Mbaroma 12:1-21
12 Sha nahan yô, anmgbianev, m ngu zamber a ven sha ci u mhôônom ma Aôndo a zungwen se la mer, gema nen ayol a en na nen nagh ku uma a mi; nagh ku i tsegha ku, shi Aôndo a lumun a mi yô, ka icighantom u ne lu eren un a mhen wen je la.
2 De nen u eren kwagh inja i môm a tar* ne, kpa lu nen a mhen u he, sha er ne gema ne hingir u fan kwagh u a doo Aôndo man u a lumun a mi shi a lu u vough sha ishigh nagh la yô.
3 Gadia m ngu kaan a hanma wen sha erdoo u Aôndo a tesem sha mhôôn la mer, nana̱ de nengen iyol i nan i hemban er ma nan nenge la ga, kpa nana̱ nenge sha gbenda u nana lu a mhen u vough yô, hanma or sha* jighjigh u nan u Aôndo a wase nan u lun a mi la.
4 Er se lu a alegh a iyolough kpishi ken iyol i môm, kpa alegh ne cii a eren tom môm ken iyol ga nahan,
5 kape se kpa se lu iyol i môm sha ci u se mba ken mzough vea Kristu je la, shin er se ngee nahan kpaa. Kpa se asange asange se mba alegh a iyol i môm.
6 Sha nahan yô, se mba a uiyua kposo kposo mba i ne se sha erdoo u Aôndo a tese se sha mhôôn la, aluer ka iyua i ôron kwaghôron u profeti yô, se ôr un i kuma sha kwar u jighjigh u nan wase la;
7 shin a lu iyua i eren tom u pasen kwagh kpaa, se er nen tom ne; shin, or u i lu iyua i tesen yô, nana̱ tesen;
8 shin a lu or u taver ior ishima* kpaa, nana̱ taver ior ishima,* or u i ne nan u karen kwar yô, nana̱ karen u sar sar; or u nan hemen yô, nana̱ hemen sha inja;* or u nan zungu mhôônom kpaa, nana̱ eren nahan saan saan.
9 Dooshima wen a de lu u sha atseregh ga. Kôr nen kwaghbo ihyom, gema var nen a kwagh u dedoo.
10 Doo nen ayol a en sha mimi er ka anmgbianev mba sha tsombor nahan. Hemen* nan nen mbagenev icivir.
11 Eren nen tom kpoghuloo,* de lu nen mba wan hwev ga.* Jijingi a na lu nen mbatseen asema. Er nen Yehova* tom.
12 Ember nen sha ishimaverenkeghen la. Waan nen ishima ken ican. Taver nen ishima sha msen u eren.
13 Wasen nen uicighanmbaiorov sha mbamgbe vev. Keren nen u ngohol ior sar sar.
14 Sônon nen iveren sha ci u mba ve tôvon ne a ican la, veren nen ve doo doo, de waan nen ve ifyan ga.
15 Ember nen a mba ve ember la imôngo; vaan nen a mba ve vaan la imôngo.
16 Nengen nen mbagenev er ne nengen ayol a en nahan; de veren nen ishima* sha uzegembaakaav ga, kpa ishima i lu ne sha akaa a kiriki. De hingir nen mbafankwagh sha mnenge wen ga.
17 Or a̱ er u ifer kpa, we de eren nan ifer ga. Ver ishima u eren kwagh u ior cii ve nenge ér ka u dedoo la.*
18 Aluer gba sha mi yô, er kwagh u u fetyô la sha u lun ken bem a ior cii.
19 Ne mba doon mo ishima, de oron nen iyev ayol a en ga, kpa de nen Aôndo a va a iyugh na; gadia i nger ér: “‘Iyev i ôron ka i yam; mo me kimbi,’ kape Yehova* a kaa la.”
20 Kpa “aluer ijen kôr orhyom wou yô, na nan kwaghyan; aluer imura kôr nan yô, na nan kwaghman; gadia aluer u ngu eren nahan yô, u haa nan akaausu a kpenger kpenger sha ityou.”*
21 De deen wer iferkwagh i hemba u ga, kpa za hemen u hemban iferkwagh sha u eren kwagh u dedoo.
Ngeren mba shin kpe
^ Shin “kov.” Nenge Ngeren u Pasen Asember.
^ Shin “hanma or sha er i kar; hanma or sha kwar u.”
^ Shin “wan ior kwagh.”
^ Shin “nana̱ waan ior kwagh.”
^ Shin “nana hemen sha mimi.”
^ Shin “Vanden.”
^ Shin “sha gbashima; sha ishimatseen.”
^ Shin “de eren nen tom uwer uwer ga.”
^ Nenge Ngeren u Pasen Asember.
^ Shin “de henen nen.”
^ Shin “u a lu u dedoo sha ishigh ki ior cii la.”
^ Nenge Ngeren u Pasen Asember.
^ Ka, “u nôngon wer nana gba ishima shimi shi nana hingir ishima legh legh” je la.
