Aôndo angahar shi nan nenge awambe a ikyuryan a i tsegha nan sha mi la ér ka kwagh u ikyoogh ga, shi nan laha jijingi u Aôndo u a tesen erdoo u sha mhôôn la yô, mtsaha u nan una hemba vihin ga zee?
30 Gadia se fa Un u a kaa ér: “Iyev i ôron ka i yam; mo me kimbi” la. Shi a kaa ér: “Yehova* una ôr ior nav ijir.”
31 Gadia u yan mtsaha sha uwegh ku Aôndo u uma la, ka kwagh u cieryol.
32 Nahan kpa, za nen hemen u umbur ayange a karen ken ijime la, er zum u ne zua a iwanger la, ne ya atsan kpishi kpa ne yina ishima ga yô.
33 Ashighe agen yange i hee ne ken igbar* shi i tôv ne a atsan, shi ashighe agen ne ya ican imôngo* a mba ve lu tagher a akaa ne la.
34 Gadia ne tese er mhôônom ma ker ne a mba ve lu ken purusu la yô, shi ne de i ya ishar sha akaa a en, kpa ne lu saan saan her, sha ci u ne ayol a en ne fa er ne lu a kwagh u hemban doon, u una lu gbem yô.
35 Sha nahan yô, de te nen vangertiôr wen* la kera ga, sha ci u a va na injar i vesen sha mi.
36 Gadia gba u ne lu a ishimawan, sha er zum u ne eren ishima i Aôndo kera yô, ne ngohol kwagh u i tende zwa la yô.
37 Gadia “shi cuku” tsô “un u a lu van la una nyôr, una ngôôr ga.”
38 “Kpa orperapera wam nana lu uma sha ci u jighjigh u nan,” man “aluer nan hide ijime yô, a saan mo* iyol a nan ga.”
39 Kpa se mba mbahiden ijime sha u za timin ga, kpa se mba mbananjighjigh sha er a yima uuma asev yô.
Ngeren mba shin kpe
^ Shin a fatyô u kaan ér, “ior vea.”
^ Shin “mbacivir.”
^ Zwa Grika, “ihyurentakeda.”
^ Shin “kujila; ayakpa.”
^ Shin “a va kar nan un tahav mbu hemban mbahyomov nav.”
^ Nenge Ngeren u Pasen Asember.
^ Shin “ishima i gbar gbar.”
^ Zwa Grika, “a tsegha se sha.”
^ Shin “se ver nen ishima sha kwagh u hanmô wase.”
^ Nenge Ngeren u Pasen Asember.
^ Zwa Grika, “er ka ken agirigi u anumbegh nahan.”
^ Shin “ne lu ikyooso ikyooso.”
^ Zwa Grika, “ian yen i ôron kwagh gbar gbar.”
^ Zwa Grika, “uma wam.”
