Mbaheberu 12:1-29
12 Nahan, er se lu a ikpela i mbashiada kpishi nahan yô, se ta nen hanma kwagh u yuhwan kera kua isholibo i i ngôôr tagher se ga la, se gba nen gesa u ayemegh u i ver se sha ishi ne a ishimawan
2 er se lu kenger zulee sha Yesu ne, un ka Orvesen u Tamen u jighjigh u nan wase man or u wasen se sha u se lu a jighjigh u nan u vough. Gadia yange wa ishima sha kon,* wa ilyahan ikyo ga sha ci u iember i i ver un sha ishi la, nahan a za tema ken uwegh ku yanegh ku ikyônough ki torough ki Aôndo.
3 Sha nahan yô, hen nen zulee sha kwagh u un u yange wa ishima a mbaasorabo mba ve lu lamen sha a na dang, nahan van a ibo sha ayol a ve la, sha er ne vôr, ne yina ishima ga yô.
4 Er ne lu nôngon ityav a isholibo la nahan kpa, ne mba a̱ nôngo je i haa awambe a en inya ga.
5 Shi ne hungur kwaghwan u i we ne er ka ônov ne gbindigh gbindigh, ér: “Wan Wam, de nengen tsaha u Yehova* beelee ga, shi una kôôm we kpa, ishima i de yinan we ga,
6 gadia ka mba ve doo Yehova* ishima la je ngu a tsaha ve ye, jighilii yô, ka a gbidye* hanma or u a ngohol nan nan hingir wan na cii.”
7 Gba u ne waan ishima, gadia kwagh ne ka gbenda ugen u tsahan* ne. Aôndo ngu eren a ven nahan sha ci u ne mba ônov nav. Gadia ka hanma wan je ter u nan a tsahan nan ga?
8 Kpa aluer i tsaha ne cii nahan ga yô, ne mba ônov mba i mar sha tindi ga yô, ne mba ônov jim jim ga.
9 Heela tseegh ga, uter asev mba shin tar* ne yange ve tsaha se, shi se naan ve icivir. Nahan hemba doon u se kegh iyol u lumun hemen u Ter wase u ken jijingi la, se lu uma ga zee?
10 Gadia ve yô, yange ve tsaha se sha anshighe kpuaa, er ve nenge i doo ve la, kpa Aôndo eren nahan sha ci u iwasen yase, sha er se hingir uicighanmbaiorov er un kpa a lu icighan Aôndo nahan yô.
11 Ka mimi, zum u ka a tsahan se la, se mba ember ga, ka i nyoon se; kpa shighe ka una karen yô, mba ve zough a ityesen ken tsaha shon la ve ume ityamegh ki bem, ka perapera je la.
12 Sha nahan yô, taver nen ave a a shir livaa la, man anu a a lu kunden la,
13 shi za nen hemen u kôôm igbenda i̱ lu jighilii sha ci u angahar a en, sha er kwagh u a sombo la una mase gban ken inya ga, kpa a zor un her yô.
14 Keren nen u lun ken bem a ior cii shi lun uicighanmbaiorov; aluer or ngu nahan ga yô, nana fatyô u nengen a Ter ga.
15 Ver nen ishima, erdoo u sha mhôôn u Aôndo la a̱ de karen ma or ga, sha er mise u bo ua due sha u van a zayol, nahan ior kpishi vea hôngor ayol a ve sha u ga yô;
16 shi ver nen ishima, or u eren idya* nana̱ de lu hen atô wen ga, shin or u uicighanmbaakaav ve gbe nan kwagh ga, er Isou u yange tee ian na i waniunda sha ityô kwaghyan i môm la nahan kpaa ga.
17 Gadia ne fa er ken masejime va soo ér ma un zough a iveren la yô, kpa i venda un; gadia shin er nôngo tsung a mliam ashe ér ishima i gema ter na nahan kpaa, kera wase* ga.
18 Gadia ne kporom ka hen kwagh u or a fatyô u benden ave la ga, hen kwagh u i nande a lu yeghen usu, ape abeen a ilen man angôghime man ijeverahumbe ve lu,
19 shi busa u lu kaan, shi imo i lu ôron kwagh, i yange ior ungwa ve, ve zamber ér i de kera seer ôron ve ma kwagh ugen ga la ze.
20 Gadia ve fatyô u taver ishima ungwan kwagh u i lu kaan ér: “Aluer zendenya je kpa bende a uwo ne yô, i ta un awen” la ga.
21 Shi kwagh u i nenge a mi la cier iyol kpishi je Mose kaa ér: “Cier mo iyol, m ngu kunden.”
22 Kpa ne kporom ka hen Uwo u Shion man hen gar u Aôndo u uma, ka Yerusalem u sha la je la, ape mbatyomov udubu pue pue
23 ve kohol la, kua hen tiônnongo u ônovmbaiundav mba i nger ve ati sha la, man hen Aôndo, Orjir u ior cii, man hen uma u ken jijingi u mbaperapera mba i er ve hingir vough la;
24 man hen Yesu u a lu orhimen u ikyuryan i he la, kua hen awambe a i mishi a, a lu ôron kwagh sha gbenda u hemban doon a awambe a Abel la.
25 Wa nen ikyo sha er ne venda u ungwan* un u a lu ôron kwagh la ga yô. Gadia aluer mba yange ve venda u ungwan un u lu pasen icintan i Aôndo sha tar la war ga yô, kwagh wase una hemba vihin cii, aluer se gema ijime a un u a lu ôron kwagh sha la yô!
26 Sha shighe la imo na tenger tar, kpa hegen a tôndo zwa ér: “Shi me mase tenger, a kera lu tar tseegh ga, a kua usha kpaa.”
27 Nahan kwagh u i kaa ér, “shi me mase” la, tese ér a kar a akaa a i tenger a mi la kera, ka akaa a i er la je la, sha er akaa a i tenger a mi ga la aa lu her yô.
28 Nahan, er i gbe u a na se Tartor u a tenger a mi ga la yô, se tile nen sha mimi her sha er Aôndo una za hemen u tesen se erdoo u sha mhôôn, nahan se fatyô u eren un icighantom sha gbenda u a lumun a mi la, a mciem man sha icivir kpaa yô.
29 Gadia Aôndo wase ngu er usu u hian kwagh vindi vindi nahan.
Ngeren mba shin kpe
^ Nenge Ngeren u Pasen Asember.
^ Nenge Ngeren u Pasen Asember.
^ Nenge Ngeren u Pasen Asember.
^ Shin “ka a tsaha.”
^ Shin “tesen ne.”
^ Zwa Grika, “uter asev mba ken iyol yase i inyam man awambe.”
^ Nenge Ngeren u Pasen Asember, “Idya.”
^ Shin “gbenda kera lu.”
^ Shin “sha er ne ker akaa a kôron ave vendan; sha er ne hure.”
